[1] ইব্নুল্লাহ্ ইসা মসিহ্র বিষয়ে সুহ্যবরর শুরু।
[2] নবি ইশাইয়ার কিতাবত আল্লাহ্র হোয়া এই হতা লেহ্যা আছে: চঅ, তোঁয়ার আগদি আঁই আঁর সংবাদদাতারে ফাটাইর। য়িবা তোঁয়ার ফথ রেডি গরিবো
[3] মরুভুমিত একজনর গলার আবাজ চিল্যাইয়েনে জানার, তোঁয়ারা মাবুদর ফথ ঠিগ গর, তেঁইর রাস্তা সুজা গর।
[4] য়েই হতামতনই হযরত ইয়াহিয়া মরুভুমিত যাইয়েনে মানুষঅক্যলরে তরিকাবন্দি দিতো আছিল্ আর তবলিগ গইত্যো আছিল্ যেন্ মানুষে গুনাহ্র মাফ ফাইবার লাই তঅবা গরে আর তরিকাবন্দি লঅ।
[5] য়িয়ানত এহুদিয়া ফদেশ আর জেরুজালেম শঅরর বেক্যিনে বাইর অইয়েনে ইয়াহিয়ার হাছে আইস্তো লাগিল্। য়িতারা যহন গুনাহ্ সিকার গরিল্ তহন ইয়াহিয়া জদ্যান দইজ্যাত য়িতারারে তরিকাবন্দি দিল্।
[6] ইয়াহিয়া উটর কেঁশর হঅর ফিঁন্তো আর তেঁইর হোঁঅরত চামরার হোঁঅর-বাঁধনি আছিল্।
[7] তেঁই খেরগুয়া ফরিং আর বনমধু হ্যাইতো। তেঁই যেগিন তবলিগ গইত্যো য়েগিন এই, “আঁর ফরদি একজন আইয়্যের। তেঁই আঁর ত্যুন শক্তিশালি। উইত অইয়েনে তেঁইর জুতার ফিতা খুলিবার যৈগ্যঅ আঁই নঅঅ।
[8] আঁই তোঁয়ারারে ফানিত তরিকাবন্দি দিইর কিন্তু তেঁই ফাক-রুহ্ দিয়েনে তোঁয়ারারে তরিকাবন্দি দিবো।”
[9] য়েই সমত ইসা গালিল ফদেশর নাসরত গেরামর ত্যুন আইল্, আর ইয়াহিয়া তেঁইরে জদ্যান দইজ্যাত তরিকাবন্দি দিল্।
[10] ফানির ত্যুন উঢি আইবার লগে লগেই ইসা দেকিল্, আসমান চিরি গেইয়্যে আর ফাক-রুহ্ হইতোরর মতন অইয়েনে তেঁইর উঅর লামি আইয়্যের।
[11] য়েই সমত আসমানর ত্যুন এই হতা উনা গেল্, “তুঁইই আঁর মহব্যতর ফোয়া, তোঁয়ার উঅর আঁই বউত খুশি।”
[12] তার ফরদিই ইসার ত্যুন ফাক-রুহ্র ফরিচালানাত মরুভুমিত যঅন ফরিল্।
[13] য়েই মরুভুমিত চল্যিশ দিন ধরিয়েনে ইবিলিস ইসারে লোভ দেহ্যাইয়েনে গুনাহ্ত ফেলিবার চেষ্টা গইত্যো লাগিল্। য়েডে বউত বইন্য জন্তু আছিল্, আর ফেরেস্তাঅক্যলে ইসার সেবা গইত্যো।
[14] ইয়াহিয়া জেলহ্যানাত বন্দি অইবার ফরদি ইসা গালিল ফদেশত গেল্। য়েডে তেঁই এই হতা হইয়েনে আল্লাহ্র দেয়া সুহ্যবর তবলিগ গইত্যো লাগিল্,
[15] “সময় অইয়্যে, আল্লাহ্র রাইজ্য হাছে আই গেইয়্যে। অনরা তঅবা গরন আর এই সুহ্যবরর উঅর ইমান আনন।”
