[1] Dubbiin Waaqayyoo inni gara ana Ermiyaas dhufe, kanatti fufee jira;
[2] Waaqayyo,“Balbala mana qulqullummaa dura dhaabadhuutii,“Isin warri Yihudaa, warri ana Waaqayyoof sagaduudhaaf karaa balbala kanaa ol galtan hundinuu dubbii koo dhaga'aa!” jedhii dubbadhu!
[3] Waaqayyo gooftaan maccaa, Waaqayyo inni kan Israa'el,“Iddoo kana keessa akkan isin jiraachisutti, amala keessanii fi hojii keessan tolfadhaa!
[4] Dubbii sobaa amanatanii manni qulqullummaa inni kan Waaqayyoo isa kana, manni qulqullummaa inni kan Waaqayyoo isa kana, manni qulqullummaa inni kan Waaqayyoo isa kana” hin jedhinaa!
[5] “Amala keessanii fi hojii keessan tolfadhaa, walii wajjinis jireenya qajeelaa jiraadhaa!
[6] Nama galaa, ijoollee abbaan irra hin jirre, haadha hiyyeessaas yoo cunqursuu dhiiftan, iddoo kanatti dhiiga nama balleessaa hin qabnee yoo dhangalaasuu dhabaattan, waaqayyolii ormaa duukaa bu'uudhaan wanta hamaa ofitti fiduu yoo dhiiftan,
[7] ani biyya isan bara baraan keessa akka jiraattaniif abboota keessaniif kenne keessa isin nan jiraachisa.
[8] “Isin garuu dubbii sobaa isa waa'ee hin baafne in amanattu;
[9] isin amma iyyuu in hattu, nama in ajjeeftu, in ejjitu, sobaan in kakattu, Ba'aaliif aarsaa ixaanaa in dhi'eessitu, waaqayyolii kan biraa warra ofii keessanii isaan hin beekne duukaas in buutu.
[10] Wanta akkasii gochaa gara mana qulqullummaa isa kan kootii dhuftanii ana dura dhaabattanii,“Nuyi wanta ciiggaasisaa kana hundumaa itti fufnee yoo hojjenne iyyuu wanti nu miidhu hin jiru” in jettu;
[11] isin mana qulqullummaa isa kan kootii kana holqa hattuu seetan moo” Kunoo! Ani waan isin gootan kana argeera” jedhe; Waaqayyo kana dubbateera.
[12] Ammas Waaqayyo,“Shiiloo iddoo dur maqaan koo akka itti waamamuuf fo'adhee ture sana sababii balleessaa saba koo Israa'eliif jedhee kanan godhe dhaqaatii ilaalaa!
[13] Isin cubbuu kana hundumaa gochuu keessan irra iyyuu si'a baay'ee yommuun isinitti dubbadhe anaaf dhaga'uu, yommuun isin waames ana jalaa oowwaachuu waan diddaniif,
[14] mana qulqullummaa isa kan kootii isa isin amanattan kana, mandaroota warra ani abboota keessaniif, darbee immoo isiniif kenne kanas akkuman dur Shiiloo godhe nan godha;
[15] akkuman obboloota keessan warra sanyii Efreem ta'an hundumaa fuula koo duraa balleesse, akkasuma fuula koo duraa isin nan balleessa.
[16] “Yaa Ermiyaas, ani siif hin dhaga'uutii, saba kanaaf hin kadhatin, waa'ee isaaniitiif gara kootti hin wawwaatin, isaaniifis hin dubbatin!
[17] Wanta isaan mandaroota Yihudaa fi karaa mandara Yerusaalem irratti hojjetan ati hin argituu ree”
[18] Ijoollonni qoraan funaanu, abboonni immoo ibidda qabsiisu, dubartoonni mootittii bantii waaqaatiif buddeena aarsaa tolchuuf bukoo bukeessu, kennaa dhugaatiis waaqayyolii biraatiif in dhibaafatu; kana hundumaa ana aarsuudhaaf jedhanii in godhu;
[19] amma kana gochuu isaaniitiin ana aarsuu isaanii tii” Waawuu, isaan ofuma isaaniitii kan ittiin yeella'an gochuu isaanii ti.
