[1] Agkabangen wa in piyasta piyagawit Paskowa, in siro agkoman tinapay idapo pamaistobo.
[2] In mga poon sasirdoti, osai in mga agpatoldo in mga Batas agpamangkit padalan matang Isos mabono, in idbatay atawanan in mga mangyan, angkataw siro agkalimo sa mga mangyan.
[3] Ina pag betek misoroy Katanas sa galem Odas in piyagawit Iskariyoti, siyo in osai sa Labing Dowai ka agadar.
[4] Kalbas siyo panaw pataboy sa mga poon sasirdoti osai sa mga poon mga agdamay sa balay lakoy Diyos. Odas keyen, Kangay wa piyagpadakep Isos. Kalbas siro maypolongan in padalan matang diyakep.
[5] In mga poon anggayan, batay piyakan kowarta Odas.
[6] Kalbas Odas mangako wa. Sogod asin siyo agpamangkit wa padalan matang Isos madakep in yewed atawanan in karowan mangyan.
[7] Sa mga ibeng in Piyasta in agkoman tinapay idapo pamaistobo, rateng wa in ibeng agbono in bodang topa sa yapon piyagawit Paskowa.
[8] Siyogo Isos Pidro osai Owan keyen, Kamo ista wa, sandataen in kantam Yapon sa Paskowa.
[9] Siro keyen, Saano kaimo beet kami agsandata?
[10] Keyen wakay Isos, Kamo pataboy sa bayan. Sa bosngawan apo batay tomagbo sa kanyo osai ka kaliyakiyan agbaba galon sapa. Kanyo agaken siyo anggan sa balay kansiyo isoroyan.
[11] Kanyo sabiyen sa kapwan balay keyen, In Agpamatoldo agsabi no saano lames in maal siyo mamangan in Yapon sa Paskowa kadayo in kansiyo mga agadar.
[12] Na batay kansiyo piyatoldo sa kanyo in osai ka lakonaw pag basag sa ogbos, apo din mga sangkap. Ista kamo agsandata.
[13] Panaw wa in dokalaki, kansiro ngani ngiitan in boote siyabi Isos. Kalbas kansiro wa siyandata in Yapon in Paskowa.
[14] Paka rateng wa in kabetek, Isos tomokkaw wa batay agkoman osai in kansiyo mga katiwala.
[15] Kansiyo siyabi keyen, Dogay wa ako agpanaya matang kitam ngona agpaylanglangan agkoman anda pag Yapon sa Paskowa bayo ako pataboy sa kaidapan.
[16] Kangay piyagsabi sa kanyo ako idbatay wa tagoli mamangan Paskowa anggan sa mibaloy wa sa sakopan Diyos in piyagalimbawa atai.
[17] Kalbas yaatang Isos in pagpangineman, agpasalamat sa Diyos, kalbas keyen, Anda kanyo kowaen, kamo malbagiyan.
[18] Angkataw kangay piyagsabi sa kanyo, sogod ngona ako idbatay wa minem sapa batang sa obas anggan yewed kay rateng in Diyos agsakop.
[19] Kalbas kansiyo kiyowa in tinapay, agpasalamat sa Diyos, kansiyo piyandodo, kalbas tiyaboy sa kansiro. Kansiyo siyabi keyen, Anda in kangay bilog piyagtaboy panawen sa kanyo. Kanyo wa komanen agremrem sa kangay.
[20] Kataw din ina paka kalbas wa agyapon kansiyo wakay yaatang in pagpangineman, keyen, In galem anda pag pangineman in bayo wakay pag kasondowan Diyos, in kangay daya in panrigen, in piyagpabobo panawen sa kanyo.
[21] Kamay in osai sa kanyo in kangay mga sarig agkoman in batay agpadakep sa kangay.
[22] Ako in Bodang Mangyan batay maablaw kataw in remrem Diyos, kamay makapangirabot in batay parosa sa mangyan agpadakep sa kangay.
[23] Kalbas siro agpaypolongan keyen, Nakay sa kantam in batay agpangwat ina?
