[1] Osai ka ibeng Isos agitaydek sa balabaan in dagatte Ginisarit. Siyo piyagliget wano in aronaw pag mga mangyan agkaparengey sa agiplaong Diyos.
[2] Siyo kangitan dowai ka bangka sa balabaan dagatte. In mga agpangisda lompot wa, agogas wa in kansiro mga lambat.
[3] Isos monaik sa osai ka bangka, omayay kay Simon in kapwan bangka keyen, In bangka pakaadayonawen kayte sa bowanginan. Kalbas Isos agtokkaw sa bangka agpatoldo sa mga mangyan.
[4] Paka Isos kalbas wa agiplaongan siyo keyen kay Simon, Amba, ista kayte pataboyen in kaimo bangka sa malayem, kanyo labowen wakay in kanyo mga lambat matang kabel isda.
[5] Simon keyen, Laki Agpamatoldo, kami karai boo yabi agpanawen, kamay kami idapono abel. Kamay panawen sa kaimo siyabi kangay wakay tagoli piyaglabo.
[6] Kalbas kansiro ngani liyabo in lambat. Kadogay in karowen in kansiro abel anggan batay wa agpangasida in lambat.
[7] Matang kansiro biyerya in kansiro mga katowang sa osai ka bangka keyen, Tolongen. Kalbas asin ngani pataboy. Makno isda in dowai ka bangka anggan agkalegmek wa.
[8] Paka ngiitan ina Simon Pidro, siyo patalegeb wa sa kay Isos bangen keyen, Laki Kapwan, kao ayaw sa kangay, angkataw ako daeten pag mangyan.
[9] Angkataw siyo agsoyo sa karowen in kansiro abel isda, kadayo in kansiyo mga sarig,
[10] kadayo din in kansiyo mga katowang Santiyago osai Owan in kay Sibidiyo mga bodang. Keyen Isos kay Simon, Ayaw agkalimo, laki, sogod ngona, idwa isda in kaimo piyagpamangkit no yewed mga mangyan wa.
[11] Paka in mga bangka piyabolalang wa sa balabaan dagatte siro miyanggat wa kay Isos. Kansiro wa biyaliwan in boote.
[12] In Isos sa osai ka bayan, apo osai ka kaliyakiyan kagwali piyagpanyakit. Paka Isos kansiyo ngiitan siyo maloba agpaselang, agayay kay Isos keyen, Laki, no kao beet agpaoraw sa kangay maskit, na kao kabaloy matang ako maal wakay miyanggat sa kangay mga kabelagan.
[13] Siyo kay Isos yaatang, keyen, Ako beet ngani, na dali, maoraw wa ngani. Kalbas toloy idapo wa ngani in kagwali panyakit.
[14] Keyen Isos, Ina ayaw kaimo pagsabiyen kamayba kay nakay pag mangyan, no yewed kao pataboy sa sasirdoti, papangkit, kalbas kaimo taboyen sa Diyos in siyabi sa Batas Mowisis, na batay atawanan in mga mangyan in kaimo maskit maoraw wa.
[15] Kamay in barita panawen kay Isos labi kay mistobo anggan aronaw wano pag mangyan agtipon sa bangen kay Isos matang agparengey sa kansiyo, osai matang paorawen in kansiro mga maskit.
[16] Kamay Isos mapret panaw, pataboy sa moyod agpandalangin.
[17] Osai ka ibeng in Isos agpatoldo sa osai ka balay, asin din agitokkaw mga Parisiyo osai mga agpatoldo in mga Batas. Siro batang sa mga bayan sa Galiliya, Odiya, osai sa Irosalim. Isos apo in kabaloyan in Kapwan matang agpaoraw sa mga rnaskit.
[18] Kalbas apo lomwas mga mangyan agosong sa yaiyan osai ka kaliyakiyan yewed wano kapaglebey. Siro agpilit nges misoroy sa balay matang in apo maskit piyasabangen kay Isos.
[19] Kamay idapo dalan panawen sa aronaw mangyan, matang siro monaik sa awakan balay, kansiro yoorak kiyalbot in atep, kalbas piyalooy in apo maskit sa yaiyan daan, anggan sa kagwaraan sa kabetek Isos.