[20] Kanaafis kunoo! Ani Waaqayyo gooftaan, dheekkamsa koo fi aarii koo iddoo kana irratti, namaa fi horii irratti, mukkeetii bakkee keessa jiran irratti, ija midhaan biyya kanaa hundumaa irrattis nan bobeessa! Kan isa dhaamsus hin jiru” jedha.
[21] Waaqayyo gooftaan maccaa, Waaqayyo inni kan Israa'el, saba isaatiin,“Qalma gubamuu fi foon horii qalamee aarsaadhaaf dhi'aatu ofuma keessanii nyaadhaa!
[22] Ani abboota keessan biyya Gibxii yommuun baase waa'ee qalma gubamuu fi waa'ee aarsaa dhi'aatuu isaanitti hin dubbanne, akka anaaf dhi'eessaniifis isaan hin abboomne;
[23] wanti ani isaan abboome garuu,“Anaaf dhaga'aa, ani Waaqayyo keessan isiniif nan ta'a, isin immoo saba koo in taatu; wanta ani isin abboome hundumaas eegaa! Yommus wanti hundinuu isiniif in tola” kan jedhu ture.
[24] Isaan garuu mataa jabaatanii wanta hamaa ofii isaaniitii yaadan duukaa bu'anii dugda anatti gatan malee, wantan isaanitti dubbadhe hin dhageenye, gurra isaaniis gara kootti hin qabne.
[25] Bara abboonni keessan biyya Gibxiitii ba'anii jalqabee hamma har'aatti deddeebisee hojjetoota koo warra raajota hundumaa gara keessanitti ergaan ture;
[26] isin garuu boqu-jaboota taatanii abboota keessan caalaa wanta hamaa hojjettan malee, gurra keessan gara kootti qabdanii anaaf hin dhageenye.
[27] “Yaa Ermiyaas, ati dubbii kana hundumaa isaanitti yommuu himtu, isaan immoo siif hin dhaga'an, yommuu isaan waamtus si jalaa hin qaban;
[28] kanaaf ati saba kanaan,“Isin sagalee Waaqayyo gooftaa keessaniitiif hin abboomamtan, gorsa isaa hin fudhattan, dhugaanis afaan keessan keessaa in bade” jedhi!” jedhe.
[29] Yaa namoota Yerusaalem, Waaqayyo dhaloota warra aarii irraa qabu waan tuffateef, waan dhiiseefis, isin rifeensa mataa keessanii of irraa haadaatii gataa! Iddoo ol ka'aa irratti ol ba'aatii sagalee keessan ol fuudhaatii boo'aa!
[30] Waaqayyo,“Namoonni Yihudaa ana duratti wanta hamaa hojjetaniiru; isaan wanta jibbisiisaa mana qulqullummaa koo keessa kaa'anii isa xureessaniiru.
[31] Ilmaan isaanii fi intaloota isaanii ibidda keessatti gubanii aarsaa dhi'eessuudhaaf, dachaa Ben-Hiinom keessatti iddoowwan ol ka'oo “Toofet” jedhaman in ijaaran; ani wanta akkasii kana akka isaan godhaniif isaan hin abboomne, wanti akkasiis yaada koo keessa hin turre.
[32] Kanaafis kunoo! Inni si'achi“Dachaa dhumiisaa” jedhama malee,“Toofet” yookiis “Dachaa Ben-Hiinom” hin jedhamu; si'achi iddoon namni itti awwaalamu waan hin jirreef, namoonni Toofetitti in awwaalamu.
[33] Reeffi jara kanaa alaattii qilleensa keessa balali'aniif bineensota caakkaa keessa jiraniif nyaata in ta'a; namni tokko illee reefficha irraa isaan hin ari'u;
[34] biyyi sun waan baduuf ani sagalee gammachuu fi sagalee ilillee, sagalee dhirsa misirroo fi sagalee misirroo, mandaroota Yihudaa fi karaa Yerusaalem keessa jiru irraa nan balleessa” jedhe.