[1] Yaa obboleeyyan koo! Abbootiin teenya hundinuu, utubaa duumeeysaa san jala akka turan, hundi isaanii tiis bahar keeysa akka dabran odoo hin beekin akka haftan hin barbaadu.
[2] Hundi isaanii tuu waara Musee tahuuf, duumeeysaa fi bahar keeysatti cuuphamanii ti jiru.
[3] Hundi isaanii soora ruuhaanii tahe tokkicha san irraa nyaatanii ti jiru;
[4] hundi isaanii dhugaatii ruuhaanii taate tokkittii san irraa dhuganii ti jiru; isaan siibaa ruuhaanii kan isaanii wajjiin deemaa ture irraa dhuganii ti jiru; siibaan suniis Kiristoosi ture.
[5] Haa tahu malee, Rabbi isaan keeysaa warra irra heddutti waan hin gammadiniif jecha, lafa huffee gammoojjii keeysatti dhuman.
[6] Amma gaa wanni kanneen, akka qalbiin teenya akkuma tan isaaniititti kajeellaa hamtuu jala hin deemne, if nu eeggachiisuufi akka fakkeenyatti kannaman.
[7] Isaan keeysaa namoonni hangi tokko, akka waaqayyolii tolfamoof sagadanitti, isiniis akkasuma hin tahinaa! Kitaaba keeysatti, “Ummanni nyaachuu fi dhuguuf gadi taa'ee ti, ragadaaf lafaa ka'e” jedha.
[8] Isaan keeysaa cinaan tokko ejjummaa fi zinatti if gadi dhiifnaan, guyyuma tokko keeysatti namoonni kumni diiydamii sadih irraa dhuman; nutiis akkas akka hin mudanne, koottaa ejjummaa fi zinaa irraa if haa eeynuu!
[9] Isaan keeysaa hangi tokko Gooytaa fitinanii bofaan akka karraqaman san, nutiis akkas akka hin taane Gooftaa fitinuu hin qabnu.
[10] Ammaas isaan keeysaa warri guunguman, maleeykaa nama balleeysuun akka turaabaman hubattanii, isiniis guungumuu irraa if qusadhaa!
[11] Wanni kanneen hundinuu isaan irra gahuun if nama eeggachiisuufi, ammoo nu warra zamaan aakir irra gaheef, waa irraa nu qaraasisuuf jecha barreeyfame.
[12] Kanaaf jecha, namnummaan jabaadhee dhaabbadhe ifiin jedhu, akka hin kufne if haa tiiysuu!
[13] Fitinaan namatti hin dhufin isin hin mudanne. Rabbiin amanamaa waan taheef jecha, waan humna teeysanii ol taheen akka fitinamtan isinitti hin dhiisu, ammaas fitinaa san keeysatti obsaan dhaabbachuu isin dandeeysisa, haa tahu malee ammaas fitinuma saniin wajjiinuu karaa keeysaa itti baataniis isiniif kanna.
[14] Kanaaf yaa saahibban koo, waaqayyolii tolfamoof sagaduu irraa fagaadhaa!
[15] Isin warra waa beekuttiin dubbadha; waaniin dubbadhu tana isinummaanuu mee miizaanaa!
[16] Geeba eeybaa kan nuti Rabbi eeybifannuuf kanaan, dhiiga Kiristoos irraa hirmaachuu keenyaa mitii? Biddeena kutannu kanaaniis, jasada Kiristoos irraa hirmaachuu keenyaa mitii?
[17] Biddeenni tokkuma waan taheef jecha, nama hedduu taanu illee nutiis qaamuma tokko, kuniis wanni taheef, hundi keenyaa huu biddeena tokkicha san irraa waan hirmaannuufi.
[18] Mee ummata Israa'el laalaa! Warri wareega dhihaatu san irraa nyaatan sun, bakka aarsaa irraa hirmaannaa ni qabu mitii?
[19] Eegasuu ani maal jechuu kiyya? Wareegni waaqa tolfamaaf dhiheeyfame ma'aana qaba, yookiin waaqa tolfamaa tu wahitti lakkaawama jechuu kiyya tahinnaa?
[20] Lakkii! Ummanni Rabbi hin beeyne, waan wareegaaf dhiheeysan ruuhaanota hamoofi malee Rabbiif hin dhiheeysan; ani ammoo akka isin warra ruuhaanota hamoo wajjiin hirmaattan hin barbaadu.
[21] Geeba Gooftaa tii fi ammaas geeba ruuhaanota hamoo keeysaa dhuguu hin dandeeysan; gabatee Gooftaa irraa ammaas gabatee ruuhaanota hamoo irraa hirmaachuus hin dandeeysan.
[22] Nuti Gooftaa hinaafsisuu dha barbaannaa? Nuti bar isa irra humna hin qabnuu! Ni qabnaa ree?
[23] Wanni hundinuu halaali, haa tahu malee, wanni hundinuu faaydaa qaba jechuu miti. Wanni hundinuu halaal tahu illee, hundinuu qaama hin ijaaran.
[24] Namayyuu waanuma isa qofaaf gaarii tahe odoo hin tahin, waan ollaa isaa tiifiis gaarii tahe haa yaaduu!
[25] Foon suguyyaa keeysatti gurguramu, gaaffii xalalii namaa tuuyxu odoo hin kaasin, nyaadhaa!
[26] Akkuma Barreeyfamni Qulqulluun jedhu, “Biiyti addunyaa tii fi wanni isii keeysa jiru hundi niis kan Gooytaa ti”.
[27] Namni kiristaana hin tahin tokko mana isaatti nyaataaf yoo isin yaame, isiniis dhaquu yoo barbaaddan, gaaffii xalalii tuuyxu odoo hin kaasin, waanuma isiniif dhihaate nyaadhaa!
[28] Namni tokko, “Kun wareega aarsaaf dhihaate” jedhee yoo isinitti hime ammoo, waa'ee namticha isinitti himeef jecha, xalaliis waan tuquuf hin nyaatinaa!
[29] Kuniis xalalii namtichaa akka hin tuuyneefi malee, xalalii teeysan jechuu kiyyaa miti; isin ammoo, “Eegasuu bilisummaan tiyya xalalii nama biraa tiin maaliif ittifamti ree?
[30] Ani Rabbi galateeyfadhee soora san irraa yoon hirmaadhe, nyaataan ani Rabbi itti galateeyfadheef, maaliif maqaan na bada ree?” jettee ni gaafatta taha.
[31] Kanaaf jecha, yoo nyaattaniis, yookiin yoo dhuydaniis, yookiin waanuma gootan hundumaa ulfina durrii Rabbii tiif godhaa!
[32] Warra Yihudootaatti, saboota biraatittiis, yookiin waldaya Rabbittiis taanaan gufuu hin tahinaa!
[33] Akkumaan ani waanumaan godhu hundumaanuu, nama hundumaa gammachiisuuf yaalutti; isaan akka najaa bahaniif jechaan, waan naaf faayadaa qabu odoo hin tahin, waan namoota hedduu fayyaduun barbaada.