[1] Waa'ee horii amantoota gargaaruuf walitti buufamuu, akkumaan ani waldayoota kiristaanaa kanneen kutaa biyya Galaatiyaa keeysa jiran ajaje sanitti isiniis akkasuma godhaa!
[2] Eegaan ani dhufe booda, horii walitti qabuun akka nu hin mudanne, torbaanuma jiru keeysaa guyyaa duraatti, hundi keeysanuu matuma matatti, ammaas akkuma dandeeyyii isaatitti, waan buusuu qabdan ifuma biratti walitti qabdanii akka anaan eeydan haa tahuu.
[3] Waytaan dhufuus, namoota isin filattaniif, xalayaa ittiin beekaman kannee tii fiin, kannaa teeysan Yerusaaleem akka geeysaniif isaan erguu dhaan barbaada.
[4] Dhaquun tiyyaas yoo kan barbaachiftu taatee arkamtees, isaaniis anumaan wajjiinuu dhaqu.
[5] Maqedooniyaa keeysa bahuu waaniin yaadeef, Maqedooniyaa keeysa eegaan dabre booddee, isin simachuufiin dhufa.
[6] Isin biraas tarii huu hanga takka niin turaan taha; yookiin gannaa kana guutumatti isinuma birattiin dabarsaan taha, akkasitti isiniis amna bakkaan dhaquuf deemu irratti na gargaartu taha.
[7] Ani ammaan tana miiluma isin irra butee dabruu hin barbaadu; yoo Gooftaan jedhe hanga takka isin bira turuufiin abdadha.
[8] Ammoo hanga guyyaa Phenxeqostetti mandaruma Efesoon keeysaan tura.
[9] Hojii faaydaa qabduuf balbalti guddoon waan anaaf banamtee ti jirti, ammaas tiyyaas hedduu tu jiru.
[10] Ximotewoos hogguu dhufu, inni namuma akkuma kiyyatti hojii Gooftaa hojjatu waan taheef jecha, ifitti qabaa tii akka inni if hin dhaamonne godhaa!
[11] Namni tokko illeen akka isa hin tuffanne! Obboleeyyan wajjiin akka inni dhufaa jiruus eegaa waaniin jiruuf, akka gara kiyya deebi'uuf, nagayaan karaa isaa irra buusaa.
[12] Obboleeysa kiyya Apholos, obboleeyyan warra kaanii wajjiin dhufee akka isin laaluuf, ani gad jabeeysee itti himee tiin ture; haa tahu malee, inni wayta ammaa tana isin bira dhufuuf fedha hin qabu; ammoo hogguu carraa arkate, dhufuun isaa hin hafu.
[13] Dammaqaa, amantitti cimaa tii dhaabbadhaa! Warra onnee qabdan tahaa, jabaadhaa!
[14] Waan hojjattan hundumaa jaalalaan raawwadhaa!
[15] Ammaas yaa obboleeyyan koo, haaskaan Isxifaanaas, Akaayyaa keeysaa warri dura amantii fudhatan akka isaan tahan ni beeytu; amantoota kiristaanaa kaadamuufiis if kannanii ti jiru.
[16] Warra akkanaa, kanneen hojii kanaaf if kannanii itti dadhaban hundumaaf, akka ajajamtaniin jabeeysee isin yaadachiisa.
[17] Isin dhufuu dadhabnaan Isxifaanaas, Fortunaaxosii fi Akaayqosiis bakka teeysan bu'anii dhufanii, waan ana irraa irrate anaaf guutnaan niin gammade.
[18] Akkuma garaa keeysan gammachiisanitti, garaa kiyyaas gammachiisanii ti jiru; warri akkanaa kun beekamuu dha qaban.
[19] Waldayoonni kiristaanaa kutaa Asiyaa keeysa jiran, nagaya isiniif dhaamu; Aqiilaanii fi Phriskaan waldaya mana isaanitti walitti qabamtu wajjiin, Gooftaa keeysaan nagaya onnee irraa buqqa'e isiniif ergu.
[20] Obboleeyyan as jiran hundinuu nagaya isiniif dhaamu; yaada garaa xaliila taheen, dhungoon nagaya wal gaafadhaa!
[21] Nagaya kana ana Phaawulos tu harka kiyyaan isiniif barreeyse.
[22] Namni Gooftaa Yesuus Kiristoos hin jaalanne, abaaramaa haa tahu; “Maaraanaataa!” hiikkaan isaa tiis, “Yaa Gooftaa keenyaa koottu!” jechuu dha.
[23] Ni'imaan Gooftaa Yesuus isinii wajjiin haa taatu!
[24] Jaalalti tiyya Yesuus Kiristoos keeysaan, hunduma keeysanii wajjiin haa taatu! Aammiin!