[1] Kadogayte Isos agipanawan sa mga bayan osai sa mga bayante. Siyo agbarita osai agpatoldo in Maal pag Barita panawen sa Diyos agpapoon. Agyanggat sa kansiyo in labing dowai ka agadar.
[2] Apo din mga kagbaiyan batang apo maskit no yewed piyaglowasan mamaw kalbas piyaoraw Isos. In osai Mariya piyagawit taga Magdala. Pito ka mamaw in biyoyaw Isos sa kansiyo.
[3] In kadowai Owana in babai Kosa in kay Irodis katiwala, in katolo Sosana, osai aronaw kay roma. Siro in agbayad in kay Isos mga piyagkailangan, osai in sa kansiyo mga agadar.
[4] Agpalpanrateng kay Isos in mga mangyan batang sa aronaw mga bayan. Paka lakonaw wa in aronan kansiyo siyabi anda pag alimbawa.
[5] Apo osai ka mangyan panaw batay agsabog bini. In siyo agsabog wa apo bini maragrag sa dalan, kalbas ina piyanlaedan osai kiyoman bantog.
[6] Apo din maragrag sa batowen. Paka moslod wa, ina toloy wakay makenet panawen mamara in diya.
[7] Apo din maragrag sa lalosenan. Kalbas mistobo in lalosen kiyopot in togda.
[8] In amat maragrag sa maalno pag diya. Ina mistobo, in baatte togda manggalem isang daan ka beter. Kalbas Isos mango keyen, In apo talinga mamarengey.
[9] In mga agadar agtanong kay Isos no nakay in beet siyabi ina pag alimbawa.
[10] Isos keyen, In mga batang piyagbetang panawen sa Diyos agpapoon piyagpalowas wa sa kanyo, kamay sa mga amat ina piyagalimbawa matang, Kamayba siro agpangkit siro idbatay katawan, Kamayba siro mamarengey siro idbatay katawan.
[11] Isos agsabi kay keyen, Anda in beet siyabi in alimbawa. In beet siyabi in bini in agiplaong Diyos.
[12] In mga bini maragrag sa dalan, na in beet siyabi in mga mamarengey, kamay paka rateng in diyablo in agiplaong kiyowa sa kansiro remrem, matang siro yewed agpasandig sa Diyos, yewed piyaboway.
[13] In maragrag sa batowen in beet siyabi in mga mamarengey sa agiplaong Diyos kalbas agkaanggay sa barita, kamay yewed mibaloy gayed sa kansiro remrem. Kadogayte waget siro agpaniwala, kamay paka maidap wa siro pasoway wakay.
[14] In mga wakay sa lalosenan, in beet siyabi in mga mamarengey kamay yewed kay dogay siyo diyaeg in mga piyagkariyaban, osai in mga sangkap, osai in mga piyagkaanggay atai sa kobat, matang idwa malayes in kansiro raweg.
[15] In mga wakay maragrag sa maalno pag diya, in beet siyabi in mga maal pag mangyan agpaniwala. Siro mamarengey sa agiplaong Diyos, kansiro yaalapet sa kansiro remrem, yewed aglimbang anggan manggalem.
[16] No in mangyan agparaet tinglaw na idbatay piyagtakleb kaldido idbatay piyabalay sa ngato esekan, dayem sa pagpamabolalangan tinglaw matang in rawa piyagngitan in mga agonaik sa balay.
[17] Angkataw in boo mga piyagbetang ngona na dogayan batay piyalowas. In boo mga piyagtabon ngona na dogayan ngiitan, atawanan.
[18] Na remremen in kanyo piyagparengey. Angkataw in apo na piyagpakan kay. Kamay in idapo na piyagkowa wakay kamayba nakay in kansiyo piyagremrem kansiyo.
[19] Rateng in mga ariyan Isos osai in inang, kamay siro yewed kapasabangen angkataw karowan mangyan.
[20] Apo agsabi sa kansiyo keyen, Asina wa sa tongkodan in kaimo inang osai din kaimo mga belag, beet patagbo sa kaimo.
[21] Kamay Isos keyen, In mga agparengey in agiplaong Diyos, kalbas agpangwat, na siro wa in kangay inang osai mga belag.
[22] Osai ka ibeng Isos somakay sa bangka osai in kansiyo mga agadar. Kalbas keyen Isos, Kitam wa sa ripay dagatte. Matang siro panaw wa.
[23] Agipanaw wa in bangka, Isos agesek wa, toloy wa bowawi lakoy. In bangka agkakno wa sapa, siro agkaleggeb wa.
[24] In mga agadar pataboy kay Isos, piyolaw, keyen, Laki Agpamatoldo, agkaleggeb wa kitam. Isos miyorog wa, siyabiyan in kowaya osai in bongkalos. Toloy maoraw, apyaan wa.
[25] Siyabi Isos sa kansiro keyen, Sa nakay wa in kanyo paniwala? Kamay siro agkalimo, agsoyo, agpaypolongan keyen, Nakay pag mangyan ina? Kamayba kowaya, kamayba sapa kansiyo piyagiplaong, siyo piyagpaniwalaan.
[26] Siro rateng sa kobat Girgisa sa ripay in dagatte sa kabetek Galiliya.
[27] Paka Isos lompot sa bangka siyo tiyagbo osai ka kaliyakiyan taga asin piyaglowasan mga mamaw. Siyo dogay wa yewed batang agsoroy damit, yewed din agpamataw sa balay dayem sa leyang lebengan.
