[1] Dha'icha sana booddee Waaqayyo Musee fi Ele'azaar ilma Aaron lubichaatiin,
[2] “Guutummaa waldaa Israa'el keessaa namoota waggaan isaanii digdama guutee fi warra digdamaa olii, Israa'el keessaa lola dhaquu kan danda'an hundumaa akka mana mana abbaa isaaniitti lakkaa'aa!” jedhe.
[3] Museenii fi Ele'azaar lubichi fuullee Yerikootti bukkee laga Yordaanos dachaa Mo'aab keessatti,
[4] akkuma Waaqayyo Musee abboometti, namoota waggaan isaanii digdama guutee fi warra waggaa digdamaa olii walitti in qaban; Israa'eloonni warri biyya Gibxii ba'an kanatti aananii kan jiranii dha.
[5] Ruuben, ilma Israa'el isa angafa; ilmaan Ruuben immoo warra kanatti aananii jiranii dha; Henok, abbaa qomoo Henokootaa ti; Faluu, abbaa qomoo Faluuwotaa ti;
[6] Hezron, abbaa qomoo Hezronootaa ti; Karmiin, abbaa qomoo Karmii'otaa ti.
[7] Isaan kun qomoowwan Ruuben; isaan keessaa warri lakkaa'aman kuma afurtamii sadii fi dhibba torbaa fi soddoma turan.
[8] Ilmi Faluu immoo Eliiyaab.
[9] Ilmaan Eliiyaab, Nemu'el, Daataanii fi Abiiram; Daataanii fi Abiiram kun warra Musee fi Aaroniin mormanii dha; akkasumas yeroo Qoraahii fi gareen isaa Waaqayyoon morman isaan keessa turan.
[10] Yommus lafti banamee Qoraahii wajjin isaan in liqimse; warri garee Qoraahi immoo yeroo ibiddi namoota dhibba lamaa fi shantama fixe dhuman; kanaanis isaan milikkita namoonni ittiin of eeggatan ta'an.
[11] Haa ta'u iyyuu malee, ilmaan Qoraahi hin ajjeefamne.
[12] Ilmaan Shimi'oon akka qomoo qomoo isaaniitti warra kanatti aananii jiranii dha; Nemu'el, abbaa qomoo Nemu'elootaa ti; Yaamiin, abbaa qomoo Yaamiinotaa ti; Yaakiin, abbaa qomoo Yaakiinotaa ti;
[13] Zeraan, abbaa qomoo Zerootaa ti; Shaawul, abbaa qomoo Shaawulootaa ti.
[14] Isaan kun qomoowwan Shimi'oonotaa ti; lakkoobsi isaanii kuma digdamii lamaa fi dhibba lama ture.
[15] Ilmaan Gaadi akka qomoo qomoo isaaniitti warra kanatti aananii jiranii dha; Zefoon, abbaa qomoo Zefoonotaa ti; Haagiin abbaa qomoo Haagotaa ti; Shuniin, abbaa qomoo Shunootaa ti;
[16] Ozniin, abbaa qomoo Oznootaa ti; Eriin, abbaa qomoo Erootaa ti;
[17] Aarod, abbaa qomoo Aarodootaa ti; Arii'eliin, abbaa qomoo Arii'elootaa ti.
[18] Isaan kun qomoowwan ilmaan Gaadi; isaan keessaa warri lakkaa'aman kuma afurtamaa fi dhibba shan turan.
[19] Ilmaan Yihudaa Erii fi Onaan turan; isaan garuu biyya Kana'aanitti in du'an.
[20] Ilmaan Yihudaa akka qomoo qomoo isaaniitti warra kanatti aananii jiranii dha; Shelaan, abbaa qomoo Shelootaa ti; Faares, abbaa qomoo Faaresootaa ti; Zaaraan, abbaa qomoo Zaarotaa ti.
[21] Ilmaan Faares immoo Hezron, abbaa qomoo Hezronootaa ti; Hamul abbaa qomoo Hamulootaa ti.
[22] Isaan kun qomoowwan Yihudaa ti; isaan keessaa warri lakkaa'aman kuma torbaatamii ja'aa fi dhibba shan turan.
