[1] Osai ka betek Isos agpandalangin. Paka kalbas siyabi in osai ka kansiyo agadar keyen, Laki Kapwan, kami patoldowen mandalangin, kataw Owan agpatoldo sa kansiyo mga agadar.
[2] Siyabi Isos keyen, No kamo agpandalangin na keyen, Amang, kaimo waget ngaran in pagmaalen wa in boo. Kao wa ngani in agsakop sa boo.
[3] Kami pakanen in kanyam pamangnen sa ibengibeng.
[4] Osai kaimo wa libangawen in kanyam mga daet, angkataw kami aglibangaw sa mga daet piyagpangwat sa kanyam. Kami ayaw agpadalanen sa maloba pag tepeng. Kataw ina in agpandalangin.
[5] Isos agsabi kay sa kansiro keyen, Alimbawa, in osai sa kanyo pataboy sa osai ka belag kagwaraan yabi, keyen, Laki, ako pakanen pamangnen.
[6] Rateng osai ka belag batang sa adayonaw, kalbas ako idapo batay tiyaboy.
[7] Keyen wakay in sa galem balay, Ako ayaw agabaraen. Ako idbatay wa kaorog, angkataw agibengbeng wa in sakbawan, kami talnakiyan agpalibay wa. Ako idbatay kataboy pamangnen.
[8] Keyen Isos, Kangay piyagsabi sa kanyo kamayba siyo idbatay miyorog agtaboy panawen kamo agpaybelag, na sa kaimo pagpilit siyo batay ngani miyorog, agtaboy in boo kaimo piyagayay.
[9] Kangay piyagsabi sa kanyo kamo mangayay sa Diyos, kamo batay piyagpakan. Kamo mamangkit, kamo batay kangitan. Kamo merya, kamo batay piyaonaik.
[10] Angkataw in mangayay batay piyakan, in mamangkit batay kangitan, in merya batay piyaonaik.
[11] Kamo in mga amang, no kanyo bodang agayay isda, na nakay, idbatay kanyo piyakan olay, aon?
[12] No siyo omayay itlog, na idbatay kanyo piyakan alipan, aon?
[13] Na no kamo, kamayba daeten, katawan agtaboy maalno sa kanyo mga bodang, na labi kay in kantam Amang sa langit, siyo batay agtaboy in Betek pag Abyan sa mga agayay sa kansiyo.
[14] Osai ka betek Isos agboyaw osai ka mamaw sa kaliyakiyan yewed kaiplaong. Paka panaw wa in mamaw in kaliyakiyan kaiplaong wakay. In mga mangyan agsoyo.
[15] Kamay in kalaati keyen, Kaya Isos kabaloy agboyaw mga mamaw panawen siyo piyakan kabaloyan Bilsibol in poon mga mamaw.
[16] In amat wakay beet agtepeng sa kansiyo matang siro agsabi keyen, Kao agpangwat makasoyo matang kanyam atawanan kao siyogo Diyos.
[17] Kamay Isos katawan in kansiro piyagremrem, matang siyo keyen, In baatte sakopan no agpalawayan na batay masida, kalbas no in mga talnakiyan agpalawayan na batay din masida.
[18] Na kataw din ina Katanas, no aglaban sa kansiyo sadiri na batay masida in kansiyo sakopan. Kaya ako keyen, angkataw kamo agsabi keyen ako piyakan Bilsibol kabaloyan agboyaw mga mamaw.
[19] No kanyo piyagsabi in Bilsibol in agpakan kabaloyan sa kangay agboyaw mamaw, na in galem ina pag siyabi kadayo in mga agpaniwala sa kanyo, batang din kay Bilsibol in kansiro kabaloyan agboyaw mamaw. Na siro wa din in batay agsabi keyen, Kamo baribid.
[20] Kamay no in Abyan Diyos in agpakan sa kangay in kabaloyan agboyaw mga mamaw, na in beet siyabi in Diyos agparakay wa agpapoon sa kanyo.
[21] No osai ka mangyan maeyat apo torag in agdamay sa kansiyo balay, na in kansiyo mga sangkap idbatay matakaw.
[22] Kamay no siyo alowasan osai ka mangyan labi kay maeyat sa kansiyo, kalbas siyo diyaeg, kiyowa wa in kansiyo torag kansiyo pagpasandigan, na kansiyo mga sangkap batay yaagaw kalbas piyamagi wa.
[23] In yewed agiyagem sa kangay na aglaban sa kangay, osai in yewed agtolong sa kangay agtipon in paray, na siyo agpanripatak.
[24] No osai ka mamaw biyoyaw wa sa osai ka mangyan, siyo agipanawan sa mga batowen pag kobat, agpamangkit pagbalayan. No siyo idapo ngiitan, na siyo batay keyen, Ako batay moli sa kangay batang pagbalayan.
[25] Paka siyo rateng wakay sa mangyan, kansiyo ngiitan in balay piyakapya wa, maalen.
[26] Na siyo panaw wakay batay kay agpaanggat pito ka mamaw labi kay kaloba siyo. Siro batay misoroy, ista wa agbalay, matang in piyaglowasan maloba wa gayed labi kay sa datiyan.
[27] Isos agiplaong kay, apo kagbaiyan sa karowanan mango keyen, Agkaanggay in kagbaiyan agbaba sa kaimo sa kansiyo boyon osai agpasoso sa kaimo.
[28] Kamay keyen Isos, Labi kay agkaanggay in mga agparengey osai agpaniwala sa agiplaong Diyos.
[29] Aronaw kay in mga mangyan agpaypanrateng, Isos keyen, Daeten wano in ngona pag mga mangyan. Siro agayay in makasoyo pag panawen kamay idapo batay piyapangkit sa kansiro no yewed in makasoyo pag mibaloy kay Onas.
