[1] Namoonni akka kaadamtoota Kiristoositti, akka warra hojiin hiccitii Rabbii, imaanaan hadaraa itti kannamtetti, nu lakkaawuu tu isaan irra jira.
[2] Warra imaanaan itti kannamte irraa amanamummaa tu barbaadama.
[3] Ani taanaan, isinuu anatti firdii gootaniis, yookiin yaa'iin feetee huu anatti firdii gootuus, na biratti tun humaa tii miti.
[4] Xalaliin tiyyaas na xaliila; haa tahu malee, kun qaceelummaa tiyya hin mirkaneeysu; Gooftaa tu firdii anatti godha.
[5] Kanaaf jecha, Gooftaan hanga dhufu eegaa, wayti herregamte san odoo hin gahin dura, waa takka illee hin faradinaa! Inni kunoo, waan dukkana keeysa dhokatee jiru ifatti, yaada garaa namaa tiis zaahir baasa; gaafas namayyuu adduma addaan Rabbi biraa galata arkachuuf jiraata.
[6] Yaa obboleeyyan koo! Ammaas isin yoo fayyadeef jechaan, tana hundumaa Apholosii fi mataa kiyyatti fakkeeysee dubbadhe; jecha, “Waan Kitaaba keeysatti barreeyfame bira hin dabrinaa!” jedhu san nu irraa baradhaa, isin keeysaa nam tokko illeenuu dhaytaan ka'ee nama tokko gargaaruu dhaan, kan biraa irratti akka hin dhaadanne jechaafiin tana godhe.
[7] Warra kaan irra, eenyuu tu si caalchise? Waan Rabbiin siif hin kannamin tan ati qabdu maaltu jira? Yoo kannaan fudhatte taate ammoo, akka waan kannaan siif hin kannaminii gootee maaliif dhaadatta ree?
[8] Duruun waan barbaaddan hundumaa arkattan! Duruun taajirtaniisi! Nuun maletti, mootoowwan taataniisi! Eeyye, isin silaa dhugumaan mootamtanii, ammaas nuti illeen akka isiniin wajjiin mootummaa irra hirmaannu taanee niin fedhaan ture.
[9] Akka natti fakkaatutti, Rabbi nu warra ergamoota, nama hundaa gadi nu godhee ti, akka warra namoota keeysatti ajjeefamuun itti faradamtetti, biyya addunyaa duratti, ammaas maleeykoota samii irraa tii fi Banii Aadam durattiis, akka baasa ajaa'ibamuu tokko godhamnee ti jirra.
[10] Nuti sababa Kiristoosiif jecha gowwoota taane; isin ammoo Kiristoosiin beeytota; nuti dadhaboo dha taane, isin ammoo cimoo dha, nuti tuffatamoo dha taane, isin ammoo kabajamoo dha.
[11] Hanga ammaatti nuti ni beeloyna, ni dheebonnaasi, ni daarraasi, ni garafamna, warra mana keeysa jiraatan hin qabne tahuu dha mudanne.
[12] Harka keenyaan jabaannee ti carraayna; wayta nu abaaran ni eeybifna, wayta roorroon nu reebaniis obsaan dandeenya.
[13] Hogguu nu arrabsaniis, jawaaba gaarii dha deebifna; nuti baxalaa biyya addunyaa taanee ti jirra, ammaas nuti dhegeda lafaa ti.
[14] Tana katabuun kiyyaas akka joollee too jaalatamotti isin if eeggachiisuufi malee, isin if qaanfachiisuufii miti.
[15] Karaa Kiristoos irratti warra isin qaceelchu hedduu yoo qabaattan illee, abbootii hedduu hin qabdan; ani wangeela isin barsiisuu kiyyaan, Kiristoos Yesuus keeysatti, Abbaa keeysan tahee tiin jira.
[16] Kanaaf jechaan eegasuu, anuma kana akka fakkeenyatti fudhadhaa jedhee tiin isin gaafadha.
[17] Sababa kanaaf jechaan Ximotewoos gara keeysan erguu kiyya. Inni gooftaa keeysaan ilma kiyya jaalatamaa fi amanamaa dha; inni Kiristoos keeysatti haalaan ani itti jiraadhu, waaniin isin barsiise kaniin waldaya kiristaanaa hunduma keeysatti barsiisaa jiruus, isin ni yaadachiisa.
[18] Isin keeysaa muraasni akka waaniin ani dhufee isin hin agarretti lakkaawanii, dhaytaawutti ka'an.
[19] Amma ammoo, fedha Gooftaa yoo tahe, daddafee gara keeysan niin dhufa; warri dhaytawoon sun akkamitti akka isaan dubbatan qofa odoo hin tahin, ammaas humna maal akka isaan qabaniis bira gahuufiin taa'a.
[20] Mootummaan Rabbii oduunii miti, humna Rabbii tiini malee.
[21] Mee kam filattu? Ulee fudhadhee isinitti dhufuu dha moo? Yookiin ruuhaa jaalalaa tii fi gara-laafummaan isinitti dhufuu kiyya barbaaddu?