[23] Ilmaan Yisaakor akka qomoo qomoo isaaniitti warra kanatti aananii jiranii dha; Tolaan abbaa qomoo Tolaawotaa ti; Fuwaan, abbaa qomoo Fuwootaa ti;
[24] Yaashub, abbaa qomoo Yaashubootaa ti; Shimroon, abbaa qomoo Shimroonotaa ti.
[25] Isaan kun qomoowwan Yisaakor; isaan keessaa warri lakkaa'aman kuma jaatamii afurii fi dhibba sadii turan.
[26] Ilmaan Zebuloon akka qomoo qomoo isaaniitti warra kanatti aananii jiranii dha; Sered, abbaa qomoo Seredootaa ti; Eloon, abbaa qomoo Eloonotaa ti; Yaahile'el, abbaa qomoo Yaahile'elootaa ti;
[27] isaan kun qomoowwan Zebuloon; isaan keessaa kan lakkaa'aman kuma jaatamaa fi dhibba shan turan.
[28] Ilmaan Yoseef akka qomoo qomoo isaaniitti, Minaasee fi Efreem.
[29] Ilmaan Minaasee, Maakiir, abbaa qomoo Maakiirotaa ti; Maakiir kun abbaa Giil'aad ture; Giil'aad immoo abbaa qomoo Giil'aadotaa ti.
[30] Ilmaan Giil'aad immoo warra kanatti aananii jiranii dha; Yi'ezer, abbaa qomoo Yi'ezerootaa ti; Helek, abbaa qomoo Helekootaa ti;
[31] Asrii'el, abbaa qomoo Asrii'elootaa ti; Sheekem, abbaa qomoo Sheekemootaa ti.
[32] Shemiidaan, abbaa qomoo Shemiidotaa ti; Hefer, abbaa qomoo Heferootaa ti.
[33] Zelofehaad ilmi Hefer immoo intaloota malee, ilmaan hin qabu ture; maqaan intaloota Zelofehaad, Maahilaa, No'aa, Hoglaa, Miilkaa fi Tiirzaa ture.
[34] Qomoowwan Minaasee isaan kana; isaan keessaa kan lakkaa'aman kuma shantamii lamaa fi dhibba torba turan.
[35] Ilmaan Efreem akka qomoo qomoo isaaniitti warra kanatti aananii jiranii dha; Shutelaan, abbaa qomoo Shutelootaa ti; Beker, abbaa qomoo Bekerootaa ti; Taahaan, abbaa qomoo Taahaanotaa ti.
[36] Ilmaan Shutelaa immoo Eraan, abbaa qomoo Eraanotaa ti;
[37] qomoowwan ilmaan Efreem isaan kana; isaan keessaa kan lakkaa'aman kuma soddomii lamaa fi dhibba shan turan; ilmaan Yoseef akka qomoo qomoo isaaniitti isaan kana turan.
[38] Ilmaan Benyaamiin akka qomoo qomoo isaaniitti, Belaa'i abbaa qomoo Belaa'otaa ti; Ashbel, abbaa qomoo Ashbelootaa ti; Ahiiraam, abbaa qomoo Ahiiraamotaa ti;
[39] Shefufaam, abbaa qomoo Shefufaamotaa ti; Hufaam, abbaa qomoo Hufaamotaa ti.
[40] Ilmaan Belaa'i immoo Aardii fi Na'aamaan turan; Aardiin, abbaa qomoo Aardotaa ti; Na'aamaan, abbaa qomoo Na'aamaanotaa ti.
[41] Isaan kun akka qomoowwan isaaniitti ilmaan Benyaamiin; isaan keessaa warri lakkaa'aman kuma afurtamii shanii fi dhibba ja'a turan.
[42] Ilmaan Daan akka qomoo qomoo isaaniitti warra kanatti aananii jiranii dha; Shuhaam, abbaa qomoo Shuhaamotaa ti; qomoowwan Daan akka qomoo qomoo isaaniitti isaan kana.
[43] Qomoowwan Shuhaamotaa hundumaa keessaa warri lakkaa'aman kuma jaatamii afurii fi dhibba afur turan.
[44] Ilmaan Asheer akka qomoo qomoo isaaniitti, Yiimnaan, abbaa qomoo Yiimnotaa ti; Yishwiin, abbaa qomoo Yishwootaa ti; Beriiyaan, abbaa qomoo Beriiyotaa ti.
