[1] Ammaas yaa obboleeyyan koo! Wangeelaan ani isinitti lallabe, kanuma isinuu fudhattanii, ittiin jabaattanii dhaabbattaniin saniin, isin yaadachiisuu barbaada.
[2] Qoowliin ani isinitti lallabe san jabeeysitanii yoo qabattan, wangeela kanaan, najaa dha baatu, yoo amantiin teeysan bilaashuma taate malee.
[3] Waaniin anuu fudhadhee, dabarsee isiniifiis kanne, kan ammaas hundumaa irra caalu san, akka Barreeyfamni Qulqulluun jedhutti, Kiristoos dilii teenyaaf jecha du'ee ti jira.
[4] Niis ni awwaalame, Barreeyfamni Qulqulluun akka jedhutti guyyaa sadaffaattiis du'aa kaafamee ti jira.
[5] Inni Phexiroositti mullate, eegasii barattoota kudha lamaan keeysaa warra hafanitti mullate.
[6] Kana booddee bakka takkatti amantoota warra dhibba shan caalanitti mullate; isaan keeysaa hangi tokko aakiramanii ti jiru, garri irra caalu ammoo amma illee warra lubbuun jiru.
[7] Eegas Yaaqoobitti mullate, booddee ammaas warra ergamoota jedhaman hundumatti mullate.
[8] Hundumaa booddee, ana nama wayta malee dhalateef illee mullatee ti jira.
[9] Ani kunoo, ergamoota hundumaa irra gad aana; waldaya Rabbitti roorrisee waaniin reebeef jecha, “Ergamaa” jedhamee yaamamuuf ani nama gahuu miti.
[10] Amma ammoo ni'imaa Rabbii tiin ani ergamaa tahe, ni'imaan inni anaaf kannees, odoo faaydaa hin kannin hin hafne. Ani nama isaan hunda irra caalatti itti ta'abee hojjate; tanaas anuma odoo hin tahin, ni'imaa Rabbii tan anaa wajjiin jirtuu tu dalage.
[11] Hogguus, ana tahuus yookiin isaan tahaniis, kanuma lallabne, kanuma kan isiniis amantan.
[12] Kiristoos warra du'an keeysaa kaafamuun isaa eega lallabame, isin keeysaa hangi tokko, “Warri du'an, du'aa ka'uun hin jiru” akkamitti jechuu dandayu?
[13] Warri du'an, du'aa ka'uun hin jiru taanaan, eegasuu Kiristoosuu du'aa hin kaafamne jechu.
[14] Kiristoos du'aa kan hin kaafamin yoo tahe, lallabuun teenyaas faaydaa hin qabu, amantiin teeysaniis gatii hin qabdu.
[15] Tana qofaa miti, nutuu warri Rabbi Kiristoos du'aa kaasee ti jira jenne, kijibaan Rabbiif ragaa baanee arkamnee ti jirra jechuu dha; yoo inni dhugumaan Kiristoos du'a keeysaa kan hin kaasin taate, warri du'aniis du'aa hin kaafamne jechuu dha.
[16] Warri du'an, yoo du'a keeysaa kaafamuu baatan, eegasuu Kiristoosiis du'aa hin kaafamne jechuu dha.
[17] Kiristoos du'aa hin kaafamne taanaan, amantiin teeysaniis bilaashuma, diliin teeysaniis ammuma illee isin irra jirti.
[18] Akkana taanaan ammoo, warri Kiristoositti amananii aakiraman, dhabamuu isaanii ti.
[19] Jireenyuma ammaa kan biyya addunya irraa kanumaaf jennee, warra Kiristoos abdanne yoo taane, nuti, warra namoota hundumaa irraa huu nama naasisu taana.
[20] Amma ammoo, Kiristoos warra du'an keeysaa kaafamuun isaa mirkana tahee ti jira, warra aakiraman keeysaa ka'uun isaa tu kan jalqabaa tahe.
[21] Duuti karaa nama tokkoo tiin eega dhufte, warri du'an kaafamuuniis karaa nama tokkoo tiin dhufe.
[22] Akkuma Addaamiin namoonni hundinuu du'anitti, akkasumatti ammaas Kiristoositti amanuun namoonni hundinuu jiraatoo ni tahu.
[23] Kun hundinuu akka faraqaa isaaniif qophaawetti tahu; Kiristoos hunda dura ka'ee ti jiraataa dha tahe, itti aansee warri kanneen Kiristoos tahaniis, hogguu inni deebi'ee dhufu ni jiraachifamu.
[24] Kiristoos gooftummaa hunda, amrii hunda, humna hundaas dhabamsiisee, mootummaa dabarsee Rabbi Abbaatti eega kanne booddee dha xumurri taha.
[25] Rabbi diina isaa hunda hanga miillan isaa jala kaayuufitti, Kiristoos mootomu qaba.
[26] Hundumaa booddee, diinni dhabamsiifamu du'a!
[27] Barreeyfamni Qulqulluun, “Rabbi waan hundumaa miillan isaa jala galchee ti jira” jedha. “Waan hundumaa miillan isaa jala galchee ti jira” wayta jedhu, Rabbi, inni waan hundumaa miillan Kiristoos jala galche, ifiif ammoo miillan jala akka hin galin beekamaa dha.
[28] Hogguu wanni hundinuu raawwattee amrii isaa jalatti galte booddee, Ilmi ammaas ifuma isaa tuu, Rabbi kan waan hundumaa miilla isaa jala galche jala if galcha; akkasitti Rabbi karaa hundumaanuu waan hundumaa irra aana.