[16] একদিন ইসা গালিল সাগরর ফার দিয়েনে যাইতো আছিল্। এন্ সমত তেঁই শিমোন আর য়িবার ভাই আন্দ্রিয়রে সাগরত জাল ফেইল্তো দেকিল্। য়েই দুই জন আছিল্ জাইল্যা।
[17] ইসা য়িতারারে হইল্, “আঁর লগে চল। আঁই তোঁয়ারারে মানুষ ধরার জাইল্যা বানাইয়্যোম।”
[18] তহনই য়িতারা জাল ফেলি রাকিয়েনে ইসার লগে গেল্।
[19] য়েডের ত্যুন এক্যানা দুরে যঅনর ফর তেঁই সিবদিয়র দুই ফোয়া ইয়াকুব আর ইউহোন্যারে দেকিত্ ফাইল্। য়িতারা য়িতারার নোকাত বইয়েনে জাল ঠিগ গইত্যো আছিল্।
[20] ইসা য়িতারারে দেকিবার লগে লগে ডাক দিল্, আর য়িতারা য়িতারার বাবা সিবদিয়রে মজুরঅক্যলর লগে নোকাত রাকিয়েনে ইসার লগে গেল্।
[21] ইসা আর তেঁইর উম্যতঅক্যলে কফরনাহুম শঅরত গেল্। ফরদি জিরাইবার দিনত ইসা মজলিস হ্যানাত যাইয়েনে শিক্যা দিতো লাগিল্।
[22] মানুষঅক্যলে তেঁইর শিক্যাত তাইজ্যব অই গেল্, হারন তেঁই আলেমঅক্যলর মতন শিক্যা দিতো নঅ আছিল্ বরং যিবার অধিকার আছে য়েই রহম মানুষর মতনই শিক্যা দিতো আছিল্।
[23] য়েই সমত ভুতে ফঅইন্যা একজন মানুষ য়েই মজলিস হ্যানার মইধ্যে আছিল্।
[24] য়িবা চিল্যাইয়েনে হইল্, “ওরে নাসরতর ইসা, আঁরার লগে অনর কি দরহার? অনে কি আঁরার সবর্নাশ গইত্যা আইস্যোন না? আঁই জানি অনে হঅন; অনেই তঅ আল্লাহ্র য়েই ফবিত্রজন।”
[25] ইসা তহন য়েই ভুতরে ধমকাইয়েনে হইল্, “চুব গর, য়িবার মইধ্যর ত্যুন বাইর অই যঅ।”
[26] য়েই ভুত তহন মানুষ্যুয়ারে মোচরি ধরিল্ আর জোরে চিল্যাইয়েনে য়িবার মইধ্যর ত্যুন বাইর অই গেল্।
[27] এই ঘটনা দেকিয়েনে মানুষঅক্যলে এন্ তাইজ্যব অই গেল্ দে, য়িতারা নিজরার মইধ্যে হইতো লাগিল্, “এগিন কি বেফার? এই অধিকার ভরা নয়া শিক্যাই বা কি? এন্ কি ভুতগিনরেঅ তেঁই উকুম দেএ আর য়িতারা তেঁইর হতা উইন্তে বাইধ্য অঅ।”
[28] ইয়ানত গালিল ফদেশর বেক জাগাত ইসার হতা বউত তরাতরি ছরাই ফরিল্।
[29] ফরদি য়িতারা মজলিস হ্যানার ত্যুন বাইর অইয়েনে শিমোন আর আন্দ্রিয়র বাড়িত গেল্। ইয়াকুব আর ইউহোন্যাঅ য়িতারার লগে আছিল্।
[30] শিমোনর ওওরির জর অইয়্যেল্ বুলি তেঁই উউতি আছিল্। ইসা আইবার লগে লগেই য়িবার হতা তেঁইরে হোয়া অইল্।
