[1] Yaa obboleeyyan koo, ani dhugumaan akkuma warra fooniititti, Kiristoositti amanuun akka amma dhalattuu daa'imaatti malee, akka warra ruhaaniititti isinitti dubbachuu hin dandeenye.
[2] Ani aananiin isin dheengiyye malee, isin nyaata jabaa dhaaf hin geenye turtan, ammuma illee taanaan huliidha, warra saniif qophooytanii miti.
[3] Isin kunoo, amma illee akka warra yaada jasadaa duukaa bu'anii ti; hinaaffaanii fi wal-dhabbiin eega isin jidduu jiraatan, isin warra yaada jasadaa duukaa bu'an tahuu keeysanii mitii ree? Akkaatuma yaada namummaatti jiraattu mitii?
[4] Isin keeysaa inni tokko, “Ani kan Phaawulosi”, inni kaan ammoo, “Ani kan Apholosi” jennaan, isin namuma jasadaa tahuu keeysanii mitii ree?
[5] Haa jennuu mee, Apholos kunuu maali? Phaawulos kuniis maali? Anaa fi inni niis warra kaadamoota gara amantitti isin yaame; adduma addaan Gooftaan akkuma akeekee nu ramadetti hojjanna.
[6] Ani niin dhaabe, Apholos bishaani obaase, ammoo Rabbumaa tu guddise.
[7] Rabbii guddisu san malee, inni dhaabuu fi kan bishaan obaasuus humaa keeysa hin jiran.
[8] Inni dhaabee fi kan bishaan obaasees akkuma tokko; adduma addaan akkuma dadhabbii isaaniititti miindaa isaanii ni fudhatu.
[9] Nuti hojii Rabbii keeysatti gola walii ti, isiniis ooyruu Rabbii ti, ammaas mana Rabbiin ijaaramuusi.
[10] Akkuma ni'imaa Rabbi biraa anaaf kannamtetti, akka najjaar beekamaa tokkootti ani bu'ura manni irratti ijaaramu kaayee tiin jira; namni biraa ammoo bu'ura kana irratti ni ijaara; namayyuu adduma addaan akkamitti akka irratti ijaaru itti haa yaaduu.
[11] Isuma dur kaayame san malee, nam tokko illeen bu'ura biraa kaayuu hin dandayu; bu'urri duraan kaayame saniis Yesuus Kiristoosuma.
[12] Namni ziqeeyaan, meetaan, dhagaa gatii qaalii tiin, mukaan, citaa dhaan yookiin qashaan bu'uricha irratti ni ijaara.
[13] Hojiin namaa adduma addaan ibiddaan zaahir tahee ti beekama, guyyaan firdii tiis ifatti ni baasa; hojiin namaa adduma addaan maal akka taate, ibiddi fitinee ti mullisa.
[14] Namticha wanni inni irratti ijaare, odoo hin gubatin hafeef, inni gatii isaa ni fudhata.
[15] Hojiin namtichaa yoo duraa gubatte ammoo, inni kasaaratti hafa; haa tahu malee, mataan isaa akka nama ibidda keeysaa baheetti ni eewalama.
[16] Isin Beeytal Maqdas Rabbii akka taatan, Ruuhaan Rabbii tiis isin keeysa qubatee akka jiru hin beeytanii?
[17] Namticha Beeytal Maqdas Rabbii diige, Rabbi ammoo isa ni diiga; Beeytal Maqdas Rabbii qulqulluu dha, Beeytal Maqdasumman sanuu isinuma.
[18] Nam tokko illeen if hin sobin! Namni isin keeysaa akka sadarkaa addunyaa tanaatti beekaa if seehu yoo jiraate, beekaa dhugaa tahuuf, gowwaa tahuu tu isa irra jira.
[19] Beekumsi biyya addunyaa tanaa Rabbi biratti gowwummaa dha. Kitaaba Qulqulluu keeysatti, “Inni warra beeytoota shaaxirummaa isaanii tiin isaan qaba,”
[20] bakka biraatti ammaas, “Yaadni warra beeytootaa maalaa-yaanii akka tahe Gooytaan ni beeka” jedha.
[21] Eegasuu namaan dhaadachuun haa hafuu; kunoo wanni jiraa hundinuu keeysanuma.
[22] Phaawulos taanaan, Apholosiis, Keefaaniis, biiyti addunyaa tiis, jireenyi niis, duuti niis, wanni amma jiruus, wanni dhufaa jiruus, walumatti qabatti, hundi isaanii tuu keeysanuma.
[23] Isiniis warra Kiristoosi, Kiristoosiis kan Rabbii ti.