[1] Waa'ee gaaffii qalma waaqayyolii tolfamoof dhiheeyfamanii laalchisuun, hundi keenyaa huu beekumsa qabaachuu keenya ni beeyna; haa tahu malee, beekumsi nama dhayteeysa, jaalalti ammoo jiruu walii wajjii ti ijaarti.
[2] Namtichi waa hundumaa beekaa if seehu, waanuma silaa beekuun isa irra turee huu, nama amma illee hin beekini.
[3] Namni Rabbi jaalatu ammoo, inni Rabbi biratti beekamaa dha.
[4] Eegasuu waa'ee qalma waaqayyolii tolfamoof dhiheeyfame nyaachuu dhaa ammoo, waaqni tolfamaan maalaa-yaanii akka tahe, Rabbuma tokkicha malees, kan biraa akka hin jirre nuti ni beeyna.
[5] Warri maqumaaf waaqayyolii jedhaman, samii keeysaa fi lafa irraas numa jiru; waaqayyoliinii fi gooftoliin akkasii tiis hedduu dha.
[6] Nuuf ammoo Rabbii tokkichaa tu jira; inni niis Abbaa, kan waan hundumaa uume, kan nuti isumaaf jiraannuusi. Akkasumatti ammaas, Gooftaa tokkichaa tu jira; inni niis Yesuus Kiristoos, kan wanti hundinuu isa keeysaan uumamaniini, nutiis isumaani jiraanna.
[7] Haa tahu malee, namuma hundaa tu beekumsa kana qaba jechuu miti; ammoo amma illee taanaan, namoonni hangi tokko waa'ee waaqayyolii tolfamoo kanneenii warri aadaa godhatan ni jiru. Kanaaf hogguu foon qalmaa san nyaatan akkuma waan waaqa tolfamaaf dhiheeyfameetti nyaatu; xalaliin isaanii tiis dadhabduu waan taateef jecha, haala kanaan ni najifamu.
[8] Nyaanni gara Rabbitti nu hin dhiheeysu; yoo nyaachuu baannees wanni nutti irratu, yoo nyaannees wanni nuuf dabalamu hin jiru.
[9] Ammoo mirgummaan isin qabdan kun, karuma taheen warra amantitti dadhaboo tahanitti gufuu akka hin taane qofa, irraa if eeggadhaa!
[10] Namtichi waa'ee tanaa laalchisuun xalaliin isaa dadhabduu taate tokko, suma kan beekumsa kanaa qabu, wayta sii galma waaqa tolfamaa keeysatti maadditti dhihaattee jiru arku, gochi kee kun namticha kana qalma waaqa tolfamaaf dhihaate akka nyaatuuf isa hin kakaasuu ree?
[11] Haala kanatti obboleeysi kee dadhabaan, kan Kiristoos du'eef beekumsa ati qabduuni dhabama.
[12] Haala kanatti, obboleeyyan keeysan irratti yakkitanii, xalalii isaanii dadhabduus madeeysuu keeysaniin, Kiristoos irrattiis yakka hojjattu.
[13] Eegasuu nyaata akkasitti dhihaachuun koo obboleeysa kiyya kan dileeysu yoo tahe, ani obboleeysa kiyya akkaan hin dileeysine, foon nyaachuun gonkumaa na irraa haa hafuu.