[1] Yesuus ammaas fakkeenyaan isaanitti dubbachutti ka'e; “Namtichi tokko mukkeen inabaa hedduu lafa isaa irra dhaabee, naannawa isaattiis dallaya dhagaa itti ijaaree, boolla firii isaa itti cunfan qotee, siree irra taa'anii eeganiiniis itti ijaare. Kana booda warra hojii inabaa beekutti kireeysee ti, imaltuu takka dhaqe.
[2] Wayti oomishaa hogguu geeyse, firii mukkeen inabaa irraa, waa irraa fudhachuuf hojjataa isaa gara warra ooyruu inabaa kireeyfatanitti erge.
[3] Isaan ammoo hojjataa san qabanii ti, tumanii ti harka duwwaa isa gadi dhiisan.
[4] Ammaas hojjataa biraa ti isaanitti erge; isaan ammoo mataa isaa fottooysanii ti, isaas sablisan.
[5] Amma illee kan biraa ti itti erge, isa kana ammoo ni ajjeesan. Akkanumatti warra biraa tiis hedduu itti erginaan, hanga tokko tumanii ti, warra kaan ammoo ajjeesan.
[6] Amma namni inni ergu tokkuma qofaa tu hafeef, ilma tokko kan inni jaalatu. ‘Ilma kiyya ni kabaju’ jedhee ti, hundumaa booda isa erge.
[7] Warri ooyruu inabaa kireeyfatan sun ammoo, ‘Dhaalaan isa kanaa, koottaa ni ajjeefnaa! Dhaalli niis keenya taha!’ waliin jedhan.
[8] Akkasitti isa fuudhanii ajjeesanii ti, reefka isaa tiis, ooyruu inabaa san keeysaa gadi baasanii ti darban.
[9] “Abbaan ooyruu inabaa sun maal godha laata? Inni dhufee, warra kireeyfatan san ni dhabamsiisa, ooyruu inabaa saniis ammaas warra biraatti ni kireeyfata.
[10] Isin Barreeyfama Qulqulluu keeysatti tana hin dubbifnee? ‘Dhagichi, najjaaroonni tuffatan, inni kan dhagaa mataa utubaa manaa qaceelchu tahe;
[11] tun dalagaa Gooytaa ti, ija teenya durattiis waanuma baasaa ti’ kan jedhu barreeyfamee ti jira” jedhe.
[12] Hogguus fakkeenyi kun isaaniif jecha akka dubbate beekanii ti, Yesuus qabuuf yaalan; haa tahuu malee, ummata san sodaaf, isa dhiisanii ti deeman.
[13] Dubbii afaan isaa tii baatuun isa qabuuf jecha, Fariisotaa fi murna Herodis keeysaa jara tokko Yesuusitti ergan.
[14] Warri ergamaniis dhufanii ti, “Yaa barsiisaa! Ati nama dhugaa akka taate nuti ni beeyna; ‘Namni maal naan jedha?’ jettee tiis hin sodaattu; ati ammoo karuma Rabbii ti dhugaa dhaan barsiifta, namaas wal hin caalchiftu. Eegasuu Qeesaariif gibira baasuun seera moo seeraa miti? Kafaluu tu nu irra jira moo kafaluun nu irra hin jiruu?” jedhaniin.
[15] Inni ammoo fakkeeysummaa isaanii irratti beekee ti, “Maaliif hillimatti na galchuuf na fitintu? Akkaan laaluuf mee saaqa tokko anatti fidaa!” isaaniin jedhe.
[16] Isaaniis itti fidan; inni ammaas, “Tun suuraa eenyuu ti? Katabbiin tuniis tan eenyuu ti?” jennaan, isaan hogguus, “Tan Qeesaari” isaan jedhan.
[17] Achi irratti Yesuus, “Eegasuu waan Qeesaariif kannamuu qabu Qeesaariif kannaa; waan Rabbiif kannamuu qabuus Rabbiif kannaa!” isaaniin jedhe; jechi kuniis isaan ajaa'ibsise.
[18] Eegasii Saduqoonni warri qiyaamaan hin jirtu jedhan, gara Yesuus dhufanii ti, gaaffii isa gaafatan.
[19] “Yaa barsiisaa! ‘Namni tokko niitii fuudhee ilmoo odoo irraa hin godhatin yoo du'e, obboleeysi isaa niitii san dhaalee shanyii obboleeysa isaa tiif haa magarsu,’ jedhee Museen seera keeysatti nuuf barreeysee ti jira.
[20] Kunoo, obboleeyyan dhiiraa torbaa tu ture; inni angafni niitii fuudhe ti; ilmoo odoo irraa hin godhatin du'e.
[21] Inni lammeeysaaniis isii dhaalee, odoo ilmoo irraa hin godhatin du'e; inni sadeeysaaniis akkasuma isii dhaalee ti irraa du'e.
[22] Isaan torbanuu ilmoo irraa hin godhanne; hundumaa booddee, dubartittiin ni duute.
[23] Isaan torbanuu niitummaaf isii fuudhanii waan jiraniif, guyyaa qiyaamaa isaan keeysaa kamiif niitii tahuuf deemti?” jedhaniin.
