[1] Jaalala akeeka jireenyaa godhattanii, kannaalee ruuhaanii, keeysumaa huu kannaa raajii dubbachuu akka arkattaniif, fardeeyfadhaa kajeelaa!
[2] Namni afaan haarayaan dubbatu, namni isa hubatu waan hin jirreef jecha, Rabbitti dubbata malee, namootatti hin dubbatu; ammoo ruuhaan geggeeyfamee, waan dhooysaa ti haasawa.
[3] Namni raajii himu ammoo, waldaya cimsuuf, gorsuu dhaaf, jajjabeeysuuf dubbata.
[4] Namni afaan haarayaan dubbatu, matuma isaa ti jajjabeeysa; inni raajii himu ammoo, waldaya kiristaanaa ti jajjabeeysa.
[5] Ammaas isin hundinuu afaan haarayaan akka dubbattaniin fedha. Irra caalchisee ammoo raajii akka himtaniin jaaladha. Nama raajii himuu tu, nama afaan haarayaan dubbatu irra caala, yoo namni tokko hiikee akkasitti waldayan kiristaanaa ittiin jajjabaatte malee.
[6] Yaa obboleeyyan koo, ani amma afaanuma haaraya dubbachuu qofaan, mullata irraa, yookiin beekumsa irraa, yookiin raajii irraa, yookiin barsiisa irraa waa takka illee odoon hin kannin, gara keeysan yoon dhufe, maalumaan faaydaa isiniif qaba?
[7] Meeshaan lubbuu hin qabne, warri akka uluullee tii fi kiraaraa illeen, muziiqaa addaa yoo dhageeysisuu baatan, namni maalummaa isii dhaa akkamitti beeka?
[8] Waamichi garrii yoo zaahiritti beekamuu baate, eenyuu tu lolaaf qophaawa?
[9] Isiniis akkasumatti, afaan haarayaan, waan namaaf hin galle yoo dubbattan, namni tokko illee nuu akkamitti waan dubbatame san hubachuu dandaya ree? Isiniis akkuma waan qilleensuma keeysatti dubbattanii ti taatu.
[10] Addunyaa tana keeysa, afaan adda addaa hedduun akka jiran beekamaa dha, ammoo isaan keeysaa jechi hiikaa hin qabne hin jiru.
[11] Afaan dubbatame tokko ani yoon beekuu baadhe, namticha afaan san dubbatu biratti, ani nama ambaa keeysummaa tahuu mudadha, namtichi afaan san dubbatuus ana biraatti amba keeysumma taha.
[12] Isiniis akkasumatti warri kannaalee Ruuhaa arkachuuf fardeeyfachaa eeggattan, waldaya kiristaanaa ijaaruuf tattaafadhaa.
[13] Kanaaf jecha, namni afaan haarayaan dubbatu, waan dubbate san hiikuu humna isa dandeeysiftu arkachuuf kadhatuu tu isa irra jira.
[14] Ani afaan haarayaan yoon dubbadhe, ruuhaan kiyya ni kadhata, qalbiin tiyya ammoo isa duukaa hin jirtu.
[15] Eegasuu maal godhuun qaba? Ani ruuhaan niin kadhadha, qalbii tiyyaaniis ammaas niin kadhadha; ruuhaan niin faarfadha, ammaas qalbii tiyyaaniis niin faarfadha.
[16] Eegasuu, ati ruuhaan Rabbi galateeyfannaa irra yoo jiraatte, namni keeysummaa kan dubbiin tun keeysi hin galiniif jiraannaan, wanni ati dubbattu isaaf waan hin galiniif, inni akkamitti galateeyfannaa tee tiif “Aammiin” jechuu dandaya ree?
[17] Ati akkuma gaaritti galateeyfachuun kee ni mala, ammoo namni hin hubanne humaa irraa hin fayyadamu.
[18] Ani hunduma keeysan irraa huu caalatti afaan haarayaan waaniin dubbadhuuf jecha, Rabbi niin galateeyfadha.
[19] Haa tahu malee, waldaya kiristaanaa keeysatti, afaan haarayaan jecha kuma kudhan dubbachuu mannaa, waan warra kaan barsiisuu dandayu, qalbii tiyyaan, jecha hiikaa qabu shan qofa, dubbachuu dhaan irra filadha.
[20] Yaa obboleeyyan koo! Sammuu dhaan warra bilchaatoo tahaa malee, akka daa'immanii hin tahinaa! Waan hamtuu dalaguu irratti ammoo akka sabiyyii tahaa.
