[1] Yaa obboleeyyan koo! Waa'ee kannaa adda addaa kanneen Ruuhal Qudus kannuu, hubannaa akka dhabdan hin barbaadu.
[2] Isin wayta awaama turtan san haaluma haalaan karaa irraa mayxanii, waaqayyolii tolfamoo fi didaa hin dubbannetti akka geeyfamtan ni beeytu.
[3] Eegasuu wanniniin ani isinitti himu tana. Nam tokko illeen Ruuhaa Rabbii tiin geggeeyfamee “Yesuus abaarama” jechuu dandayu hin jiru; ammaas Ruuhal Qudusiin maletti nam tokko illeen “Yesuus Gooftaa” jechuus hin dandayu.
[4] Kannaan ruuhaa aaynaa adda addaa tu jira, Ruuhaan ammoo tokkuma.
[5] Tajaajila garaa garaa tu jira, Gooftaan tajaajilamu ammoo tokkuma.
[6] Hojii quduraa adda addaa tu jira, hojii quduraa kanneen hunda kan nama hojjachiisu Rabbi tokkuma.
[7] Kannaan ruuhaa adduma addaan kan nama keeysatti mullatan, guutummaa waldaya tiif faaydaa akka tahuuf kannaman.
[8] Isa tokkoof hikmaan dubbachuu tu ruuhaan kannameef, isa kaaniif ammoo beekumsaan barsiisuu tu ruuhaa sanumaan kannameefi.
[9] Kaaniif amantii tu ruuhaa sanumaan kannameefi, kaaniif ammoo kannaa warra dhukkubsatan fayyisuu tu ruuhaa tokkichuma saniin kannameefi.
[10] Kaaniif humna baasa hojjachuu dhaa, kaaniif raajii dubbachuu, kaaniif ruuhaanota gargar baasee beekuu, kaaniif afaan haarayaan dubbachuu, kaaniif afaan haaraya san hiikuu tu kannameefi!
[11] Kun hundinuu hojuma ruuhaa tokkichaa ti; inni niis namaaf adduma addatti akkuma ifii murteeysetti kannaafi.
[12] Kiristoosiis akka qaama tokko kan dhagna qaamaa hedduu qabuu ti; dhagni qaama sanii hedduu tahan illee, hundinuu qaamuma tokko tahu.
[13] Nuti Yihudoota taanuus, yookiin saboota biraa, gabra taanuus yookiin bilisa, hundi keenya qaama tokko tahuuf ruuhaa tokkoon cuuphamnee ti jirra, hundi keenyaa huu Ruuhaa tokko irraa akka dhuuynu godhamnee ti jirra.
[14] Qaamni tokko dhagna qaamaa hedduu dha qaba malee, dhagnuma tokko qofa irraa hii miti.
[15] Fakkeenyaaf miilli, “Ani harka waaniin hin tahiniif jecha, ani dhagna qaamaa tii miti” silaa waan jedhu taatee, kun harka dhagna qaama sanii tahuu irraa waan isa hanqisuu miti.
[16] Gurri niis, “Ani ija waaniin hin tahiniif, ani dhagna qaamaa tii miti” silaa waan jedhu taatee, kun gurra dhagna qaama sanii tahuu irraa waan isa hanqisuu miti.
[17] Silaa qaamni guutuun ijuma qofa tahee, maaliin dhagayuun dandayama? Guutummaan qaamaa gurruma qofa silaa tahee, maaliin fuunfachuun dandayama?
[18] Rabbi ammoo dhagna qaama keeysaa hundumaa huu, adduma addaan akkuma ifii barbaadetti, bakka isaatti tartiibaan qopheeyse.
[19] Qaamni hundinuu silaa dhagnuma tokko irraa tahee, guutummaan qaamaa eeysa jira?
[20] Akkaataa jiru irraa kaanaan, dhagni qaamaa hedduu tu jira, haa tahu malee qaamni tokkuma.
[21] Ijji niis harkaan, “Ati ana hin barbaachiftu” yookiin, mataan miillaniin, “Isin ana hin barbaachiftan” jechuu hin dandayan.
[22] Faallaan tanaa inumaatuu, dhagna qaamaa hunduma keeysaa, warra dadhaboo fakkaatanii tu barbaadamoo dha.
[23] Dhagna qaamaa warra tuffatamoo nutti fakkaataniifiis, irra caalatti ulfina kanninaafi; dhagna qaamaa keeysaa warra nu qaanfachiisaniif satirii addaa ti goonaaf.
[24] Warra satiriin hin barbaachifneef, satriin akkasii hin godhamtuufi. Rabbi ammoo dhagna qaama namaa walitti ijaaree ti, warra gad-aantiif kabajaa caalatu kanneefi.
[25] Kanaas wal diddaan qaama keeysa akka hin jiraanne, ammoo dhagni qaamaa hundinuu haala tokkotti akka waliif yaadaniif jechaafi tana godhe.
[26] Dhagna qaamaa keeysaa tokko yoo rakkate, warri kaan hundinuu isaan wajjiin rakkatu; tokko yoo kabajamees, warri kaan hundi niis isaan wajjiin gammadu.
[27] Amma gaa isin qaama Kiristoosi, adduma addaaniis dhagna qaama isaa ti.
[28] Rabbiis waldaya kiristaanaa keeysatti duraan dursee ergamoota, lammaffaa nabiyyoota, sadaffaa barsiisoota, booddee warra humna baasaa hojjatan, isaanitti aansee tiis warra dhukkubsattoota fayyisuuf kannaa qaban, warra namoota gargaaran, warra hojii bulchaa geggeeysan, warra afaan haarayaan dubbatan shuumee ti jira.
[29] Hundumaa tu ergamootaa? Hundumaa tu nabiyyoota? Hundumaa tu barsiisootaa? Hundumaa tu humna baasaa hojjataa?
[30] Hundumaa tu kannaa dhukkubsattoota fayyisuu qabaa? Hundumaa tu afaan haarayaan dubbataa? Hundumaa tu waan dubbatamees hiikaa?
[31] Isin ammoo kannaalee ol aantii tahan arkachuuf fardeeyfadhaa tii kajeelaa! Ani kunoo ammaas kan isaan kanneen hundumaa irra harka meeqa caaluun isin agarsiisa.