[24] Yesuus deebisee, “Akkanatti dogongoruun keeysan, Barreeyfama Qulqulluu fi humna Rabbii tiis, beekuu dhaba keeysan irraa hii mitii ree?
[25] Qiyaamaa hogguu du'aa ka'an, akka maleeykoota Rabbii warra samii keeysaa ti tahu malee, hin fuudhan, hin heerumaniis.
[26] Waa'ee warri du'an kaafamuu yoo tahe ammoo, Kitaaba Musee keeysatti, bakka inni waa'ee tusii bobawuu itti dubbate san, isin hin dubbifnee? ‘Ani Rabbii Abrahaam, Rabbii Yisihaaq, Rabbii Yaaqoobiis’ jedhe.
[27] Inni, Rabbii warra du'anii ti miti, Rabbii warra jiraatanii ti malee; kanaaf hizaaba irra dogongortan” isaaniin jedhe.
[28] Barsiisota seeraa keeysaa tokko, falamaa isaanii dhagayee, ammaas Yesuus jawaaba gaarii akka deebiseefiis arkee, isaatti dhihaatee ti, “Seera kam tu seerran hundumaa irra caala?” jedhee ti isa gaafate.
[29] Yesuus deebisee ti, “Seerri seera hundumaa irra caalu, ‘Dhagayi, yaa Israa'el! Gooytaan keenya Rabbi, Gooytaa tokkicha.
[30] Atiis Rabbii kee Gooyticha, garaa kee hundumaan, lubbuu tee humdumaan, qalbii tee hundumaan, humna tee hundumaaniis jaalachuu qabda.’
[31] Inni lammeeysaan ammaas, ‘Ollaa kee akka mataa keetitti jaaladhu’ kan jedhuu dha. Seerri isaan kana irra caalu kan biraa hin jiru” jedheeni.
[32] Barsiisaan seeraa sun ammaas, “Dhuga baanta yaa barsiisaa! ‘Rabbi tokkicha, isa malee kan biraa hin jiru’ jettee dubbachuu dhaan sirritti ibsite.
[33] Isaas garaa hundumaan, qalbii hundumaan, humna hundumaaniis jaalachuun, ollaa akka mataa ifiitti jaalachuun, walumaagala qalma gubamuu fi aarsaa hundumaa irra guddaa dha caala” jedheeni.
[34] Hikmaan, akka inni deebiseef hogguu arkees Yesuus, “Ati Mootummaa Rabbii ti irraa fagoo miti” isaan jedhe. Kana booddees nam tokko illeen gaaffii isa gaafachuuf ija hin jabaanne.
[35] Beeytal Maqdas keeysatti Yesuus odoo barsiisuu irra jiruu ti, “Barsiisonni seeraa ‘Masiihiin ilma Daawwid’ jechuu, akkamitti dandayan?
[36] Daawwid mataan isaa tuu, Ruuhal Qudusiin geggeeyfamee, ‘Gooytichi Gooftaa kiyyaan, adawwii tee miila kee jala hangaan ani siif kaayuu gara harka mirgaa kiyyaan taa'i! jedhee ti jira’ jedhe.
[37] Egaa, Daawwid mataan isaa tuu, ‘Gooftaa kiyya’ jedhee eega isa yaame, akkamitti ammoo ilma isaa taha ree?” jedhe. Hogguus ummata hedduu tu, gammachuu dhaan isa dhaggeeyfate.
[38] Barsiisa isaa keeysatti Yesuus, “Barsiisota seeraa warra uffata dhedheeraa uffatanii lafaan haraa olii-gad yaa'u, magaalaa keeysattiis namoonni gadi godhatanii akka nagaya isaan gaafatan jaalatan,
[39] akkasuma ammaas mana sagadaa keeysaa barcuma ol'aanu, bakka fanxaziyyaa keeysattiis bakka ulfinaa warra filatan irraa if eegaa!
[40] Isaan kun warra waan gursummeeytiin qabdu harkaa fixanii, fakkeeysuuf ammoo kadhata isaanii dheeressanii dha. Warra akkanaa kana irratti adaba keeysaa caalaa tu itti murama” jedhe.
[41] Gaaf tokko Yesuus fuullee mudaaya buusii taa'ee ti, hogguu namoonni horii mudaaya buusii san keeysatti naqan ni ilaala ture; namoonni warri taajiroonni hedduun horii hedduu dha keeysa naqan.
[42] Gursummeeytiin deeyduun takkaas dhuftee ti, maallaqa jibir hanga saantiima lamaa tahu mudaaya san keeysa buufte.
[43] Hogguus inni barattoota isaa yaamee ti, “Dhugumaan isinitti hima! Gursummeeytiin deeyduun tun warra mudaaya buusii san keeysa horii buusan hundumaa irra caalaa buuftee ti jirti.
[44] Isaan kanneen hundinuu, horii nafaqaa isaanii irraa hafee ol kaayatan keeysaa, mudaaya buusii keeysa buusan; isiin tun ammoo, hiyyummaa isii irraa, waanuma nafaqaaf qabdu hundumaa huu, mudaaya keeysa buufte” jedhe.