[1] Yaa obboleeyyan koo! Ani waytaan gara keeysan dhufe, hayyummaa dubbii tiin yookiin hikmaa dhaan namoota biraa irra caaluu dhaan, hiccitii Rabbii isinitti lallabaa hin dhufne.
[2] Hangaan isin bira turees Yesuus Kiristoosuma, nuuf fannifame qofa malee, wanniniin beeku tan biraa, takka illeen akka hin jirre murteeyfadhee tiin ture.
[3] Ani dadhabbiin, ammaas sodaa guddoo fi hollachuu dhaaniin gara keeysan dhufe.
[4] Barsiisni kiyyaa fi lallabni kiyyaas, humni Ruuhaa Rabbii akka na keeysa jiru agarsiisu malee, dubbiin tiyyaas akka dubbii hayyuu namaatti tan nama harkiftu hin turre.
[5] Kuniis wanni taheef, amantiin teeysan humna Rabbii irratti malee, akka beekumsa namaa irratti hin bu'uramneefi.
[6] Haa tahu malee, beekumsa bara ammaa, yookiin beekumsa warra biyya addunyaa tana bulchuu, kan warra ifii fuu bakka hin qabnee kanaa odoo hin tahin, warra amantiin bilchaatan keeysatti ammoo, qoowlii hikmaa ti dubbanna.
[7] Nuti qoowlii hiccitii hikmaa Rabbii tan dhooyfamtee turte san dubbanna; hikmaan tuniis tan Rabbi uumamuu waytii tiin dura, ulfina isaa irraa nuti akka hirmaannuuf jecha, tan nuuf herregee dha.
[8] Warra biyya addunyaa tana bulchan keeysaa tokko illeen isaanii tuu hikmaa tana hin beeyne; odoo waan hubatan taate, Gooftaa durrii ulfinaa hin fannisan turan.
[9] Kitaaba Qulqulluu keeysatti, “Waani Rabbi warra isa jaalataniif qopheeyse, ijji namaa hin agarre, gurri namaa tiis hin dhageenye, yaadni namaa tiis bira hin geenye” jedha.
[10] Rabbi, Ruuhal Qudusiin tana nutti mullise; Ruuhal Qudus taanaan waan hundumaa, yaada Rabbii kan gadi fagooti illee, xiinxalee bira ni gaha.
[11] Waan yaada namaa keeysa jiru, ruuhaa namticha keeysa jiruu tu beeka malee, namni biraa beekuu hin dandayu; akkasumatti ammaas Ruuhaa Rabbii malee, eenyu illeenuu yaada Rabbii hubachuu hin dandayu.
[12] Ammaas nuti kannaa Rabbi biraa bilaashitti nuuf kannamte beekuuf, Ruuhaa Rabbi biraa dhufe fudhanne malee, ruuhaa biyya addunyaa tanaa hin fudhanne.
[13] Kanaafi nuti dubbii Ruuhaa dhaa warra ruuhaanii arkatan barsiisuuf, waan ruuhaan kanname fassarraafi malee, barsiisa beekumsa namaa tiin hin dubbannu.
[14] Warri ruuhaa hin arkatin, waan Ruuhaa Rabbii irraa dhufu hin fudhatu; kun isaan biratti gowwummaa dha. Maalummaan isaa ruuhaa dhaan waan bira gahamuuf jecha, isaan kana hubachuu hin dandayan.
[15] Namni ruuhaaniin waan hundumaa ni qorata, inni ammoo nam tokko illeenuu hin azooramu.
[16] Barreeyfamni Qulqulluun, “Eenyuu tu yaada Gooytichaa beeka? Eenyuu tu isa gorsuus dandaya?” jedha. Nuti ammoo yaada Kiristoos qabna.