[1] Laki Koyay Tiyopilo, aronaw wa in agpilit somolat in mga mibaloy atai sa kanyam.
[2] In kansiro siyolat batang sa mga siyabi in mga kangitan osai agpatoldo ina sigod sa parakayan.
[3] Ina pag boo kangay din piyamangkit gayed maal sogod sa parakayan, matang kangay remrem maal din ako agsolat wa sa kaimo, toloytoloy in kowinto.
[4] Matang kaimo atawanan betek ngani ina pag mga piyatoldo sa kaimo.
[5] In betek Irodis in poon lakoy sa Odiya, apo osai ka sasirdoti in ngaran Sakaryas sa kay Abiyas barkadaan mga sasirdoti. In kansiyo babai in ngaran Ilisabit. Siro tanan kasokponan Aaron,
[6] tanan din makaanggay sa pangkit Diyos, agogali in boo mga Batas osai bilin in Kapwan.
[7] Siro idapo bodang, kataw Ilisabit baog, siro tanan wate koyayte.
[8] Ina pag betek in barkadaan kora Sakaryas in apo panawen sa balay lakoy Diyos.
[9] In ogali in mga sasirdoti siro agposta no nakay in batay agsonog in mala masadap. Sakaryas in mandaeg matang siyo misoroy wa sa kabetek tiyalaga sa Diyos.
[10] Sa betek piyagsonog in mala masadap, in boo mangyan sa tongkodan agbangen agpandalangin.
[11] Bayo katawan papangkit kay Sakaryas osai ka angil batang sa Kapwan, agtaydek sa bangen in pagsonogan mala masadap, sa kay Sakaryas pamalang agbangen.
[12] Alimowan Sakaryas in siyo kangitan in angil, siyo agkalimo gayed.
[13] Kamay keyen in angil, Ayaw agkalimo, Sakaryas. In Diyos agparengey sa kaimo pandalangin. Kamo osai Ilisabit batay apo bodang kaliyakiyante. Owan in kaimo taboyen ngaran.
[14] Kao batay agkaanggay wano. Paka siyo biyoslot wa na aronaw din in batay anggayan,
[15] angkataw siyo batay lakonaw sa pangkit Diyos. Siyo piyagayaw aginem alak, kamayba nakay pag piyaginem makalasing. Sogod siyo biyoslot siyo piyagbalayan wa in Betek pag Abyan.
[16] Bonton sa mga kasokponan Israil kansiyo batay piyagpaoli sa Kapwan sa kansiro Diyos.
[17] Siyo batay tokaw sa Kapwan, apo in bait osai in kabaloyan Iliyas in poropita, matang maybelagen wakay osai in mga koyay osai in mga bodang. Osai in mga aleleng batay wakay piyagpaoli sa betek pag mga ogali. Kataw ina in sa Kapwan pag mga mangyan kansiyo batay siyandata sa kansiyo.
[18] Siyabi Sakaryas sa angil, Nangkataw kangay batay matiyak ina batay ngani mibaloy? Angkataw ako koyayte wa, kadayo kangay babai.
[19] Kalbas keyen wakay in angil, Ako Gabril, in agpanawen sa pangkit Diyos. Siyo in agsogo sa kangay matang tomonton sa kaimo anda pag maalno pag barita kangay siyabi sa kaimo.
[20] Ina ngani batay mibaloy anggan sa rateng in kabetek. Kamay kataw kao yewed maniwala sa kangay siyabi, na kao batay yewed kaiplaong, anggan sa ibeng ina mibaloy.
[21] Anggan in mga mangyan agpanaya kay Sakaryas, siro agsoyo no nakay batang siyo kadogay ina sa galem in kabetek tiyalaga sa Diyos.
[22] Paka siyo lomwas wakay siyo idwa kaiplaong sa kansiro. Siyo agribway waget kansiyo bakwaw, agpatonay siyo idwa kaiplaong. Matang siro katawan siyo apo ngani ngiitan sa kabetek tiyalaga sa Diyos.
[23] Paka kalbas wa in kabetek siyo agpanawen, siyo moli wakay.
[24] Yewed kayte dogay Ilisabit bonting wa. Siyo idwa agipanawan anggan lima ka bolan.