[20] Paka ngiitan Isos in kalakoyen in siro agpasandig sa kansiyo, kansiyo siyabi sa apo maskit keyen, Laki, liibangaw wa in kaimo mga daet.
[21] In mga agpatoldo in mga Batas, osai in mga Parisiyo agremrem keyen, Nakay pag mangyan ina in aglibak kataw ina sa Diyos? Idapo batay kabaloy aglibangaw sa mga daet no yewed in Diyos waget.
[22] Kamay atawanan Isos in kansiro piyagremrem matang siyo keyen, Nakay batang kamo agremrem kataw ina?
[23] Nakay agbangen in yewed maidap sabiyen, in osai keyen, Liibangaw wa in kaimo mga daet, in osai keyen, Kao tomaydek wa, panaw?
[24] Amba kamo mangkit. Ako in Bodang Mangyan apo din kabaloyan atai sa kobat aglibangaw sa mga daet. Kalbas siyo miplaong wakay sa apo maskit keyen, Amba laki, kao tomaydek wa, babaen wakay in yaiyan, kao moli wa.
[25] Toloy tomaydek siyo, siro boo agpangkit. Biyaba wakay siyo in yaiyan, moli wa agmaal sa Diyos.
[26] Agsoyo siro boo, aglakonaw sa Diyos. Siro keyen, Ngona pag ibeng mga makasoyo wano in kantam ngiitan.
[27] Paka kalbas, Isos panaw, kansiyo ngiitan osai ka agpaningil bowis, in ngaran Libi, agtokkaw sa opisina paningilan bowis. Keyen Isos, Kao miyanggat sa kangay.
[28] Libi tomaydek, miyanggat kay Isos. Kansiyo biyaliwan in boote.
[29] Kalbas Isos piyangwatan Libi kainan lakoy sa kansiyo balay. Aronaw in asin mga agpaningil bowis osai in amat kay pag mga mangyan, agpaylanglangan.
[30] In mga Parisiyo osai in kansiro mga sarig in mga agpatoldo in mga Batas, siro agremrem daet, keyen sa kay Isos mga agadar, Nakay batang kamo agpaypalanglangan osai agpalineman sa mga agpaningil bowis, osai sa roma kay pag mga agpamangwat daet?
[31] Keyen Isos, In idapo maskit idapo kailangan agpanggamot, no yewed in apo maskit.
[32] Kaya ako atai pataboy yewed matang beryaen in mga keyen siro idapo daet, no yewed in mga apo daet, matang kansiro benglayen in kansiro mga daet.
[33] Apo mga agsabi kay Isos keyen, In mga agadar kay Owan mapret yewed agpamangan matang agpandalangin dogay, kadayo in mga agadar sa mga Parisiyo. Kamay in kaimo mga agadar agpamangan daan, aginem din.
[34] Keyen Isos, No apo kasalan na in mga kabelagan in batay lalaki idbatay kanyo apilit yewed mamangan anggan agyanggat kay in kaliyakiyan batay taybalang.
[35] Kamay dogayan batay piyagkowa in kaliyakiyan. Na paka siyo idapo wa, in kansiyo mga kabelagan idbatay wa agkoman.
[36] Kansiyo din siyabi sa kansiro in osai ka alimbawa keyen, Idapo batay agkowa sa bayo pag lambong matang piyabalay sa dogay wa pag lambong. No kataw ina na batay masida in bayo pag balokas, osai in bayo daeten sa pangkit sa dogay wa.
[37] Osai idapo din batay agsoroy sa dogay wa pagsoroyan balat in bayo pag alak, angkataw paka mistobo wa in bayo pag alak na batay mangkoltik in dogay wa pag soroyan balat. Na batay mabobo in alak, kadayo in pagsoroyan balat masida wa din.
[38] No yewed in bayo pag alak soroyen daan sa bayo pag balat.
[39] Osai in kainem wa sa dogay wa pag alak idapo wa agkabeet sa bayo pag alak angkataw in kansiyo remrem keyen, In dogay wa in masadap.