[31] তহন ইসা তেঁইর হাছে যাইয়েনে আত ধরি য়িবারে তুলিল্। য়িয়ানত য়িবার জর ছারি গেল্ আর তেঁই য়িতারার হ্যানা দানার বেবস্তা গইত্যো লাগিল্।
[32] য়েই দিন সুয্য ডুফি গেলে ফর আঁজুইন্যা মানুষঅক্যলে বেক বেরাইম্যাঅক্যলরে আর ভুতে ফঅইন্যা মানুষঅক্যলরে ইসার হাছে আনিল্।
[33] শঅরর বেক মানুষ তহন য়েই বাড়িগানর দরজার হাছে আইয়েনে জমায়েত অইল্।
[34] ইসা বউত রহমর বেরাইম্যারে ভালা গরিল্ আর বউত ভুত ছারাইল্। তেঁই ভুতগিনরে হতা হইতো নঅ দিল্, হারন য়েই ভুতগিনে জাইন্তো তেঁই হঅন।
[35] ফরদিন ফজরত আঁধার থাইক্তেই ইসা উঢিল্ আর ঘর ছারিয়েনে উগ্যুয়া নিঝাব জাগাত যাইয়েনে মুনাজাত গইত্যো লাগিল্।
[36] শিমোন আর য়িবার উঁয়াজ্যাঅক্যলে ইসারে তালাইশ গইত্যো আছিল্।
[37] ফরদি তেঁইরে তালাইশ গরি ফাইয়েনে হইল্, “বেক্যিনে অনরে তালাইশ গরের।”
[38] ইসা য়িতারারে হইল্, “চল, আঁরা হাছর গেরামগিনত যাই যেন্ আঁই য়েডেঅ তবলিগ গরিত্ ফারি, হারন য়িয়ানর লাইই তঅ আঁই আস্যি।”
[39] এন্ গরিয়েনে ইসা গালিলর বেক জাগাত যাইয়েনে ইহুদিঅক্যলর মজলিসহ্যানাগিনত তবলিগ গরিল্ আর ভুত দুর গরিল্।
[40] ফরদি একজন চামরা বেরাইম্যা ইসার হাছে আইয়েনে তেঁইর সাম্নদি আঁঢু গাঁরি হইল্, “অনে ইছ্যা গরিলেই আঁরে ভালা গরিত্ ফারন।”
[41] মানুষ্যুয়ার উঅর ইসার বউত মমতা অইল্। তেঁই আত বারাইয়েনে য়িবারে ধরি হইল্, “আঁই য়িয়ানই চাই, তুঁই ফাক-সাফ অঅ।”
[42] আর তহনই য়িবার চামরা বেরাম ভালা অই গেল্।
[43] ইসা তহনই য়িবারে বিদায় গরিল্, কিন্তু য়িয়ানর আগদি য়িবারে হরাহরি গরিয়েনে হইল্,
[44] “চঅ, এই হতা কেউঅরে নঅ হইয়্যো। তুঁই বরং ইমামর হাছে যাইয়েনে নিজরে দেহ্যঅ আর ফাক-সাফ অইবার লাই মুসা যে হোরবানির উকুম দিয়্যে য়েগিন হোরবানি দঅ। ইয়ানত ইমামঅক্যলর হাছে ফরমান অইবো দে, তুঁই ভালা অইয়্যো।”
[45] য়েই মানুষ্যুয়া কিন্তু বাইরে যাইয়েনে বেক জাগাত এই হ্যবর ছরাইতো লাগিল্। য়িয়ানর হারনে ইসা হনঅ গেরামত আর খোলাখুলিভাবে যাইত্ নঅ ফারিল্। তেঁইর ত্যুন নিঝাব জাগাত থাকন ফরিল্; তঅঅ মানুষঅক্যলে বেক জাগার ত্যুন তেঁইর হাছে আইস্তো লাগিল্।