[1] Giisod Isos sa kansiro in osai ka alimbawa matang piyatoldo kailangan kitam baatte agpandalangin, ayaw abyatan remrem.
[2] Kansiyo siyabi keyen, Sa osai ka bayan apo tanongan. Siyo yewed agkalimo sa Diyos, yewed din agkalawagen sa mga mangyan.
[3] Asin din pag bayan apo osai ka kagbaiyan balo isagteisagte agpasabangen sa tanongan agateet keyen, Osapen wa in agpangwat daet sa kangay.
[4] In tanongan dogay kayte dayo agosap. Kamay paka dogay wa siyo manremrem keyen, Kamayba ako yewed agkalimo sa Diyos, yewed din agkalawagen sa mga mangyan,
[5] kangay wa batay piyagosap in sa balo kalaban panawen siyo agateet sa kangay, karam isag ako aidapan panawen siyo isagteisagte agateet.
[6] Kay Isos kay siyabi keyen, Kanyo arengeyan in siyabi in daeten pag tanongan.
[7] Na in Diyos labi kay agtolong sa kansiyo mga iidang, in agdaing sa kansiyo kamayba ibeng kadayo yabi. Siyo idbatay agpabeya agtolong sa kansiro.
[8] Kangay piyagsabi sa kanyo siyo toloy ngani batay agtolong sa kansiro. Kamay paka rateng wa ako in Bodang Mangyan atai pag kobat, ako lames batay apo ngiitan mga mangyan agpasandig sa kangay?
[9] Giisod din Isos osai ka alimbawa sa mga keyen siro idapo daet, piyagpaidapo kabolowan in roma.
[10] Keyen, Apo dowai ka kaliyakiyan monaik sa balay lakoy Diyos batay mandalangin. In osai Parisiyo, in osai agpaningil bowis.
[11] In Parisiyo tomaydek agpandalangin keyen, Diyos, ako agkaanggay sa kaimo angkataw ako yewed kataw in roma mangyan, mga agpanakaw, mga mayabang, mga agpanggaraw, yewed din kataw ina pag agpaningil bowis.
[12] Baatte looban ako makadowai yewed agkoman matang agpandalangin, osai sa boo kangay piyagkabel in kasampo piyagandog wa sa kaimo.
[13] Kamay in agpaningil bowis agtaydek sa adayonaw kayte, siyo agkarikoy agtangra sa langit, no yewed agpaereng wano keyen, Diyos, kao agpakayawte sa kangay, ako apo wano daet.
[14] Isos keyen kay, Na kangay piyagsabi sa kanyo in agpaningil bowis agbangen in siyo moli sa balay siyo piyagkaanggayan Diyos. In Parisiyo yewed. Angkataw in agpakabwat na siyo batay piyagpakabwatte, kamay in agpakabwatte na batay piyagpakabwat.
[15] In mga koyay agbaba kay Isos in kansiro mga bodangte matang kansiyo yaatang. In kangitan in mga agadar kansiro siyabiyan in mga koyay in mga bodang.
[16] Kamay biyerya Isos in mga koyay, piyasabangen sa kansiyo. Kalbas siyabi sa mga agadar keyen, In mga bodang pasabangenen sa kangay. Ayaw kanyo agayawen, angkataw sa mga kataw siro in Diyos agsakop.
[17] In kangay piyagsabi sa kanyo betek, kamayba nakay in yewed agpasakop sa Diyos kataw osai ka bodangte na siyo idbatay ngani sa sakopan Diyos.
[18] Osai ka poon miplaong kay Isos keyen, Laki Maal pag Agpamatoldo, nakay in maal kangay pangwaten matang ako apo boway idapo kalobosan?
[19] Keyen wakay Isos, Nakay batang ako kaimo piyagawit maal? Idapo maal no yewed in Diyos waget.
[20] Kao katawan in mga Batas keyen, Ayaw agpanggaraw, ayaw agpamono mangyan, ayaw agpanakaw, ayaw agsabi baribid, pagmaalen in kanyo mga koyay.
[21] Siyabi wakay in poon keyen, Ina pag boo kangay piyagpaniwalaan sigod ako kalakoyte kay.
[22] Paka karengey ina Isos siyo keyen, Osai kay in korang sa kaimo. Pabiliyen wa in boo kaimo mga sangkap, in abel kowarta taboyen wa sa mga maidap, na kao batay kabel mga sangkap sa langit. Kalbas kao atai wakay miyanggat sa kangay.
[23] Kamay in siyo karengey ina siyo agrongkot wa, angkataw siyo aronaw sangkap.
[24] Ngiitan Isos siyo agrongkot, kalbas siyabi keyen, Maidap sa aronaw mga sangkap in mibaloy bodang Diyos.
[25] Maidap komislot sa salay karayom in osai ka ayop lakoy piyagawit kamilyo, kamay labi kay maidap sa aronaw sangkap in pasakop sa Diyos.
[26] In mga mangyan karengey ina keyen, Na no kataw ina nakay in batay piyaboway?
[27] Keyen Isos, In idbatay mipangwat mangyan, ina agipangwat sa Diyos.
[28] Pidro miplaong keyen, Baanda, kanyam wa biyaliwan in kanyam pagoliyan matang miyanggat sa kaimo.
[29] Keyen wakay Isos, Totoo in kangay piyagsabi, no in mangyan in agbaliwan kansiyo pagoliyan, kansiyo babai, mga belag, mga koyay, mga bodang panawen sa sakopan Diyos,
[30] na siyo batay piyakan labi kay lakonaw ngona pag boway, osai dogayan in tiyaboy in boway idapo kalobosan.
[31] In Labing Dowai ka agadar piyasoway Isos sa karowan, siyabi sa kansiro keyen, Baanda kitam agtaboy wa sa Irosalim. Ista in boo siyolat in mga poropita panawen sa Bodang Mangyan batay mipangwat sa kangay.
[32] Ako batay tiyaboy sa mga yewed Odyo, batay kansiro piyagmesa, batay piyagsabiyan daet, batay piyagpanopayan.
[33] Ako batay kansiro biyogbog, batay biyono. Kamay sa katolo ka ibeng ako batay wakay piyaboway.
[34] Kamay in mga agadar idapo atawanan sa kansiro arengeyan, yewed kansiro abel in kansiyo beet siyabi, yewed kansiro atawanan no nakay in piyagsabi Isos.
[35] Paka Isos agkabangen wa sa bayan Iriko, ista apo osai ka kaliyakiyan beleg agtokkaw sa balabaan dalan, agpangayay.
[36] In kansiyo atawanan aronaw mangyan agdalan siyo keyen, Nakay batang ina?
[37] Keyen in mga mangyan, Aglawey Isos taga Nasarit.
[38] Kalbas siyo toloy mango keyen, Isos, Kasokponan Dabid, ako ayawte.
[39] Siyo siyabiyan in mga sa tokawan agbangen keyen, Ayaw aglalae. Kamay labi kay gayed piyakaksen in agpango keyen, Kasokponan Dabid, ako ayawte.
[40] Isos toloy tomaydek, siyabi keyen, Atai paanggaten in beleg. Paka siyo sa bangen wa, Isos keyen,
[41] Nakay in kaimo beet kangay pangwaten sa kaimo? Keyen, Laki, kangay nges beet ako kangitan wakay.
[42] Isos keyen wakay, Na kao kangitan wakay. Kaya kao maoraw panawen kao agpasandig sa Diyos.
[43] Ina daan siyo toloy wakay kangitan, agmaal sa Diyos, miyanggat wa kay Isos. Paka ina ngiitan in mga mangyan siro boo agmaal wa din sa Diyos.