[1] Ina pag betek in mabwat pag poon lakoy Agosto agbatas keyen kailangan agpalista in boo mga mangyan.
[2] Ina in tokaw pag palista in kabetek Kirinyo in gobirnador sa Siriya.
[3] Kalbas moli wa in baatte mangyan sa kansiyo daan rakayan matang agpalista.
[4] Osi panaw wa sa bayan Nasarit sa Galiliya, pataboy wa sa bayan Bitliim sa Odiya. Ina pag bayan in biyoslot in poon lakoy tangona Dabid. Kaya asin pataboy siyo kasokponan Dabid.
[5] Siyo asin batay agpalista. Miyanggat Mariya, in kansiyo batay babai, siyo bonting.
[6] Sa betek siro ista, rateng wa in kabetek Mariya batay agboslot.
[7] Miboslot wa in kansiyo panganay, kaliyakiyante. Tiyeem wa komot in bodangte, kalbas piyapalibay wate sa labangan, angkataw maliget wa in balay, idapo wa batay esekan piyagtaboy sa kansiro.
[8] Asina din pag kobat sa bolod apo mga agalapet topa. Siro yewed agpalpagesek, agdamay kansiro mga topa.
[9] Toloy lomwas sa kansiro osai ka angil batang sa Kapwan. Romawa sa kansiro balabaan in makasolap pag rawa Kapwan, siro pangkalimowan wa gayed.
[10] Kamay siyabi in angil keyen, Kamo ayaw agkalimo. Baanda, ako apo piyagbaba sa kanyo maalno pag barita, batay agpakaanggay sa boo mangyan.
[11] Angkataw biyoslot ngona sa bayan Dabid in kanyo Agpamaboway. Siyo in Kiristo in Kapwan.
[12] Anda in tandaan, batay kanyo ngiitan in bodangte piyagteem komot, agipalibay sa labangan.
[13] Toloy lomwas in karowan wano pag taga langit miyanggat sa angil agmaal sa Diyos keyen,
[14] Pagmaalen in Diyos sa langit. Sa kobat apyaan in mga mangyan kansiyo piyagkaanggay.
[15] Paka panaw wa in mga angil, moli wa sa langit, in mga agalapet topa agpaypolongan wa keyen, Kitam wa sa Bitliim. Amba, kantam pangkiten in siyabi karai in Kapwan.
[16] Kadogay siro agkabiglaan ista pataboy. Kansiro ngani ngiitan Mariya, osai Osi, kadayo in bodangte agipalibay sa labangan.
[17] Paka kansiro ngiitan in bodang, kansiro siyabi in siyabi karai in angil panawen asin pag bodang.
[18] Agsoyo in boo mga karengey sa siyabi in mga agalapet topa.
[19] Ina boo piyagalapet Mariya sa kansiyo galem, isagteisagte kansiyo piyagpanremrem.
[20] Panaw wa in mga agalapet topa. Siro agmaal sa Diyos, osai agsabi in kansiyo kabaloyan, panawen sa boo kansiro arengeyan osai ngiitan kataw daan in biyarita in angil sa kansiro.
[21] Sa kawalo ka ibeng in bodangte tiyoli wa. In tiyaboy ngaran Isos. Ina in tiyaboy in angil, bayo siyo biyonting.
[22] Mowisis apo Batas keyen, In kagbaiyan batang agboslot kailangan linisen. Na paka rateng in kabetek pag ibeng aglinis, kora Mariya pataboy sa Irosalim. Piyagbaba in bodangte matang piyaadap sa Kapwan,
[23] angkataw apo siyolat sa mga Batas in Kapwan keyen, In baatte bodang panganay kaliyakiyan kailangan piyagsandata sa Kapwan.
[24] Siyabi kay din sa mga Batas in Kapwan keyen, Kailangan agandog taybalang koykorowan no yewed dowai ka sipsipan kalapati. Kaya siro ista pataboy matang agandog kataw ina.