[25] Kalbas siyo keyen, Ngona ako piyagpakayawte in Kapwan. Anda kansiyo piyangwat matang ako idwa agkarikoy sa adap mga mangyan.
[26] Paka kaenem wa ka bolan in kay Ilisabit bonting, in angil Gabril siyogo in Diyos sa bayante Nasarit sa kobat Galiliya.
[27] Siyo siyogo agbaba barita sa osai ka daraga in ngaran Mariya. Siyo batay wa kiyasal kay Osi, osai ka kaliyakiyan kasokponan in poon lakoy Dabid.
[28] Pasabangen in angil kay Mariya, siyabi keyen, Kataw nakay wa kao? In Kapwan agkaanggay sa kaimo, siyo agyanggat sa kaimo.
[29] Kamay Mariya ariyaban asin pag siyabi. Siyo agpanremrem wano no nakay in beet siyabi ina.
[30] Kamay siyabi in angil, Kao ayaw alimowan, Mariya. Angkataw in Diyos agkaanggay sa kaimo.
[31] Baina, kao batay bonting, batay apo bodang kaliyakiyante. Kaimo taboyen ngaran Isos.
[32] Siyo batay lakonaw, batay piyagawit Bodang Diyos in Mabwat sa boo. Batay piyasakop sa kansiyo Diyos Kapwan in boo sakopan kansiyo kakoyayan Dabid.
[33] Siyo batay agpapoon lakoy sa mga kasokponan Akob anggan idapo kalobosan. In kansiyo agpoon idapo kalobosan.
[34] Keyen Mariya, Nangkataw batay mibaloy ina? Ako dayem daraga.
[35] Keyen in angil, Batay rateng sa kaimo in Betek pag Abyan. Kao batay riirongan in kabaloyan Diyos in Mabwat lakoy sa boo, matang in kaimo batay bodang betek ngani sa Diyos. Siyo batay piyagawit Bodang Diyos.
[36] Kaimo atawanan in kaimo kabelagan Ilisabit, siyo datiyan piyagawit baog, kamay ngona siyo bonting, ngona kaenem wa ka bolan, kamayba koyay wa.
[37] Angkataw sa Diyos in boo agibaloy.
[38] Keyen Mariya, Ako in sogowan in Kapwan. Kalobante mibaloy sa kangay in kaimo siyabi. Kadogay siyo biyaliwan wa in angil.
[39] Ikkayte dogay Mariya agkabiglaan agtaboy sa kobat Odiya, sa osai ka bayante sa agbaw.
[40] Paka siyo misoroy sa balay Sakaryas, siyo miplaong kay Ilisabit.
[41] Paka Ilisabit karengey kay Mariya miplaong toloy agpaglebeyan in bodangte sa kansiyo boyon. Toloy misoroy kay Ilisabit in Betek pag Abiyan.
[42] Siyo miplaong maksen keyen, Sa boo mga kagbaiyan kao in piyagmaal, osai piyagmaal din in bodang sa kaimo boyon.
[43] Ako nakay matang piyangkit in inang kangay Kapwan?
[44] Baina in ako karengey kaimo agiplaong in bodang sa kangay boyon toloy agkaanggay agpaglebeyan.
[45] Kao agkaanggay kataw kao maniwala keyen batay mibaloy in siyabi sa kaimo in Kapwan.
[46] Keyen Mariya, In kangay galem agmaal sa Kapwan.
[47] Kangay abyan agkaanggay sa Diyos in agpamaboway sa kangay.
[48] Panawen ako kansiyo piyagmaal, kamayba ako in kalakoyte pag kansiyo sogowan. Na sigod ngona in boo mga kasokponan batay agsabi keyen ako in agkaanggay,
[49] panawen sa lakonaw pag mga piyangwat sa kangay in Apo Kabaloyan. Pagmaalen in kansiyo ngaran.
[50] Kansiyo piyagpakayawte in mga agmaal sa kansiyo, sa boo mga kasokponan.
[51] Kansiyo piyapangkit in kaeyaten kansiyo bakwaw. Kansiyo kiyalat in mga agpakabwat remrem.
[52] In mga poon lakoy kansiyo piyakalakoyte. In mga wakay kalakoyte kansiyo piyakalakoy.
