[1] Amma gara gaaffii isin naaf barreeysitanii yoon deebi'e, dhiirti odoo dubartii tuquu baatte gaarii dha.
[2] Fitinaan zinaa dhaa waan hoddommaateef jecha, dhiirti matumatti jaartii haa qabaattuu, dubartiiniis matumatti jaarsa haa qabaattuu.
[3] Jaarsi haqa jaarsummaa dhaa jaartii isaa tiif haa godhuu, haaluma kanatti jaartiiniis jaarsa isii tiif haa gootuu.
[4] Jaartiin qaama isii irratti ajajuu hin dandeeysu, jaarsa isii tu qaama isii irratti ajaja malee; jaarsi niis qaama isaa irratti ajajuu hin dandayu, jaartii isaa tu irratti ajaja malee.
[5] Wayta gabaabaa kadhataaf if kannuuf irratti walii galtan qofa malee, walitti idaa'amuu wal hin didinaa; kadhata booddee if qabuu dadhabuu keeysaniin, Sheeyxaanni akka isin hin fitinneef, ammaas deebi'aa tii walitti idaa'amaa.
[6] Tana jechuun kiyya akka ajajatti odoo hin tahin, gorsumaafiin dubbadhe.
[7] Ani illeen silaa namoonni hundinuu fuudhuu dhiisanii akkuma kiyya tahaniiniin jaaladhaan ture. Haa tahu malee, namayyuu adduma addaani kannaa Rabbi isaaf kanne qaba; inni tokko kannaa akkanaa ti, inni kaaniis kannaa akkasii ti qaba.
[8] Warra hin fuudhiniin, ammaas warra gursumeeytootaan, akkuma kiyyatti odoo jiraatanii isaaniif irra wayyaa dhaan jedha.
[9] If qabuu yoo dadhaban ammoo haa fuudhanii, haa heerumaniisi; si'oo shahawaa tiin gubachuu mannaa, haa fuudhanii, haa niis heerumanii.
[10] Warri wal fuudhan akka gargar hin baaneen ajaja; kanaas Gooftaatu ajaje malee anaa miti; jaartiin jaarsa isii tii irraa gargar hin bahin!
[11] Yoo jaarsa isii irraa gargar baate ammoo, odoo hin heerumin haa teeysuu, yookaan ammoo jaarsa isiititti haa araaramtuu; jaarsi niis jaartii isaa hin arihin!
[12] Warra hafan kaaniif ammoo Gooftaa odoo hin tahin, gorsa koo tiin kannaafi; namtichi amantii kiristaanaa qabu tokko jaartii hin amanin yoo qabaate, isiiniis jaarsa isii saniin wajjiin jiraachuu yoo barbaadde, inni isii hin hiikin!
[13] Dubartiin amantii kiristaanaa qabdu takka, jaarsa hin amanin yoo qabaatte, inni niis jaartii isaa sanii wajjiin jiraachuu yoo barbaade, isiin namtichaan wal hin hiikin.
[14] Jaarsi hin amanin, karaa jaartii isaa tan amantuun, Rabbi biratti fudhatamaa dha; jaartiin hin amanin, karaa jaarsa isii kan amanuun, Rabbi biratti fudhatamtuu dha. Silaa akkana tahuu baatee, joolleen teeysan Rabbi biratti fudhatamoo hin turre, amma ammoo eeybifamoo dha.
[15] Isin keeysaa kan hin amanin wal hiikkaa yoo filate ammoo, gargar bahuu ni dandaya; haala akkanaa kanatti dhiiraas haa tahu, dubartiin amanan seerri fuudhaa isaan hin hidhu; Rabbi nagayaan akka walii wajji jiraannuuf nu yaame.
[16] Ati yaa niitii kiristaana! Jaarsa kee gara amantitti akka fidduuf tahu illee akkamitti beeyta? Atiis yaa abbaa warraa kiristaana! Jaartii tee gara amantitti akka fidduuf tahu illee akkamitti beeyta?
[17] Namni hundinuu adduma addaan akka Gooftaan isaaf qoodee kannetti, haaluma akka wayta Rabbi isa itti yaame sanitti itti furee haa jiraatuu; kuni seeraan ani waldayoota kiristaanaa hundumaa fuu gadi dhaabu.
[18] Namni dheeyna qabatee yaamame, akka waan dheeyna hin qabatinii if hin godhin; namtichi odoo dheeyna hin qabatin yaamamees, dheeyna qabachuu hin baddin!
[19] Amriilee Rabbii eeguutu faaydaa qaba malee, dheeyna qabachuun yookiin dheeyna qabachuu dhaabuun faaydaa hin qaban.
[20] Namni adduma addaan haala Rabbi itti isa yaame keeysatti haa sabatuu.
[21] Rabbi hogguu si yaame gabrummaa jala turtee? Tuni sin dhibin! Bilisummaa arkachuu yoo dandeeyse ammoo, mirga san arkachuuf tattaafadhu.
