[1] জিরাইবার দিন ফার অই গেলে ফর মগ্দলিনি মরিয়াম, ইয়াকুবর মা মরিয়াম আর শালোমি ইসার লাশত মাকাইবার লাই হোশ্বু মল্যম কিনি আনিল্।
[2] সাফ্তার ফইল্যা দিনর বেইন্যা ফজরত, সুয্য উঢিবার লগে লগেই য়িতারা হব্যরর হাছে গেল্।
[3] য়েই সমত য়িতারা একজন অইন্যজনরে ফুছার গইত্যো আছিল্, “হব্যরর মুকর ত্যুন হনে য়েই ফাত্যোরগান সরাই দিবো?”
[4] কিন্তু য়িতারা চাই দেকিল্ দে, ফাত্যোরগান সরাআ অইয়্যে। য়েই ফাত্যোরগান বউত ডঁর আছিল্।
[5] হব্যরর গাঁতাত ঢুকিয়েনে য়িতারা দেকিল্, সাদা হঅর ফিঁদা একজন জোয়ান ফোয়া ডাইন মিক্যাদি বই আছে। ইয়ানত য়িতারা বউত অবাক অইল্।
[6] য়েই ফোয়াউয়া হইল্, “অবাক নঅ অইয়্যো। নাসরত গেরামর ইসা যিবারে কুরুশর উঅরদি মারি ফেলা অইয়্যেল্, তেঁইরেই তোঁয়ারা টোয়াইতা লাইগ্যো তঅত? তেঁই এডে নাই, তেঁই জিন্দা অই উইট্যে। যেডে য়িতারা তেঁইরে রাইক্যেল য়েই জাগাগান চঅ।
[7] তার ফর তোঁয়ারা যাইয়েনে তেঁইর উম্যতঅক্যলরে আর ফিতররে এই হতা হঅ দে, তেঁই য়িতারার আগদি গালিলত যাআর। তেঁই যেইল্যা হইয়্যেল্ য়েইল্যাই য়িতারা তেঁইরে য়েডে দেকিত্ ফাইবো।”
[8] য়েই মাইয়্যাফোয়াঅক্যল কিছু বুঝিত্ নঅ ফারিয়েনে হাঁইফ্তে হাঁইফ্তে হব্যরর গাঁতার ত্যুন বাইর অই আইল্ আর য়েডের ত্যুন দুঁরিয়েনে ধাই গেল্। য়িতারা এত ডরাইয়্যেল্ দে, কেউঅরে কিছু নঅ হইল্।
[9] সাফ্তার ফইল্যা দিনত বেইন্যা ফজরত ইসা মিত্যুর ত্যুন জিন্দা অই উঢিল্। ফরদি তেঁই মগ্দলিনি মরিয়ামরে ফইল্যা দেহ্যা দিল্। এই মরিয়ামর ভিতরর ত্যুন ইসা সাত্যুয়া ভুত ছারাইয়্যেল্।
[10] তেঁইরে দেকিবার ফর মরিয়াম যাইয়েনে যারা ইসার লগে থাইক্তো য়িতারার হাছে হ্যবর দিল্। য়েই সমত য়িতারা মনর দুক্যে হাঁইন্তো আছিল্।
[11] ইসা জিন্দা অইয়্যে আর মরিয়াম তেঁইরে দেইক্যে, এই হতা উনিয়েনে য়িতারা বিশ্যাস নঅ গরিল্।
[12] ইয়ার ফরদি তেঁইর দুইজন উম্যত যহন আঁঢিয়েনে গেরামর মিক্যা যাইতো আছিল্ তহন ইসা অইন্য রহম চিয়ারায় য়িতারারে দেহ্যা দিল্।
[13] য়িতারা ফিরি যাইয়েনে বাকি বেক্যিনরে য়েই হ্যবর দিল্, কিন্তু য়িতারার হতাঅ অইন্য উম্যতঅক্যলে বিশ্যাস নঅ গরিল্।
[14] ইয়ার ফরদি ইসা তেঁইর এগারজন উম্যতরে দেহ্যা দিল্। তহন য়িতারা হ্যাইতো আছিল্। বিশ্যাসর অভাব আর দিলর হোটিনতার লাই তেঁই য়িতারারে গাইল দিল্, হারন তেঁই মরনর ত্যুন জিন্দা অইয়েনে উঢিবার ফরদি যারা তেঁইরে দেইক্যেল্ য়িতারার হতা য়িতারা বিশ্যাস নঅঅ গরে।
[15] ইসা য়েই উম্যতঅক্যলরে হইল্, “তোঁয়ারা দুনিয়ার বেক জাগাত যঅ আর বেক মানুষঅক্যলর হাছে আল্লাহ্র দেয়া সুহ্যবর তবলিগ গর।
[16] যে কেউ ইমান আনে আর তরিকাবন্দি নেএ তেই নাজাত ফাইবো; কিন্তু যিবা ইমান নঅ আনে আল্লাহ্ য়িবারে দুষি বুলি ইস্তির গরিয়েনে শাস্তি দিবো।
[17] যারা ইমান আনে য়িতারার মইধ্যে এই চিন্যগিন দেহ্যা যাইবো — আঁর নামে য়িতারা ভুত ছারাইবো, য়িতারা নয়া নয়া ভাষাত হতা হইবো,
[18] য়িতারা আত দিয়েনে আঁফ তুলি ধরিবো, যুদি য়িতারা বঅর বিষাক্ত কিছু হ্যাআ তইলে য়িতারার হনঅ হোতি অইতো নঅ, আর য়িতারা বেরাইম্যার গাআত আত দিলে বেরাইম্যাঅক্যলে ভালা অইবো।”
[19] উম্যতঅক্যলর হাছে এই হতাগিন হইবার ফরদি হযরত ইসারে বেহেস্তত তুলি নেয়া অইল্। য়েডে তেঁই আল্লাহ্র ডাইন মিক্যাদি বইল্।
[20] ফরদি উম্যতঅক্যলে যাইয়েনে বেক জাগাত তবলিগ গইত্যো লাগিল্। হযরত ইসা য়িতারার মইধ্য দিয়েনে য়িতারার লগে হাম গইত্যো থাকিল্ আর য়িতারারে কেরামতি হাম গরিবার শক্তি দিয়েনে ফরমান গরিল্ দে, য়িতারা যেগিন তবলিগ গরের য়েগিন আঁসা।