[1] Amma ammoo zinaa, tan akka saba qomoo Israa'el hin tahinii keeysatti illee hin arkamnee tu, isin jiddutti arkama jechuun gabaasamee ti jira; tuniis nama aayyadaa isaatti niitummaaf itti galuu tu isin jiddutti arkama jechama!
[2] Isiniis tana irratti if dhaadachuu mannaa, garaan boochanii, nama waan akkasii dalage kana, isin keeysaa akka baafamu godhuun isin irra hin turree?
[3] Qaamaan yoon isin irraa fagaadhe illee, ruuhaan isin wajjiiniin jira; akkuma nama isin bira jirutitti if lakkaawee, namticha waan akkasii dalage irratti yakka muree tiin jira.
[4] Wayta isin maqaa Gooftaa keenya Yesuusiin, dubbii namticha kanaa irratti walitti qabamtan, aniis ruuhaan isin wajjiiniin jira, humniti Gooftaa keenya Yesuusiis isiniin wajji jirti!
[5] Akkana waan taheef jecha, guyyaa Gooftaa Yesuusitti ruuhaan namticha kanaa eewalamuu akka dandayuuf, jasadni isaa dilaawaan akka dhabamuuf, Sheeyxaanatti dabarsaa tii isa kannaa!
[6] As irratti if dhadhaadachuun keeysaniis gaarii miti; rushiin xiqqoon qooshaa hunda akka bukeeysitu hin beeytanii?
[7] Qooshaa maattiraa ti tan rushii hin qabne akka taataniif jecha, rushii moofaa isin keeysa jirtu baasaa tii darbaa! Kiristoos Hoolaan Bira Dabruu, aarsaa nuuf tahuu isaa tiin isiniis dhugumaan qooshaa haaraya taatan.
[8] Eegasuu koottaa mee, biddeena rushii dullattii, jechuun rushii hammeenyaa fi sharrii qabduun odoo hin tahin, ammoo biddeena maattiraatti kan rushii moofaa hin qabneen, kuniis xaliilummaa fi dhugaan haa ayyaaneeyfannuu.
[9] Xalayaan isiniif barreeyse keeysatti warra zinaa godhan wajjiin saahiba akka hin taane isinitti himee tiin jira.
[10] Dhaamsi kiyyaas namoota zinaan jiraatanii wajjiin saahiba akka hin taane hubachiisuufi malee, walumatti qabaatti warra addunyaa tana keeysaa kan zinaa godhan yookiin warra bololoo yookiin warra malaan-nyaatoo yookiin warra waaqayyolii tolfamaniif sagadan irraa baqadhaa jechuu kiyyaa miti; akkas taanaan, biyyuma addunyaa keeysaa huu bahuu tu isin irra jira ture jechuu dha.
[11] Amma ammoo wanniniin isiniif barreeysu, nama ani kiristaana ifiin jechaa dhaa, ammoo zinaa godhu, bololaa, waaqa tolfamaaf kan sagadu, maqa-balleeyso, farshaanaa, malaan-nyaataa, warra badiin kanneen fakkaatan irratti arkamaniif saahiba hin tahinaa, ammaas wajjiiniis hin nyaatinaa jechuu kiyya.
[12] Namoota waldaya kiristaanaa keeysa hin jirre irratti firdii godhuun wahi hojii tiyyaa? Warra waldaya kiristaanaa keeysa jiranitti firdii godhuun ammoo hojii teeysanii mitii ree?
[13] Kitaabni Qulqulluun, “Nama hamaa hojjatu if keeysaa baasaa!” jedha; warra waldaya keeysa hin jirretti ammoo Rabbii tu farada.