[1] Isos rateng wa sa Iriko, agipanaw sa galem bayan.
[2] Asin apo osai ka aronaw sangkap in ngaran Sakiyo. Siyo osai ka poon sa mga agpaningil bowis.
[3] Siyo agpilit kangitan kay Isos no kagwali nakay Isos, kamay idbatay kansiyo ngiitan panawen siyo pendek, kataw karowan in mangyan.
[4] Kalbas siyo domalagan wa manokaw, monaik sa osai ka yangaw matang isag Isos asin agdalan siyo ngiitan.
[5] Paka Isos asina wa betek siyo manangra, siyabi keyen, Laki Sakiyo, dali wa, lompot wa, kataw ngona kailangan ako mesek sa kaimo balay.
[6] Siyo maykalaliyan wa lompot, agkaanggay wano agpabelag kay Isos. Kalbas siro maysarigan wa sa balay.
[7] In boo kangitan ina agpaypanremrem keyen, Nakay batang Isos misoroy batay agesek sa balay in osai ka daeten pag mangyan?
[8] Sakiyo tomaydek, miplaong keyen, Laki Kapwan, in kalaati kangay mga sangkap kangay wa piyagtaboy sa mga maidap. Osai no ako apo piyadaya na makaopat kangay batay piyagpaoli sa kansiyo.
[9] Panawen asin pag siyabi keyen Isos kay Sakiyo, Ngona pag ibeng piyaboway wa in kaimo talnakiyan angkataw kamo kasokponan din Abraam.
[10] Angkataw ako in Bodang Mangyan atai pataboy matang pamangkiten osai pabowayen in mga malibangaw.
[11] Kataw agparengey kay in mga mangyan giisod Isos osai ka alimbawa, angkataw siyo agkabangen wa rateng sa Irosalim, kalbas in remrem in mga mangyan keyen toloy wa batay agpapoon in Diyos.
[12] Siyo keyen, Apo osai ka mangyan apo tongkolin batay pataboy sa adayonaw pag kobat matang piyangwat poon lakoy. Kalbas paka siyo poon wa siyo batay wakay moli.
[13] Bayo siyo panaw kansiyo biyerya in sampo sa kansiyo mga sogowan. Sa baatte osai kansiyo piyaalapet in osai ka kowarta in kalakoyen tolo ka bolan agpanawen. Siyo keyen, Ina kanyo paistobowen anggan ako rateng.
[14] Kamay in kansiyo mga kabelagan agkabais sa kansiyo. Paka siyo panaw siro agsogo mga mangyan agsabi sa batay agpangwat poon sa kansiyo keyen, Kami dayo ina pag mangyan agsakop sa kanyam.
[15] Kamay siyo piyangwat din poon lakoy. Siyo moli wa, kalbas kansiyo biyerya in kansiyo mga sogowan piyaalapetan kowarta, matang kansiyo atawanan no nangkalakoy in mistobo sa baatte osai.
[16] Pasabangen in osai, kalbas siyo keyen, Laki, in kaimo piyaalapet kowarta sa kangay mistobo anggan sampo.
[17] Keyen in poon, Aa yadi, kao maal pag sogowan. Kataw kao yewed aglimbang sa kalakoyte na kao kangay piyagpangwat poon sa sampo ka bayan.
[18] Pasabangen wakay in kadowai. Siyo keyen, Laki, in kaimo piyaalapet kowarta sa kangay mistobo anggan lima.
[19] In poon keyen, Na kao kangay piyagpangwat poon sa lima ka bayan.
[20] Pasabangen wakay in katolo ka sogowan. Siyo keyen, Laki, in kaimo kowarta anda daan. Kangay tiyeem sa osai ka panyo, kalbas kangay biyetang.
[21] Ako agkalimo sa kaimo nangkataw kao matapang pag mangyan. Kaimo piyagkowa in yewed kaimo, kaimo piyagani in yewed kaimo yaasik.
[22] Siyo siyabiyan in poon keyen, Kao daeten pag sogowan. Sa kaimo siyabi, asin daan kao kangay piyagparosa. Kaimo atawanan ako matapang. Kaimo piyagsabi kangay piyagkowa in yewed kangay, kangay piyagani in yewed kangay yaasik.
[23] Na nakay batang in kangay kowarta yewed kaimo siyoroy sa bangko, matang no ako rateng wakay kangay batay makowa In kangay kowarta anggan in pakinabang?