[22] Namtichi gabra tahee odoo jiruu waamicha Gooftaa arkate, inni nama Gooftichaan bilisa baafame; akkasumatti ammaas namni bilisa tahee odoo jiruu yaamamees, inni Kiristoosiif gabricha taha.
[23] Rabbi gatii dhaan isin bite, kanaaf jecha namootaaf gabra hin tahinaa!
[24] Yaa obboleeyyan koo, namni hundinuu adduma addaan haala waamicha itti yaamame keeysatti sabatee Rabbii wajjiin haa jiraatuu.
[25] Waa'ee warra dadara qeerroo tii fi dubra bikrummatti jiraatanii laalchisuun, Gooftaan amrii anaaf hin kannine; haa tahu malee, akka nama araara Gooftaa arkatee amanamaa tahe tokkotti, waa'ee isaanii irratti yaadaan ani ifii qabuun kanna.
[26] Haala rakkoo dhufa jirtuu tana keeysatti, namni odoo hin fuudhin niis hin heerumin akkuma jirutti odoo hafee gaarii dha natti fakkaata.
[27] Ati niitii fuutee ti jirtaa? Eegasuu wal hiikuu hin kajeelin! Niitii hin fuunee? Eegasuu niitii fuudhuu hin kajeelin!
[28] Haa tahu malee, yoo fuute fuuni dilii sitti hin tahu; dubri birkaaniis yoo heerumte, heerumuun dilii itti hin tahu. Warra fuudhanii fi warra heeruman ammoo, rakkina hedduu tu jireenya isaanii keeysatti isaan mudata; ani ammoo rakkina kana isin hanqisuu dhaan barbaade.
[29] Yaa obboleeyyan koo, waytiin herregamte tun hedduu gabaabbatee ti jirti jechuu koo ti; asii achi warri kanaan dura jaartii qabaachaa turaniis, akka waan hin qabaatinii haa tahanii.
[30] Warri booyan akka warra hin booyinii, warri gammadan akka warra hin gammadinii, warri bitan akka warra qabeenya hin qabnee haa tahanii!
[31] Warri waan biyya addunyaatti haajaa bahan, akka warra itti haajaa hin bahinii haa tahanii! Biiyti addunyaa dhaa tan amma mullattu tunis dhabamuuf teeysi.
[32] Waan biyya addunyaa tana fardeeyfachuu dhiiftanii, akka jiraattaniin isin irraa barbaada. Namni hin fuudhin Gooftaa gammachiisuuf jecha hojii Gooftaa ti fardeeyfata.
[33] Namni fuudhe ammoo, jaartii isaa gammachiisuuf jecha waan biyya addunyaa ti fardeeyfata.
[34] Yaadni isaa tiis gargar hiramaa dha; dubartiin hin heerumin yookiin dubri birkaan, jasadaa fi ruuhaa isii tiis guutumatti if kannitee, hojii Gooftaa ti fardeeyfatti; tan heerumte ammoo, jaarsa isii gammachiisuuf jecha waan biyya addunyaa ti fardeeyfatti.
[35] Kanaas isinuma gargaaruuf jechaan dubbadhe malee, haada isinitti gabaabsuufii miti; isin jireenya qaceelaa, qalbii takkaan itti furtanii Gooftaa akka kaadamtaniin hawwa.
[36] Namni tokko fuudha gahee, qaadhimaa isaa birkaa fuudhuu dhiisuun isaaf akka waan isii irratti daba hojjatee yoo itti fakkaate ammoo, fuudhuun isaa tiis waan hin hafne eega taate, akkuma itti fakkaate haa godhuu; akkas godhuun isaa tiis dilii isa irratti hin taatu.
[37] Namtichi ammoo qalbii isaa keeysatti dirqamuun maletti dardara qeerroo tahuuf murteeyfate, kan si'oo fedha jasada isaa irraa if qabuu dandaye, inni nama yaada isaa garumaan murteeyfate, yoo qaadhimaa isaa dubrummatti dhiise, waan gaarii dalage.
[38] Eegasuu namni intala qaadhimate fuudhu gaarii dha godha; inni intala qaadhimate fuudhuu dhiisee qeerrummaa filatuus irra caalaatti gaarii dha godha.
[39] Jaartiin takka hanga jaarsi isii lubbuun jirutti seera fuudhaa heerumaa tiin, isatti hidhamtee ti jiraatti. Eega jaarsi isii du'e ammoo, abbaa feete heerumuu ni dandeeysi, ammoo nama amantitti haa heerumtuu.
[40] Haa tahu malee, silaa akka yaada kiyyaatti odoo isiin heerumuu baattee gammachuu caalu arkatti. Waytaan tana jedhuus Ruuhaan Rabbii akka anaan wajji jiruun hubadha.