[28] Paka kangitan kay Isos siyo mango, paselang sa kansiyo, maksen kansiyo siyabi keyen, Isos, bodang Diyos in Mabwat sa boo, nakay in kaimo panawen sa kangay? Ako maloba agayay sa kaimo ako ayaw agpakaskitanen.
[29] Kaya siyabi ina angkataw in mamaw piyagsogo Isos piyagboyaw sa mangyan. Siyo makakarowan aoliyan. Kamayba siyo piyagdamay, piyagpangaw, piyagbakos mga karakara, ina boo kansiyo piyagpansida, siyo piyagdarosog in mamaw sa moyod.
[30] Siyabi Isos sa kansiyo keyen, Nakay in kaimo ngaran? Siyo keyen, Bonton. angkataw karowan in mamaw misoroy sa kansiyo.
[31] In mga mamaw agdaing kay Isos keyen, Kami ayaw agpataboyen sa toyongan.
[32] Ista pag kobat apo karowan mga beyek agpaypanlongkod sa bolod. In mga mamaw omayay kay Isos keyen, Kami pasoroyen sa mga beyek. Keyen Isos, Dali wa.
[33] In mga mamaw panaw wa sa mangyan, kalbas misoroy wa sa mga beyek. Kalbas in mga beyek toloy wa domalagan sa lintoy, mangalabo sa dagatte, siro mangaleggeb wa.
[34] Paka ngiitan in mga agalapet beyek ina pag mibaloy siro domalagan, kansiro wa biyarita sa bayan, kadayo sa kobat.
[35] Kalbas in mga mangyan ista pataboy matang piyangkit ina pag mibaloy. Paka siro rateng kay Isos kansiro ngiitan in mangyan karai in piyaglowasan mamaw agtokkaw agpatobang kay Isos, agdamit wa, maal wakay in remrem. Kalbas siro maloba wa alimowan.
[36] In mga kangitan in mibaloy siro agbarita sa kansiro no nangkataw piyaoraw in piyaglowasan mamaw.
[37] In mga taga Girgisa agpaselang kay Isos keyen, Kao ayaw atai kanyam, laki. Angkataw siro agkalimo wano. Matang Isos somakay wa sa bangka batay wa panaw.
[38] In batang piyaglowasan mamaw keyen siyo paanggaten. Kamay siyo kay Isos wakay piyaoli
[39] keyen, Kao moli wakay sa kanyo, kalbas kaimo sabiyen sa mga mangyan in kalakoyen in piyangwat Diyos sa kaimo. Kalbas in kaliyakiyan moli wa sa bayan, agbarita ngani sa boo mga mangyan in piyangwat Isos sa kansiyo.
[40] Paka Isos moli wakay batang sa ripay dagatte, siyo piyabelag in karowan angkataw siyo kansiro piyagpanaya.
[41] Pataboy sa kansiyo osai ka agpapoon sa balay pagpaniponan, in ngaran Alro. Siyo agpakabwatte paselang kay Isos keyen, Laki, kao miyanggat sa kangay balay,
[42] angkataw agkatay wa in kangay osai waget ka bodang kagbaiyan labing dowai wa ka dagon. In Isos agipanaw siyo piyagliget mga mangyan.
[43] Apo osai ka kagbaiyan labing dowai wa ka dagon piyagpanalowan. In boo kansiyo sangkap liyobos wa piyabayad sa mga agpagamot kamay idapo kapaoraw kamayba nakay.
[44] Siyo pasabangen kay Isos awak komapkap sa tangrawan kansiyo lambong. Toloy idapo wakay in kansiyo maskit.
[45] Keyen Isos, Nakay in komapkap sa kangay? Kamay idapo kasabi. Kalbas keyen Pidro, Laki Agpamatoldo, aronaw wano pag mangyan in agliget sa kaimo.
[46] Kamay keyen Isos, Apo ngani komapkap sa kangay, angkataw kangay atawanan apo kabaloyan makowa sa kangay.
[47] In atawanan wa ina pag kagbaiyan yewed atago in kansiyo piyangwat siyo pasabangen kay Isos agkalimo, agpaselang. In boo mangyan agparengey, kansiyo siyabi kay Isos in dailan kaya siyo kansiyo kiyapkap, osai in toloy maoraw in kansiyo maskit.
[48] Siyabi Isos sa kansiyo keyen, Laki bodang, kaya piyaoraw in kaimo maskit panawen kao agpasandig sa Diyos. Maal wa kao panaw, apyaan in remrem.
[49] Ikkay lobos in kay Isos piyagsabi apo rateng batang sa balay Airo agsabi sa kansiyo keyen, Matay wa in kaimo bodang. Ayaw wa agabaraen in Agpamatoldo.
[50] In karengey ina Isos siyo keyen kay Alro, Ayaw agkalimo. Kao agpasandig waget sa Diyos, na batay maal wakay.
[51] Paka rateng sa kay Airo balay Isos idapo piyaanggat sa galem balay no yewed Pidro waget osai Owan osai Santiyago kadayo in amang kadayo in inang in daragate.
[52] In boo asin mga mangyan agpalpanangis, agpalpanggoong agalwasi sa matay. Kamay Isos keyen, Ayaw agpalpanangis. Siyo yewed matay, agesek waget.
[53] Isos piyagpatawaan waget in mga mangyan. Kansiro atawanan keyen matay wa.
[54] Kamay yaatang Isos in kansiyo bakwaw keyen, Miyorog wa, Lale.
[55] Toloy mamayeng wakay, siyo miyorog wa. Isos agsogo keyen, In bodang pakanen pamangnen.
[56] Toloy agsoyo in mga koyay. Kamay siyabi Isos keyen, Ayaw agpamarita in mibaloy kamayba kay nakay.