[1] Aniis bilisumaa mitii? Aniis ergamaa dhaa mitii? Ani hoo Gooftaa keenya Yesuus hin agarree? Isiniis, hojiin ani Gooftaa dhaaf hojjadhe irraa faaydaa arkamtanii mitii?
[2] Warra biraa tiif illee ergamaa tahuu yoon baadhe, isiniif ergamaa tahuun kiyya mirkana; bar isin Gooftaa keeysatti sumuda ergamummaa kiyyaa tii.
[3] Warra ana irratti dubbii qabaniifiis, kun jawaabaan ani ittiin falmadhuu dha.
[4] Waan nyaannuu fi waan dhuynu arkachuuf nuti mirga hin qabnuu ree?
[5] Akka ergamoota warra kaanii, akka obboleeyyan Gooftaa, akka Keefaattiis, niitii amante if wajjiin fuunee, bakkayyu deemuuf, numaa tu mirga hin qabnee?
[6] Yookiin anumaa fi Baarnaabaasuma qofaafi, biddeena keenyaaf hojjachuun nu barbaachisee?
[7] Namni loltuu tahee ramadamee tajaajilu tokko, kan horii isaa tiin if hadhaadhiyyu eenyu? Namni inaba dhaabee, firii inabtichaa hin nyaanne eenyu? Namtichi horii tiysu, kan aanan horii sanii hin dhuyne jiraa?
[8] Ani hogguun akkana jedhu, yaaduma namaa irratti irkadhee tii tana jedhaa? Seerri niis tanuma jedhaa mitii?
[9] Seera Musee keeysatti, “Haraashii midhaan tumaa jirtu afaan isaanii hin hidhinaa!” kan jedhu barreeyfamee ti jira; eegasuu, Rabbi haraashootuma qofaafi yaadaa?
[10] Kana jechuun isaa walumaa galatti numaaf jechuu isaa tii mitii? “Namtichi ooyiruu qotuu fi kan midhaan tumuus waan oomishamu irraa hirmaachuuf abdata” kan jedhu numaaf jecha barreeyfame.
[11] Nuti shanyii ruuhaa dhaa isin jiddutti facaafnee ti jirra; waanuma jireenya jasadaa tiif tahu isin irraa arkachuun keenya nutti guddatinnaa laata?
[12] Warri biraa waan akkasii isin irraa eeggachuuf mirga yoo qabaatan, nuti ammoo mirga san irra caalu qabaachuu tu nu irra turee mitii? Nuti bar mirga kanatti illee haajaa bahuu hin barbaannee; kanaa mannaa, gufuu takka illee karaa Wangeela Kiristoos irra akka hin keenyeef jecha, nuti waa hundumaa huu obsaani dandeenye.
[13] Warri Beeytal Maqdas keeysa tajaajilan, nyaata isaanii Beeytal Maqdas irraa akka arkatan hin beeytanii? Warri bakka aarsaatti kaadamaniis waanuma aarsaatti dhihaate san irraa akka hirmaatan hin beeytanii?
[14] Haaluma kanatti warri Wangeela lallabaniis, nafaqaa isaanii Wangeeluma san irraa akka arkatan Gooftaanuu ajajee ti jira.
[15] Ani ammoo mirgoota kanneen keeysaa tokkotti illee haajaa hin baane. Amma illee taanaan waan kanneen akka anaaf gootaniif abdachaa barreeysuu kiyyaa miti; kanaan akkaan hin dhaadanne na dhoorkuu mannaa, du'uu tu irra naaf wayyaa dha.
[16] Tahu illee, Wangeela lallabuun dirqama kiyya waan taheef jecha, waytaan isa lallabu dhaadachuu hin dandayu; Wangeela yoon lallabuu baadhe ammoo, anaaf magan!
[17] Fedhuma kiyyaan odoon Wangeela lallabee, ujuraan qabaan ture; ammoo, fedhaan malee yoon hojjadhe, dirqamuma imaanaa natti kannamtee qofaan baha.
[18] Eegasuu ujuraan tiyya maali? Ujuraan tiyya, Wangeela hogguun lallabu, mirgaan faaydaa irraa arkachuuf qabu dhiisee, bilaashumatti lallabuu dha.
[19] Ani namayyuu jalaa bilisa tahu illee, isaan keysaa hanguma tokko illee gara amantitti fiduuf jecha, namayyuu fuu gabraan if godha.
[20] Yihudoota biratti, Yihudoota amansiisuuf akka Yihudootaa tiin tahe; warra seera jala jiran birattiis, ifii kiyyaa seera jala jiraachuu baadhu illee, warra seera jala jiran fudhachiisuuf jecha, akka nama seera jala jiruu tiin tahe.
[21] Warra seeraan ala tahan birattiis, warra seeraan ala tahan amansiisuuf jecha, akka nama seeraa ala tahee tiin if godhe; haa tahu malee, ani seera Rabbii irraa ala odoon hin bahin, seera Kiristoos jalaan jira.
[22] Warra dadhaboo birattiis, isaan amansiisuuf jecha dadhabaan tahe; karuma dandayame hundumaan, namuma muraasa yoon najaa baaseef jecha, nama hundumaaf waa hundumaa if godhee tiin jira.
[23] Eeyba Wangeelaa irraa qooda hirmaachuuf jechuufiin, kana hundumaa huu Wangeelaaf jecha godhuu kiyya.
[24] Warra fiigichaan qotaa walitti godhan hunda keeysaa, namnummaan tokko qofa akka badhaasa arkatu hin beeytanii? Isiniis akka nama badhaasa arkachuuf fiigutti fiigaa!
[25] Namoonni namoota biraa tiin wajji dorgomuuf qophaawan, naamusa cimaa dhaan waan hundumaa irraa if eeguu dha qaban. Akkanaas wanni godhaniif, gonfoo umrii hin qabne arkachuuf jecha; nuti ammoo gonfoo ilaa-abad arkachuuf tattaafanna.
[26] Kanaaf jecha ani akka nama akeeka hin qabnetti hin fiigu; lolli kiyyaas akka nama qilleensa dummucuu tii miti.
[27] Ani warra biraatti Wangeela eegaan lallabe booda, ani mataan koo tuu, badhaasa irraa akkaan hin hambifamneef, qaama kiyya adaba itti qoree tiin oggolchiifadha.