[1] Ani Phaawulos, fedhii Rabbii tiin ergamaa Yesuus Kiristoos kan tahe, Ximotewoos obboleeysa amantii wajjiin, gara waldaya Rabbii tan magaalaa Qorontoos jirtuuf, akkasumatti warra guutummaa kutaa Akaayyaa keeysaa, kiristaanota hundumatti tana barreeysuu kiyya.
[2] Rabbi, Abbaa keenyaa fi Gooftaa keenya Yesuus Kiristoos irraa hiis, ni'imaa fi nagayni isiniif haa tahan!
[3] Rabbi, ammaas Abbaa Gooftaa keenyaa Yesuus Kiristoos, Abbaa araaraa tii fi, Rabbii sadoo hundumaa nuuf kannuuf, galanni haa tahu!
[4] Inni, rakkoo teenya hunduma keeysatti gargaarsaan nuuf dirmate; akka nutiis warra rakkoo keeysa jiraniif, gaargaarsa kannuuf dirmachuu dandeenyuufi.
[5] Hiraar Kiristoos kan hanga hin qabne keeysaa akkuma hirmaannutti, akkasumatti ammaas Kiristoos keeysaan sadoo hanga hin qabne irraa nuti warra hirmaatu.
[6] Nuti yoo dararamne, sadoo fi ammaas najaatuma keeysaniifi; ammaas nuti sadoo arkannuus, akkuma isin sadoo arkattaniifi; kuniis, cinqii tan akka nuti qabnuu, isiniis obsaan dandayuu yoo itti barattani.
[7] Isin akkuma cinqii teenya irraa hirmaattanitti, akkasumatti ammaas sadoo teenya irraahiis akka hirmaattan waan beeynuuf jecha, abdiin nuti isin irratti qabnu bakkaa hin sossootu.
[8] Yaa obboleeyyan koo, rakkoo kutaa biyya Asiyaa keeysatti nu irra geeyse, odoo isinitti hin himamin akka haftan hin barbaannu; rakkoo guddoo tan obsuuf humna teenyaa ol nutti taate jala turree, lubbumaan jiraachuufi illee, abdii dha nu kutachiifte.
[9] Akkuma waan firdiin du'aa nutti faradamtetti wanni nutti dhagayameef bar; akka nuti if irratti amantaa dhabnee, ammoo Rabbuma kan warra du'an du'a keeysaa kaasu qofa irratti irkannuufi kuni tahe.
[10] Rabbi balaa du'aa tana jalaa nu baasee ti jira, hegerees nu baasuuf taa'a. Amma illee ittuma furee akka nu eewaluuf jecha, abdii teenya isuma irra kaayannee ti jirra.
[11] Isiniis ammaas kadhata keeysaniin nu gargaaruu dha qabdan; kadhata nama hedduu dhaan godhameeef deebisa kannameef, namni hedduun, eeyba nuuf kannamte laalchisuun, bakka teenya bu'anii Rabbi akka nuuf galateeyfataniifi.
[12] Kunoo dhaadannoon teenya tana; jireenyi nuti biyya addunyaa tana keeysa jiraanne, keeysumaa huu, akkaataan nuti qulqullummaa fi amanamummaan isiin wajjiin itti jiraanne, Rabbi biraa tahuu isii, xalaliin teenya ragaa dha nuuf baati; kuniis ni'imaa Rabbii tiini malee, hikmaa biyya addunyaa tiinii miti.
[13] Waanuma isin dubbisuu fi hubachuu dandeeysan malee, nuti waan biraa isiniif hin katabne; hunduma isaa tuu akka hubattan niin abdadha.
[14] Akkuma isin amma cinaa tokko nuuf hubattanii jirtutti, guyyaa Gooftaan keenya Yesuus deebi'ee dhufutti ammaas nuu fi isiniis waliini dhaadachuu dandeenya.
[15] Kun akka tahuuf deemu mirkana waan naa taheef, eeyba Rabbii dachaan akka arkattaniif jechaan, takka duraan dhufee isin laaluun barbaade.
[16] Waytaan gara kutaa biyya Maqedooniyaa dhaquuf deemu, karaa keeysan goree isin arkee, ammaas Maqedooniyaa dhaa gaafaan deebi'uus isinitti goree, achiin booda akka isin gara kutaa biyya Yihudaatti qaceelchuun na gargaartan akeekee tiin ture.
[17] Akeeka kana waytaan qopheeyse, qalbii rooraatuu dhaa niin baafadhee laata? Yookiin waytaan akeeka kiyya baafadhu, akkuma namni biyya addunyaa tanaa waan takka “Eeyye” jedhe, hogguusuma ammaas “Miti” jedhu sanitti, aniis akkasumattiin akeeka baafadhee?
[18] Akka amanamummaan Rabbii mirkana dhugaa taatetti, akkasumatti dubbiin ani isinitti dubbadhuus, eeyyeen tiyyaas, mititti tan jijjiiramtuu miti.
[19] Yesuus Kiristoos, Ilmi Rabbii, kan Silwaanos, Ximotewoosii fi anaaniis isin jiddutti lallabame san, inni waan “Eeyye” jedheen, “Miti” hin jedhu; Kiristoos hoggayyuu “Eeyye Rabbii ti” nuuf tahe.
[20] Abdiin Rabbi kanne hundinuu, Kiristoosiin eeyye godhaman; kanaaf jecha nutiis “Aammiin” jennee ti Rabbiif galata ulfinaa galchina.
[21] Eegasuu, Rabbuma, kan nuu fi isiniis Kiristoos keeysatti gadi jabeeysee nu dhaabe; isuma ammaas kan hojii kanaafiis adda baasee nu muude.
[22] Rabbi, sumuda isaa nu irra kaayee ti jira; inni ammaas Ruuhaa isaa qalbii teenya keeysatti, qabuulii waan nuuf ol kaayee godhee ti dhangalaase.
[23] Ani ammoo isin qusachuuf jecha, Qorontoositti deebi'uu irraa hafuu kiyyaaf, Rabbii tu anaaf ragaa dha!
[24] Isin amantitti jabaattanii waan dhaabbattaniif, isin gammachiisuuf jecha isiniin wajjiin hojjanna malee, nuti amantii teeysan irratti amrii qabaachuu fi miti.