[30] No nangkataw Onas mibaloy tanda sa agrateng parosa sa mga taga Ninibi, na kataw daan din ina ako in Bodang Mangyan batay tanda sa mga mangyan agkaboway ngona.
[31] Sa Ibeng Agparosa batay tomaydek in kagbaiyan poon lakoy sa kobat Siba agsabi keyen in ngona pag mga mangyan parosaen. Angkataw siyo batang sa balabaan kobat matang parengeyen in kay Solomon katawanan. Kamay ngona apo atai labi kay kalakoy in kay Solomon katawanan.
[32] Sa Ibeng Agparosa in mga taga Ninibi batay agtaydek agsabi keyen in ngona pag mga mangyan parosaen. Nangkataw in Onas agpatoldo sa kansiro, na kansiro biyenglay in kansiro mga daet. Kamay ngona apo atai labi kay kalakoy in kay Onas piyagpatoldo.
[33] In agparaet tinglaw idbatay agbetang, idbatay agpabolalang sa galem baldi, dayem sa datiyan daan pagpamabolalangan, matang no apo misoroy mangyan piyagngitan in agrawa.
[34] In kantam mata in kagwali tinglaw sa kantam bilog. Na no matarem in kantam mata na piyagrawaan in boo kantam galem. Kamay no malabo in kantam mata na in kantam galem boo wa din agkalenedan.
[35] Na kamo agingat, karam in kanyo rawa mibaloy wa lened.
[36] No kantam boo galem sa piyagrawaan, yewed agkalenedan, na ina agkarawaan gayed, kagwali piyagrawaan tinglaw makasolap.
[37] Paka Isos kalbas wa agiplaong, siyo piyanaya sa balay osai ka Parisiyo batay agkoman. Misoroy siyo sa balay, tomokkaw batay agkoman.
[38] In Parisiyo agsoyo, angkataw kansiyo ngiitan Isos agkoman idwa yoogas in bakwaw kataw in ogali piyatoldo kansiro mga kakoyayan.
[39] Siyabi sa kansiyo in Kapwan keyen, Kamo mga Parisiyo, kanyo piyagogas in awak in kanyo mga pagyanganan, kamay in kanyo galem agkatakaw, daeten wano.
[40] Kamo idapo bait. In agpangwat in awak pagyanganan, siyo din in agpangwat in galem.
[41] Kamay kanyo taboyen sa mga maidap in mga galem pagyanganan, matang batay maalno in boote sa kanyo.
[42] Lakonaw in batay parosa sa kanyo, kamo in mga Parisiyo. Kamo agtaboy sa Diyos in kasampo ka bilog mga baranoy, mga tanglad, osai in boo mga golayen, kamay idwa kanyo piyagpangwat in betek sa mga roma mangyan, osai idwa agkabeet sa Diyos. Ina pag mga lakonaw in kailangan ngani kanyo pangwaten, kamay ayaw din kanyo kalibangawanen in agtaboy in kasampo.
[43] Lakonaw in batay parosa sa kanyo, kamo in mga Parisiyo. Angkataw kanyo piyagkaanggay in agtokkaw sa maal pagpanokkawan sa mga balay pagpaniponan. Kamo agkaanggay no kamo in piyagpakalakonaw in mga mangyan sa mga bayan.
[44] Lakonaw in batay parosa sa kanyo, angkataw kamo kagwali mga lebengan idapo tanda, piyagpanlaedan in mga mangyan idapo katawan.
[45] Kalbas siyabi sa kansiyo in osai ka agpatoldo in mga Batas keyen, Laki Agpamatoldo, sa kaimo siyabi kataw ina na kadayo din kami in kaimo piyagpasaenan.
[46] Kalbas siyabi Isos keyen, Lakonaw din in batay parosa sa kanyo, kamo in mga agpatoldo in mga Batas. Angkataw kanyo piyagpababa sa mga mangyan in mabyat pag mga palnowan, kamay kamo dayo mamaglebey, kadayote in solo dayo agtolong.
[47] Lakonaw in batay parosa sa kanyo angkataw kanyo piyagpakapya in mga lebengan in mga poropita biyono tangona kanyo mga kakoyayan.
[48] Sa kataw ina kamo agpapangkit kamo agiyagem sa piyangwat kanyo mga kakoyayan tangona. Angkataw siro in agbono sa mga poropita, kamo wakay agpakapya in mga lebengan.
[49] Apo agisolat sa osai ka aklat piyagawit In Katawanan Diyos keyen, Ako batay agsogo sa kansiro mga poropita, osai mga katiwala. In kalaati kansiro batay biyono, in kalaati wakay batay piyagpangwatan daet.
[50] Na in mga mangyan agkaboway ngona in batay piyarosaan panawen sa agbono sa boo mga poropita sogod piyangwat in kobat,
[51] sogod biyono Abil anggan din biyono Sakaryas sa paywaraan in pagsonogan andog osai in balay lakoy Diyos. Kangay ngani piyagsabi batay wa daan piyarosaan in mga mangyan agkaboway ngona panawen asin pag boo mga biyono.
[52] Lakonaw in batay parosa sa kanyo, kamo in mga agpatoldo in mga Batas, angkataw kanyo yeeleg in dalan matang in mga mangyan yewed karengey in katawanan Diyos. Kamo dayo maniwala asin, kalbas kanyo kay piyagayaw in mga mangyan beet maniwala.
[53] Isos panaw asin pag balay. Kalbas sogod asin in mga agpatoldo in mga Batas, osai in mga Parisiyo maloba wa aglaban kay Isos, baatte siyo piyagtanong makakarowan,
[54] matang nges siyo abel sa kansiyo mga agiplaong.