[29] Yoo warri du'an gonkumaa du'aa hin kaafaman taate ammoo, namoonni warra du'aniif bakka bu'uun cuuphaman maal ma'anaa qaba? Maaliif isaaniifiis cuuphaman?
[30] Nutiis taanaan, maaliif wayta hundumaa haala jireenya keenyaaf sodaachisu jala jiraanna?
[31] Yaa obboleeyyan koo, ani guyyuma jiru hundumaa, fuula du'aa duraan jiraadha; tanaas Kiristoos Yesuus Gooftaa keenya keeysatti, waaniin isiniin dhaadadhuuf jechaan isinitti hima.
[32] Akkuma jecha Banii Aadamitti yoon fudhadhe, Efesoon keeysatti bineensaan wal loluun kiyya, faaydaa maali anaaf qaba ture? Warri du'an kan hin kaafamne yoo tahe, akkuma warra kaanitti, “Boru waan duunuuf jecha, koottaa haa nyaannuu, haa dhuynuusi!” jenna.
[33] Hin gowwoomfaminaa! “Nama hamaa saahibuun, amala gaarii dha balleeysa”.
[34] Qalbii teeysan wal bira guutuu qabaadhaa! Dilii irraa hiis if qusadhaa! Isin keeysa warri Rabbi hin beeyne ni jiru; kanaafiin isin qaanfachiisuuf jechaan tana isiniin jedha.
[35] Namoonni tokko tokko, “Warri du'an akkamitti kaafamu? Hogguus qaama akkam qabaatu?” jedhanii ni gaafatu taha.
[36] Ati yaa gowwaa! Wanti ati facaaftu sun ifii yoo duute malee, biqiltee jiraachuu hin dandeeysu.
[37] Shanyiin qamadii yookiin tan midhaan biraa, tan ati facaaftu san mixiree isaa qofa malee, soomayyoo meeyree mullachuuf deemuu miti.
[38] Rabbi ammoo akkuma fedhetti soomayyoo ni kannaaf; eeynaa shanyii hundumaa tiif adduma addaan soomayyoo addatti kannaafi.
[39] Foon hundinuu gosa tokkoo miti; foon namaa gosa tokko, foon horii gosa biraa ti, foon shimbirroo tiis gosa biraa ti, foon kalluunaa tiis gosa biraa ti.
[40] Falakni qaama warra samii keeysaa jira, falakni qaama warra lafa irraa tiis jira; ulfinni qaama warra samii keeysaa gosa tokko, ulfinni qaama warra lafa irra jiraatanii gosa biraa ti.
[41] Aduun walaqqisa tokko qabdi, jiini kan biraa ti; urjiiniis kan biraa ti; urjiin takka urjii taan irraa walaqqisa addaa ti qabdi.
[42] Haaluma kanaan warri du'aniis kaafamu; qaama baduu tu awwaalama, qaama hin badnee tu kaafama.
[43] Gadi-galummaan awwaalama, ulfinaan kaafama; dadhabummaan awwaalama, humnaan kaafama.
[44] Qaama jasadaa tu awwaalama, qaama ruuhaanii tu kaafama; qaamni jasadaa eega jiraate, qaamni ruuhaanii tiis ni jira.
[45] Barreeyfamni Qulqulluun, “Addaam duraa uumaa jiraattuu dha tahe; Addaam lammaffaan ammoo, ruuhaa jireenya kannu tahe” jedha.
[46] Qaama ruuhaanii tii miti, kan dura dhufe, qaama jasadaa ti malee; achi booda qaamni ruuhaanii dhaa.
[47] Addaam duraa, dachii irraa waan uumameef, nama biyyee ti; Addaam lammaffaan ammoo nama samii irraa ti.
[48] Warri addunyaa irraa, akkuma namticha biyyee lafaa irraa uumamee sanii ti; warri samii dhaa, akkuma namticha samii irraa dhufee sanii ti.
[49] Bifa namticha biyyee lafaa akkuma fudhannetti, akkasumatti ammaas bifa namticha samii irraa dhufee fudhachuuf deemna.
[50] Yaa obboleeyyan koo, jasadaa fi dhiiyni Mootummaa Rabbii dhaaluu hin dandayan; ammaas wanni baduus waan hin badne dhaaluu, akka hin dandeenyeen isinitti hima.
[51] Hiccitii takkaan isinitti himaa tii dhaggeeyfadhaa; hundi keenyaa huu ni jijjiiramna malee, hunduma keenyaa tu du'a jechuu miti.
[52] Garriin dhuma boodaa wayta afuufamtu, hanguma liphuu ijaa takkatti ni jijjiiramna; xurumbaan ni afuufamti, warri du'aniis bifa hin badneen ni kaafamu.
[53] Wanni badaa waan hin badne, wanti duutuus waan hin duune uffachuu dha qaban.
[54] Wanni badaa waan hin badne, wanti duutuus waan hin duune hogguu uffatan, eegas wanni Kitaaba keeysatti barreeyfame, “Duuti injifannoon liqimfamti”
[55] ammaas, “Yaa du'a, injifannoon tee mee eeysa jirti? Summiin tee tiis meerre yaa du'a?” jedhamee barreeyfamee ti jira.
[56] Summiin du'aa dilii dha; humni ti dilii tiis seera.
[57] Ammoo Rabbi, kan Gooftaa keenya Yesuus Kiristoos keeysaan, injifannoo nuuf kannuuf galanni haa tahu.
[58] Eegasuu, yaa obboleeyyan koo jaalatamo, jabaadhaa dhaabbadhaa! Wanni takka illeen isin hin sossoosin. Laffaatiin teeysaniis Gooftaa biratti bilaash akka hin tahin beeytanii, hoggayyuu hojiin Rabbii isiniif haa hoddommaattu!