[1] Tomaydek in boo mga koyay, Isos kansiro biyaba kay Pilato.
[2] Piyarakay kansiro siyombong keyen, Kanyam abel anda pag kaliyakiyan agrengke sa mga mangyan agsonggar sa batas. Siyo agayaw agbayad bowis kay Sisar, kansiyo din piyagsabi siyo in Kiristo, osai ka poon lakoy.
[3] Siyabi Pilato kay Isos keyen, Kao lames in poon lakoy in mga Odyo? Siyabi Isos keyen, Kao wa in agsabi.
[4] Siyabi Pilato sa mga poon sasirdoti kadayo din sa mga mangyan keyen, Ako idapo ngiitan daet asin pag mangyan.
[5] Kamay siro agpilit kay keyen, Panawen sa kansiyo mga piyatoldo kansiyo piyagrengke in boo mga mangyan atai sa kobat Odiya agsonggar sa batas. Agparakay sa Galiliya, kalbas ngona atai wa sa Irosalim.
[6] Paka Pilato karengey ina siyo keyen, Isos mana taga Galiliya?
[7] Paka kansiyo atawanan Isos batang sa sakopan Irodis in poon lakoy sa Galiliya Isos kansiyo piyababa kay Irodis. Angkataw ina pag betek Irodis sa Irosalim.
[8] Paka Isos ngiitan, Irodis agkaanggay wano, angkataw makarowan wa siyo mga abaritaan panawen kay Isos, kalbas dogay wa kansiyo beet ngiitan. Kansiyo piyagpanaya Isos agpangwat makasoyo, beet kansiyo ngiitan.
[9] Matang Isos kansiyo piyagbotog anggan, kamay yewed meles kamayba kalakoyte.
[10] Agaway kay din in mga poon sasirdoti osai in mga agpatoldo in mga Batas, siro yewed agempet Isos piyagsombong.
[11] Isos piyagmesa piyaglibak Irodis kadayo in kansiyo mga sondalo, siyoroy sa kansiyo maalen wano pag lambong. Kalbas Isos piyaoli wakay kay Pilato.
[12] Datiyan agpalaway osai Irodis osai Pilato, kamay ina pag ibeng siro agpaybelag wa.
[13] Piyaberya Pilato in mga poon sasirdoti, kadayo in mga koyay, anggan in mga mangyan.
[14] Kalbas siyabi keyen, Anda pag kaliyakiyan kanyo piyaadap sa kangay, kanyo piyagsabi keyen siyo agrengke sa mga mangyan agsonggar sa batas. Kamay ngona siyo kangay biyotog sa kanyo adap, kalbas kangay ngiitan in kanyo piyagkabintang sa kansiyo yewed betek.
[15] Kadayo Irodis idapo ngiitan daet sa kansiyo, matang siyo piyaoli wakay sa kangay. Siyo idapo daet, siyo yewed maal biyono.
[16] Na siyo kangay piyagpabogbog kalbas piyagpalpas.
[18] Kamay siro mayraesan mango keyen, Ina pag mangyan bonowen. Barabas in palpasen.
[19] Kaya Barabas mabilanggo panawen siyo agsonggar sa batas osai agpanggolo sa Irosalim, panawen din siyo agbono mangyan.
[20] Pilato miplaong wakay sa kansiro panawen kansiyo beet Isos palpasen.
[21] Kamay in mga mangyan mango kay keyen, Pakowen sa kodos, siyo pakowen sa kodos.
[22] Sa katolo kay Pilato siyabi keyen, Nakay batang? Nakay in kansiyo piyangwat daet? Ako idapo ngiitan daet matang siyo piyabono, na siyo kangay piyagpabogbog kalbas piyagpalpas.
[23] Kamay siro labi kay malpangowan keyen, Isos pakowen ngani sa kodos. Kalbas in kansiro pango mandaeg.
[24] Matang Pilato agsogo wa keyen, Siyo bonowen wa.
[25] Kansiyo piyalpas in mangyan mabilanggo panawen Sa agpanggolo osai agsonggar sa batas, osai agbono din mangyan, angkataw ina in kansiro piyagayay. Kamay Isos kansiyo tiyaboy sa kansiro matang pangwaten in kansiro beet.
[26] In kansiro piyaanggat Isos matang piyako sa kodos kansiro atagbowan osai ka kaliyakiyan batang sa kobat. Ina pag mangyan Simon taga Sirini. Siyo piilitan agbaba in kodos miyanggat kay Isos.
[27] In karowan mangyan mangagak kay Isos kadayo in mga kagbaiyan maloba agpanangis agkalowayan sa kansiyo.
[28] Isos managoli sa kansiro keyen, Laki mga kagbaiyan taga Irosalim, ako ayaw agpanangisanen. In kanyo sadiri in pagpanangisanen osai in kanyo mga bodang.