[24] In mga agadar agpalagawan no nakay sa kansiro in piyagpakalakoy.
[25] Siyabi Isos sa kansiro keyen, In mga poon lakoy sa mga yewed Odyo agsakop sa mga sakop sa kansiro, in mga mabwat kansiro piyagawit Koyay.
[26] Kamay ayaw kataw ina sa kanyo. Sa kanyo kailangan in mabwat kataw bongsowan. Kailangan in agpakoyay kataw sogowan.
[27] Osai in koyay in agsogo, osai in bodang in piyagsogo, na piyagpakalakonaw in agsogo agbangen, aon? Kamay ako agyanggat sa kanyo, matang kanyo sogowan.
[28] Kamo agaway agiyanggat sa kangay sa kangay mga kaidapan.
[29] No nangkataw ako piyakan kangay Amang kabaloyan agpapoon lakoy, na kataw din ina kamo kangay piyagpakan kabaloyan agpapoon,
[30] matang kitam agpaylanglangan osai agpalpangineman sa kangay sakopan. Osai kamo batay mga agpapoon sa labing dowai ka tiribo mga kasokponan Israil.
[31] Isos keyen, Simon, Laki Simon, mamarengey kao. Tiyaboy kay Katanas in kansiyo yaayay, in kamo boo tepengen kataw in paray piyaglayap.
[32] Kamay kao kangay piyandalangin matang marigen in kao agpasandig sa Diyos. Kalbas paka kao moli wakay sa kangay na kaimo din pakarigenen in kaimo mga pagbelag.
[33] Keyen wakay Pidro, Laki Kapwan, ako sandata wa piyagbilanggo, kamayba biyono sarig kaimo.
[34] Keyen wakay Isos, Laki Pidro, kangay piyagsabi sa kaimo, bayo tomalaok in manok ngona daan pag yabi, ako makatolo kaimo batay piyamangyan.
[35] Siyabi Isos sa kansiro keyen, In kamo tangona kangay siyogo idapo piyagbaba sokloban, galang, sinilas, nakay, apo lames korang sa kanyo? Siro keyen, Idapono.
[36] Siyo keyen, Kamay ngona no kamo apo sokloban na babaen, osai galang. No idapo pisaw, na paalisen in kanyo islen, bomili wa pisaw.
[37] Angkataw kangay piyagsabi sa kanyo in siyabi sa mga Agisolat keyen, Siyo piyaagem sa mga aleleng. Na kailangan ina mibaloy sa kangay, angkataw ngona agibaloy wa in agisolat panawen sa kangay.
[38] Siyabi in mga agadar keyen, Laki Kapwan, apo dowai ka pisaw. Keyen Isos, Sibay wa ina.
[39] Isos panaw wa sa bayan, kalbas kataw in kansiyo datiyan piyagpangwat siyo pataboy sa boksor Olibowan. Miyanggat in kansiyo mga agadar.
[40] Paka ista rateng kansiyo si yabi sa kansiro keyen, Kamo din mandalangin matang kamo idbatay piyagtepeng.
[41] Isos panaw sa kansiro anggan kadayo benglayan bato. Asin siyo agpaereng agpandalangin,
[42] keyen, Amang, no nges maal sa kaimo, na ayaw wa sa kangay anda pag kaidapan. Kamay ayaw in kangay beet in mibaloy, dayem in kaimo daan.
[45] Paka kalbas agpandalangin Isos tomaydek, pataboy wakay sa mga agadar. Kansiyo aratengan siro agpalpagesek apagodan angkataw maloba agpanremrem.
[46] Isos keyen, Nakay batang kamo agesek? Miyorog wa, mandalangin wa matang kamo idbatay piyagtepeng.
[47] Agiplaongan kay Isos agpaypanrateng wa in aronaw mangyan, in agpanokaw in piyagawit Odas, kaagem sa Labing Osai. Pasabangen siyo kay Isos, batay kiyapet.
[48] Keyen Isos sa kansiyo, Laki Odas, in agkapet sa kangay in kaimo mana padalan agpadakep sa Bodang Mangyan?