[53] Kansiyo piyabosog in mga maalno in mga agkayawes. In mga mayaman agbangen kansiyo piyapanaw idapo piyagbaba.
[54] Kansiyo tiyolong in mga kasokponan Israil in kansiyo sogowan, matang mibaloy in kansiyo pangako sa kantam mga kakoyayan,
[55] kay Abraam, osai sa kansiyo mga kasokponan anggan idapo kalobosan.
[56] Mariya agpamataw kay kora Ilisabit anggan mga tolo ka bolan, kalbas siyo moli wakay sa kansiyo kobat.
[57] Rateng wa in kabetek Ilisabit agboslot wa. In lomwas kaliyakiyante.
[58] Abaritaan in mga agbalay sa kansiro bangen, osai in mga kabelagan keyen, Ilisabit piyagpakayawte wano in Kapwan. Siro boo agkaanggay sa kansiyo.
[59] Sa kawalo ka ibeng siro asin pataboy angkataw piyagtoli in bodang. Siyo kansiro nges batay piyagawit Sakaryas kataw kansiyo amang.
[60] Kamay siyabi in inang keyen, Ayaw ina. Owan in batay kansiyo ngaran.
[61] Siro keyen, Kamay sa kanyo kabelagan idapono piyagawit kataw ina.
[62] Kalbas siro agkimkimot sa amang, agtanong no nakay in kansiyo beet piyangwat ngaran in bodang.
[63] Sakaryas mangayay pagsolatan, kalbas siyo somolat keyen, Kansiyo ngaran Owan. Siro boo agsoyo.
[64] Kalbas toloy wakay kaiplaong Sakaryas. Siyo toloy agmaal sa Diyos.
[65] Agsoyo in boo agbalay sa kansiro bangen, ina boo piyaggisod wa sa boo kobat Odiya sa agbaw.
[66] Ina piyanremrem gayed in boo mga karengey, atawanan wa gayed sa kansiyo ngani in Kapwan. Matang siro keyen, Batay lames nakay ina pag bodang?
[67] In kansiyo amang Sakaryas maeyat in remrem batang sa Betek pag Abyan, piyaiplaong keyen,
[68] Pagmaalen in Kapwan in kay Israil Diyos, angkataw kansiyo tiyolong, kansiyo piyalpas in kansiyo mga mangyan.
[69] Kansiyo tiyaboy sa kantam osai ka Agpamaboway apo kabaloyan, batang sa kasokponan Dabid kansiyo sogowan.
[70] Kataw in piyangako tangona in Diyos siyabi in kansiyo maal wano pag mga poropita
[71] keyen, Kamo batay kangay Piyagpaboway sa kanyo mga kaaway, sa boo agkagalit sa kanyo.
[72] Kansiyo din piyangako batay din piyagpakayawte in kantam mga kakoyayan. Kansiyo wakay batay piyanremrem in kansiyo mga maal wano pag kasondowan.
[73] Kansiyo piyarigen wano in kansiyo pangako kay Abraam, kantam kakoyayan.
[74] keyen kitam batay kansiyo piyaboway sa kantam mga kaaway, matang kitam idapo piyagkalimo, kitam kasamba sa kansiyo.
[75] matang din kitam maal wano, betek gayed sa kansiyo pangkit, anggan kitam agkaboway kay.
[76] Laki bodangte, kao batay piyagawit poropita batang sa Mabwat lakoy sa boo. Angkataw kao in batay tokawan sa Kapwan, matang sandataen in kansiyo batay dalan.
[77] Osai agpatoldo sa kansiyo mga mangyan siro batay piyaboway, angkataw kansiro mga daet liibangaw.
[78] Angkataw maloba wano agpakayawte in kantam Diyos. Kitam batay piyaboway. Ina batay kagwali aglowas wa in ibeng,
[79] agrawa sa mga agkalenedan, osai sa mga bangen wa matay, matang kitam piyagsarig sa apyaan pag dalan.
[80] Mistobo in bodang, osai maeyat kansiyo abyan. Siyo agbalay wa sa moyod anggan sa kabetek siyo papangkit wakay sa mga kasokponan Israil.