[24] Kadogay kansiyo siyabi sa mga asina keyen, Kanyo kowaen sa kansiyo in kowarta, kalbas taboyen sa apo sampo.
[25] Siro keyen, Laki, siyo apo wa sampo ka kowarta.
[26] Keyen wakay in poon, Kangay piyagsabi sa kanyo, in baatte apo na piyagpakan kay, kamay in idapo na kadayo in agitera sa kansiyo piyagkowa wa din.
[27] Kamay in mga aglaban sa kangay, in mga dayo pasakop sa kangay, siro atai babaen, kalbas bonowen sa kangay pangkit.
[28] Paka ina masabi wa Isos, na siyo tokaw wa pataboy sa Irosalim.
[29] In siyo bangen wa sa mga bayante Bitpagi osai Bitanya sa boksor Olibowan, kansiyo siyogo in dowai ka agadar.
[30] Kansiyo siyabi keyen, Kamo pataboy ista pag bayante. Sa soromokan wa kanyo batay ngiitan piyageket osai ka asno. Siyo bodang kay, yewed kay batang siyakayan mangyan. Kanyo lowaten, babaen atai.
[31] No apo agtanong kanyo keyen, Nakay batang kanyo piyaglowat, na sabiyen, Piyagkailangan in Kapwan.
[32] Panaw wa in dowai ka sogowan, kansiro ngani ngiitan in asno kataw in siyabi Isos.
[33] In kansiro piyaglowat in asno, in mga kapwan keyen, Nakay batang kanyo piyaglowat ina?
[34] Siro keyen, Piyagkailangan in Kapwan.
[35] In asno biyaba wa kay Isos, in kansiro mga islen piyadamig sa awak in asno, kalbas Isos piyasakay.
[36] Agipanaw wa Isos, piyadamig wakay in mga mangyan in kansiro mga islen sa kansiyo batay dalan.
[37] Paka bangen wa sa bayan lakoy, agongali wa sa boksor Olibowan, agpalkaanggayan in karowan mga agadar, maksen agmaal sa Diyos panawen sa kansiro mga ngiitan in boo mga makasoyo.
[38] Siro keyen, Pagmaalen in poon lakoy in agrateng apo piyagbaba in kabaloyan in Kapwan. Apyaan sa langit. Pakalakonawen in Diyos sa langit.
[39] Apo mga Parisiyo sa karowan miplaong kay Isos keyen, Laki Agpamatoldo, kaimo sabiyanen in kaimo mga agadar.
[40] Keyen wakay Isos, Kangay piyagsabi sa kanyo, no siro idwa agiplaong, na in mga bato wa in batay mango.
[41] Paka Isos bangen wa sa Irosalim, kansiyo wa piyagngitan, siyo manangis wa
[42] keyen, Dayem nges kanyo atawanan ngona pag ibeng no nakay in padalan matang kamo apyaan. Kamay yewed. Ina ngona piyagbengbeng wa sa kanyo remrem.
[43] Agrateng in mga ibeng kamo batay piyagbengbeng in mga aglaban sa kanyo, siro batay agribok sa kanyo anggan idapo wa batay dalan kamayba saano agbangen.
[44] Kamo in mga agbalay asin pag bayan, kamo boo batay biyono, kanyo bayan riipor anggan. Idapo wa batay mitera bato agisapaw sa osai wakay ka bato. Angkataw yewed kanyo atawanan in agrateng in Agpamaboway.
[45] Isos misoroy sa balay lakoy Diyos. Kalbas piyamoyaw in mga asin agpamabili.
[46] Kansiyo siyabi sa kansiro keyen, In siyabi in mga Agisolat keyen, Keyen in Diyos, In kangay balay, balay pagpandalanginan. Ina in siyabi kamay anda pag balay kanyo piyangwat pagpatagowan mga agpanakaw.
[47] Isos ibengibeng agpatoldo sa balay lakoy Diyos. In mga poon sasirdoti osai in mga agpatoldo in mga Batas, osai in mga koyay sa mga mangyan, siro agpamangkit padalan matang siyo mabono.
[48] Kamay siro idapo ngiitan padalan no nangkataw ina batay mibaloy, angkataw in mga mangyan boo agkasadapan agparengey sa kansiyo.