[29] Angkataw agrateng wa in kabetek in mga mangyan batay agsabi keyen, Agkaanggay in mga baog, in mga kagbaiyan yewed agpamodang, in mga idbatang piyanosowan bodang.
[30] Ina pag betek in mga mangyan batay manremrem keyen, Dayem nges kitam yopanganen wa mga boksor. Dayem nges kitam tabonanen wa mga bolod matang toloy wa matay.
[31] Isos keyen kay, Nangkataw no kataw anda in piyagpangwat sa idapo daet, na labi kay kaloba anda in batay piyangwat sa mga apo daet.
[32] Apo din piyaanggat dowai ka mangyan lakonaw wano in kansiro daet, matang bonowen kataw din Isos.
[33] Paka rateng wa siro sa kobat piyagawit Bitol Olo, Isos kansiro wa piyako sa kodos. In dowai ka apo lakoy daet piyako wa din sa mga kodos, in osai sa kay Isos pamalang agbangen in osai sa kansiyo tagwala.
[34] In siyabi Isos keyen, Amang, kaimo libangawen in kansiro daet angkataw yewed kansiro atawanan in kansiro piyagpangwat. Kalbas in mga sondalo malpostaan in agbagi in kansiyo mga damit.
[35] In mga mangyan agtaydek sa bangen agpangkit. Agpatawa sa kansiyo in mga koyay keyen, Kansiyo kono piyaboway in mga roma. Na no siyo ngani in Kiristo, in iidang Diyos, na pabowayen din in kansiyo bilog.
[36] Kadayo din in mga sondalo agpatawa sa kansiyo, agpasabangen agpatawtaw kagwali toba.
[37] Siro keyen, No kao in poon lakoy in mga Odyo, na kaimo pabowayen in kaimo bilog.
[38] Apo agisolat sa kansiyo ogbos. In piyagsabi keyen, Anda in Poon Lakoy in mga Odyo.
[39] Isos piyamalowasan in osai ka apo lakoy daet agipako sa kodos keyen, Yewed mana kao in Kiristo? Na pabowayen in kaimo bilog, kadayo in kanyam.
[40] Kamay siyo siyabiyan in osai ka agipako sa kodos keyen, Kao lames yewed agkalimo Sa Diyos? Kao piyagparosa kataw din siyo.
[41] Kita maal piyarosa kataw anda. Ina betek ngani sa kanta mga piyangwat. Kamay ina pag mangyan idapo piyangwat daet.
[42] Kalbas keyen siyo, Laki Isos, paka kao agpapoon wa na ako kaimo remremen.
[43] Siyabi wakay Isos keyen, Kangay piyagsabi sa kaimo, ngona daan pag ibeng kao kangay piyagpaanggat sa langit.
[44] Paka tangali wa malened wa in boo kobat anggan mangiriyan lakoy.
[45] Makelep wa in ibeng. Marognit sa kagwaraan malsowayan in damit pamengbeng sa galem balay lakoy Diyos.
[46] Isos mango lakoy keyen, Amang, in kangay abyan kangay wa piyagpaalapet sa kaimo. Paka masabi wa ina siyo matay wa.
[47] In ngiitan in kapitan mga sondalo in mibaloy, siyo agmaal wa sa Diyos. Kansiyo siyabi keyen, Totoo ngani ina maal pag mangyan.
[48] In boo mga mangyan asin agkatipon agpangkit, paka kansiro ngiitan in mibaloy siro moli wa maskit in barosen maloba agpanremrem.
[49] In boo mga pagbelag Isos kadayo in mga kagbaiyan miyanggat sa kansiyo sogod sa Galiliya, siro agitaydek sa adayonaw kayte agriwa asin pag boo mibaloy.
[50] -
[51] Apo kaliyakiyan taga Arimatiya, osai ka bayan mga Odyo. Kansiyo ngaran Osi. Siyo mabait pag mangyan, maalno, agpanaya din sa kabetek in Diyos agpapoon. Kamayba siyo osai sa mga tanongan in mga Odyo siyo dayo sa kansiro piyangwat kay Isos.
[52] Ina pag mangyan pataboy kay Pilato, kansiyo yaayay in bilog Isos.
[53] Kansiyo wa piyalompot, tiyeem wa benang lino, kalbas piyabolalang sa leyang kiyali sa bato lintoy, idbatang kay liyebengan.
[54] Ina Biirnis, in ibeng agsandata sa Ibeng Pamainga. Batay wa agparakay in Ibeng Pamainga.
[55] Miyanggat kay Osi in mga kagbaiyan in kay Isos batang pagsarig sogod Galiliya. Kansiro ngiitan in lebengan, kadayo in pagibolalangan in bilog Isos.
[56] Kalbas siro moli wa, agsandata mga pamada osai gamot piyagawit mira batay piyagyodyod sa bilog Isos. Kamay sa Sabado in Ibeng Pamainga siro idwa agpanawen kataw in siyabi sa mga Batas.