[49] Paka ngiitan in mga agadar sarig Isos in batay mibaloy siro keyen, Laki Kapwan, nakay, kami agpalang wa?
[50] In sogowan in mabwat pag poon sa mga sasirdoti piyalang wa in osai ka agadar, maagis in kansiyo talinga, in sa pamalang agbangen.
[51] Kamay keyen Isos, Siyana, ayaw wa ina. Kansiyo kiyapkap in talinga in sogowan, mibalay wakay.
[52] Miplaong Isos sa mga poon sasirdoti, osai sa mga poon mga agdamay sa balay lakoy Diyos, osai sa mga koyay in ista pataboy matang siyo dakepen. Isos keyen, Ako nakay, tolisan? Baina kamo malitaboy atai agbaba mga pisaw, mga garoti?
[53] Bago ibengibeng ako agpatoldo sa balay lakoy Diyos, kamo ista din, kamay ako yewed kanyo diyakep. Kamay ngona wa in kanyo kabetek. Agsakop wa in diyablo.
[54] Isos kansiro wa diyakep, biyaba sa balay in mabwat pag poon sa mga sasirdoti. Pidro mangagak sa kansiyo kamay adayonaw in paywaraan.
[55] In mga mangyan sa tongkodan agpoypoy baya, agpalpanokkaw, agpalpanayang. Pidro agiyagem sa kansiro.
[56] Siyo ngiitan osai ka sogowan kagbaiyan. Kalbas agriwa wa gayed sa kansiyo keyen, Ina pag mangyan sarig din Isos.
[57] Kamay Pidro aglaban keyen, Aa, yewed kangay atawanan ina.
[58] Paka dogay wakayte siyo ngiitan wakay in osai ka kaliyakiyan keyen, Kao din osai ka kansiyo sarig, aon? Kamay keyen Pidro, Aa yewed, laki.
[59] Kadalan wakay labi kayte kadogay agtongtong, in osai kay ka kaliyakiyan agpakarigen wa gayedte in piyagsabi keyen, Amatangan wa daan ngani siyo wa in sarig. Baina, siyo din taga Galiliya.
[60] Kamay keyen wakay Pidro, Laki, yewed kangay atawanan in kaimo piyagsabi. Siyo agiplaongan kay toloy wa tomalaok in manok.
[61] Patobang wa Isos agterek wa gayed kay Pidro. Toloy wakay riyemrem Pidro in siyabi in Kapwan sa kansiyo keyen, Bayo tomalaok in manok ngona daan pag yabi ako makatolo kaimo batay piyamangyan.
[62] Pidro pabokod wa, manangis wa gayed maloba.
[63] Isos piyagmesa osai piyamogbog in mga agdamay sa kansiyo.
[64] Tiyabon in kansiyo mata, siyabi keyen, Amba kaimo sabiyen no nakay in bomogbog sa kaimo.
[65] Labi kayno gayed siyo kansiro piyagsabiyan daet.
[66] Paka ibeng wa agkatipon in boo mga koyay, in mga poon sasirdoti, osai in mga agpatoldo in mga Batas. Siro in boo tanongan in mga Odyo. Kalbas Isos piyaadap, kansiro piyagosap.
[67] Siro keyen, Kaimo wa sabiyen sa kanyam, kao lames in Kiristo? Isos keyen, Kamayba siyabi sa kanyo, kamo idbatay daan maniwala.
[68] No kangay wakay tiyanong kamo, kamo idbatay daan somagot.
[69] Kamay ibat ngona in Bodang Mangyan batay tomokkaw sa pamalang agbangen Diyos in apo lakoy kabaloyan.
[70] Siro boo keyen, In kaimo mana beet siyabi kao in Bodang Diyos? Keyen wakay Isos, Kamo wa in agsabi, yewed ako.
[71] Keyen siro, Idwa kailangan kitam agpamangkit kay agpatonay. Kitam wa daan karengey in kansiyo wa daan agiplaong.