[1] Isin keeysaa namni kiristaanaa tokko obboleeysa tokkoon wajjiin yoo wal-dhabbii qabaate, amantoota duratti dubbii laalchisuu irra, akkamitti mana marrii seeraa warra kiristaanaa hin tahinitti geeysuuf ija jabaatee kaka'a ree?
[2] Kiristaanonni biyya addunyaa irratti akka firdii godhuuf taa'an, isin hin beeytanii? Isin warra biyya addunyaa irrattuu firdii godhu taatanii, ammoo isin dubbii xiqqoo tana laaluu tu isin dhibee?
[3] Nuti maleeykoota Rabbitti firdii godhuuf akka teenyu hin beeytanii? Eegasuu haajaa jireenya biyya addunyaa tana irratti hangam caalchifnee firdii itti haa goonu ree!
[4] Eegasuu wal-dhabbii akkasii tuu yoo qabaattan, dubbii akkanaa warra waldaya keeysa hin jirretti firdiif dhiheeysituu?
[5] Tana isin if qaanfachiisuufiin barreeyse; dhugumaan, namni beekaan tokko, kan dubbii obboleeyyan jiddutti ka'u irratti firdii kannuu dandayu, isin keeysaa akkamitti dhabamuu dandaya?
[6] Akkana tahuu dhabnaan ammoo, obboleeysi obboleeysa isaa tokko kasasee, fuula warra hin amaninitti geeysaa ree?
[7] Kissiin mana murtii seeraatti wal geeysuun keeysanuu, dadhabbii teeysan agarsiisa; akkana godhuu mannaa, dhiiftanii maaliif roorroo hin fudhanne? Maaliif namaaf gowwoomtanii hin dagamne?
[8] Isin kunoo, ifumaa fuu obboleeyyanuma keeysan warruma amanan irrattuu ni roorriftu, isaan ni saamtuusi.
[9] Irrattuu, namni jallaan mootummaa Rabbii akka hin dhaalle hin beeytanii? Hin gowwoominaa! Warri zinaa dalagu, warri waaqayyolii tolfamoo ibaadu, gumnaan, warri kajeellaa si'oo foonii jala qaban, warri dhiirran walitti ida'amaniis,
[10] warri hattuun, warri bololtuun, warri farshaanu, warri maqaa nama-balleeysu, warri saamtuuniis gonkumaa Mootummaa Rabbii hin seenan.
[11] Isin keeysaa hangi tokko warra akkasii ti turtan, amma ammoo dilii irraa dhiqamtanii, Rabbiif addatti qoodamtanii ti jirtu; maqaa Gooftaa Yesuus Kiristoosiin, Ruuhaa Rabbii keenyaa tiiniis warra qaceeloos godhamtanii ti jirtu.
[12] Isin, “Wanti hundinuu anaaf halaali” jettu; tahu illee ammoo, hundinuu faaydaa hin qabu; wanti hundinuu halaal tahu illee, ammoo waa takka illeen ana oggolchiisuufii miti.
[13] Isin, “Qochumaan nyaataafi, nyaanni niis qochumaafi!” jettu; Rabbi ammoo, lamaan isaanii tuu ni dhabamsiisa. Qaamni, Gooftaaf kanname malee, hojii zinaa tiif hin kannamne; Gooftaan qaama keenya kan dagatuu miti.
[14] Rabbi humna isaa tiin Goofticha du'aa kaasee ti jira; nuus akkasumatti humnuma isaa tiin du'aa nu kaasuuf taa'a.
[15] Qaamni keeysan dhagna qaama Kiristoos akka tahe hin beeytanii? Eegasuu dhagna qaama Kiristoos fuudhee, dhagna qaama gumnaa haa godhuu ree? Kun gonkumaa tahuu hin qabu.
[16] Yookiin namni gumnaa wajjiin walitti idaa'ame, isii wajjiin qaama tokko akka tahu hin beeytanii? Akkuma kitaaba keeysatti barreeyfamee jiru, “Isaan lachuu foon tokko tahu” jedha.
[17] Inni Gooftaa wajjiin walitti maxxane ammoo, tokkummaa ruuhaanii ti isaan wajjiin qabaata.
[18] Zinaa dalaguu fi gumnummaa irraa fagaadhaa! Dilii namni hojjatu keeysaa warri hafan kaan hundinuu qaama namaa irraa ala; namni zinaa dalagu ammoo, qaama isaa irratti dilii hojjata.
[19] Irrattuu qaamni keeysan, Ruuhal Qudus isin keeysa jiruuf, Beeytal Maqdas tahuu isaa hin beeytanii? Ruuhaa kanaas Rabbi biraa arkattan; isinuu kan ifii keeysanii tii miti.
[20] Rabbi gatii dhaan isin bitee ti jira; kanaaf jecha qaama keeysan durrii ulfina Rabbii tiif oolchaa!