[45] Ilmaan Beriiyaa immoo Heber, abbaa qomoo Heberootaa ti; Malkii'el, abbaa qomoo Malkii'elootaa ti.
[46] Maqaan intala Asheer, Seraa ture;
[47] qomoowwan ilmaan Asheer isaan kana; isaan keessaa kan lakkaa'aman kuma shantamii sadii fi dhibba afur turan.
[48] Ilmaan Niftaalem akka qomoo qomoo isaaniitti, Yaahize'el, abbaa qomoo Yaahize'elootaa ti; Guniin, abbaa qomoo Guniiwotaa ti;
[49] Yezer, abbaa qomoo Yezerootaa ti; Shiilem, abbaa qomoo Shiilemootaa ti.
[50] Isaan kun qomoowwan Niftaalem; isaan keessaa warri lakkaa'aman kuma afurtamii shanii fi dhibba afur turan.
[51] Namoota Israa'el keessaa warri lakkaa'aman isaan kana turan; lakkoobsi isaanii walumatti kumaatama dhibba ja'aa fi kuma tokkoo fi dhibba torbaa fi soddoma ture.
[52] Waaqayyo yommus Museedhaan,
[53] “Akka lakkoobsa maqaa isaaniitti biyyichi isaan kanaaf dhaala ta'ee haa hiramu!
[54] Qomoo guddaadhaaf dhaala guddaa, qomoo xinnaadhaaf dhaala xinnaa kenni! Tokkon tokkon qomoo akka lakkoobsa namoota isaatiitti dhaala isaa haa argatu!
[55] Biyyichi garuu buufata mukaatiin haa hiramu! Isaan akka maqaa gosa abboota isaaniitti haa dhaalan!
[56] Dhaalli sun qomoowwan gurguddaa fi qomoowwan xixinnaa gidduutti buufata mukaatiin haa hiramu!” jedhe.
[57] Lewwoonni akka qomoo qomoo isaaniitti lakkaa'aman immoo kanatti aananii warra jiranii dha; Gershoon, abbaa qomoo Gershoonotaa ti; Qehaat, abbaa qomoo Qehaatotaa ti; Meraariin, abbaa qomoo Meraarotaa ti.
[58] Warri kanatti aananii jiranis qomoowwan Lewwootaa ti; qomoo Siibnaa'ot, qomoo Heronootaa, qomoo Maahilootaa, qomoo Mushootaa, qomoo Qoraahotaa ti; Qehaat immoo abbaa Amraam ture.
[59] Maqaan haadha manaa Amraam Yokebeed ture; isheen intala Lewwii ishee biyya Gibxiitti dhalatte turte; isheen immoo Aaronin, Musee fi Miiryaamin obboleettii isaanii Amraamiif deesse.
[60] Aaroniif immoo Naadaab, Abiihuu, Ele'azaarii fi Itaamaartu dhalate.
[61] Garuu Naadaabii fi Abiihuun ibidda alaa isa Waaqayyo isaan hin abboomin Waaqayyo duratti yeroo dhi'eessan du'an.
[62] Dhiirota dhalatanii ji'a fixanii jalqabee hamma warra isaa oliitti isaan keessaa kan lakkaa'aman hundinuu kuma digdamii sadii turan; isaan Israa'eloota gidduudhaa dhaalli waan isaaniif hin kennaminiif isaan keessatti hin lakkaa'amne.
[63] Isaan kun warra yeroo Museenii fi Ele'azaar lubichi fuullee Yerikootti bukkee laga Yordaanos dachaa Mo'aab keessatti Israa'eloota lakkaa'an sana lakkaa'amanii dha.
[64] Garuu warra yeroo Musee fi Aaron lubichi Siinaa lafa onaa keessatti Israa'eloota lakkaa'anitti lakkaa'aman keessaa namni tokko illee isaan kana keessa hin turre.
[65] Israa'eloonni sun lafa onaa keessatti akka dhuman Waaqayyo dubbatee akkuma ture, isaan keessaa Kaaleb ilma Yofunee fi Iyaasuu ilma Nun malee, namni tokko iyyuu hin hafne.