[21] Seera keeysatti, “‘Namoota afaan biraa dubbataniin, afaan warra ambaa tiiniis, ummata kanatti niin dubbadha; hogguusuma illee taanaan isaan ana hin dhaggeeyfatan’ jedha Gooytaan” kan jedhu barreeyfamee ti jira.
[22] Kanaaf, afaan haarayaan dubbachuun, milikkita warra hin amaniniif kanname malee, kan warra amananiif kannamee miti; gara kaaniin ammoo raajii himuun warra amananiifi malee, warra hin amaniniifii miti.
[23] Waldayan guutuun walitti qabamee, amantoonni hundi niis afaan haarayaan yoo kan dubbatan taate, namoonni hiikaa waan dubbatamu kanaa hin beeyne, yookiin warri hin amanin yoo ol seenan, maraattanii ti jirtu isiniin hin jedhanii?
[24] Ammoo hundi keeysanuu raajii odoo himutti jiranii, namni hin amanin yookiin namni dubbii tana keeysa hin beeyne tokko yoo ol seene, wanni dubbatamu hundinuu isa tuuyxee badii isaa if irratti ni hubata, akka toowbatuus ni godhama.
[25] Hiccitiin garaa isaa keeysa jirtuus saaxil baati; namtichi niis hogguusuma adda isaa tiin lafa gahee, Rabbiif ni sagada, Rabbi dhugumaani isin jidduu jira jechuuniis ragaa dha baha.
[26] Eegasuu yaa obboleeyyan koo, maal haa jennu? Hogguu walitti qabamtan isin keeysaa tokko faarfannaa, tokko barsiisa, tokko mullata qaba; inni tokko afaan haarayaan dubbata, inni kaaniis hiikaa waan dubbatame sanaa ti qaba. Wanni isaan qaban kanneen hundinuu, waldaya kiristaanaa jajjabeeysuuf haa tahan!
[27] Namni afaan haarayaan dubbatu yoo jiraate, lama yoo hoddommaatees sadih qofa faraqatti haa dubbatanii; namni tokko ammoo waan dubbatame san hiikuun irra jira.
[28] Namni hiiku yoo jiraachuu baate ammoo, inni afaan haarayaan dubbatu sun, ifitti, Rabbittiis haa dubbatu malee, waldaya keeysatti hin dubbatin.
[29] Warri raajii himan, lama yookiin sadih tahanii haa dubbatanii, warri kaan waan dubbatame san duukaa bu'anii haa xiinxalanii.
[30] Warra achi tattaa'an keeysaa tokkoof mullanni yoo kannameef ammoo, inni duraan dubbachaa ture dubbii isaa haa dhaabuu!
[31] Hundinuu akka baratanii fi akka gorfamaniif jecha hundi keeysanuu faraqatti raajii himuu ni dandeeysu.
[32] Ruuhaan raajotaa warra raajotaaf eemarama.
[33] Rabbi, Abbaa nagayaa ti malee, inni Rabbii rabshaa tii miti. Kun akkaatuma haala qulqulloota waldaya kiristaanaa hunduma keeysaa ti.
[34] Dubartoonni walgahii waldayoota kiristaanaa keeysatti qooqa isaanii gadi haa qabatanii. Isaan dubbachuu hin qaban; akkuma seerrinuu jedhutti haa ajajamanii.
[35] Wanni isaan baruu barbaadan yoo jiraate ammoo, manatti jaarsa isaanii haa gaafatanii, dubartiin walgahii waldaya kiristaanaa keeysatti dubbachuun isiif safuu dha.
[36] Maal jechuu dha? Qoowliin Rabbii isin keeysaahi madditee baate moo? Yookiin isinuma qofa biraa kan qoowliin Rabbii geeyse?
[37] Nam tokko illeenuu, kan ani nabiyyii dha, yookiin ani kannaa Ruuhaa tiin qaba, jedhee if yaadu, wanniniin ani isiniif barreeysu kanneen, amrii Gooftaa dhaa tahuu isaanii beekee haa fudhatuu!
[38] Namtichi kana beekee hin fudhanne ammoo, inninuu fudhatama hin arkatu.
[39] Eegaa yaa obboleeyyan koo, raajii himuuf fardeeyfadhaa! Afaan haarayaan dubbachuus hin dhoorkinaa!
[40] Wanni hundinuu ammoo, qaanuunaa fi tartiibaan hojjatamuu tu irra jira.