[25] Apo osai ka kaliyakiyan sa Irosalim, in ngaran Simyon. Siyo maal pag mangyan, yewed aglimbang agpaniwala sa Diyos. Siyo agpanaya sa piyagpamaboway in mga kasokponan Israil. In Betek pag Abyan agsarig sa kansiyo.
[26] In Betek pag Abyan agsabi sa kansiyo keyen, Kao idbatay matay anggan ikkay kaimo ngiitan in Kiristo piyangako in Kapwan.
[27] Siyo piyaonaik in Abyan sa balay lakoy Diyos. Paka Isos ista biyaba in kansiyo mga koyay sa balay lakoy Diyos matang piyangwat in agisolat sa mga Batas,
[28] siyo siyalili Simyon, kalbas agmaal sa Diyos keyen,
[29] Laki Kapwan, ngona mibaloy wa in kaimo pangako. Ako in kaimo sogowan maal wa ngani matay,
[30] angkataw kangay wa ngani ngiitan in kaimo siyogo Agpamaboway,
[31] kaimo siyandata, batay ngiitan in boo mangyan.
[32] Siyo batay kagwali tinglaw batay agrawa sa mga yewed Odyo. Osai agpakalakoy sa mga kasokponan Israil, sa kaimo mga mangyan.
[33] In mga koyay agsoyo sa mga siyabi Simyon panawen sa bodangte.
[34] Siro piyandalangin Simyon, osai siyabi sa kansiyo inang Mariya keyen, Anda pag bodang iidang Diyos matang in karowan sa mga kasokponan Israil batay piyarosa. Aronaw din in batay piyaboway. Siyo tanda batang sa Diyos. Kamay siyo batay piyagbenglay in karowan.
[35] Kataw ina atawanan wa in kansiro piyagbetang sa remrem. Panawen asin kaimo remrem batay wa kagwali siyaldak pisaw.
[36] -
[37] Ista din sa balay lakoy Diyos in osai ka kagbaiyan poropita, in ngaran Ana, bodang Panwil, kasokponan Asir. Siyo koyay wa gayed, pito wagette ka dagon siro taybalang, matay wa kansiyo lalaki. Siyo walompot opat wa ka dagon. Palagi siyo sa balay lakoy Diyos, kadayo ibeng kadayo yabi siyo agmaal sa Diyos, idwa agkoman, agpandalangin waget.
[38] Ina daan pag betek siyo asin pasabangen kay kora Isos. Siyo agkaanggay sa Diyos. Agbarita din siyo panawen kay Isos sa boo agpanaya sa piyagpaboway Diyos in mga taga Irosalim.
[39] In kansiro wa mipangwat in boo piyagsabi sa mga Batas in Kapwan siro moli wakay sa Nasarit, sa kobat Galiliya, sa kansiro daan bayan.
[40] In bodang agistobo, maeyat, lakonaw din in atawanan. Siyo makaanggay sa pangkit Diyos.
[41] Baatte dagon sa kabetek in piyasta piyagawit Paskowa, in mga koyay Isos ista pataboy sa Irosalim.
[42] Paka Isos labing dowai wa ka dagon siro talnakiyan ista wakay pataboy kataw in datiyan piyagpangwat in mga koyay.
[43] Paka kalbas wa in piyasta, siro agoli wa. Isos pabaliwan sa Irosalim, kamay yewed atawanan in mga koyay.
[44] Sa kansiro remrem Isos sarig daan in karowan agipanaw. Siro agipanaw wa anggan osai ka boo ibeng. Paka siro katawan idapo Isos kansiro piyamangkit sa kansiro mga kabelagan osai sa amat sarig.
[45] Idapo ngiitan. Kalbas siro moli wakay sa Irosalim agpamangkit sa kansiyo.
[46] Paka goribas wakay Isos bayo ngiitan sa galem balay lakoy Diyos. Siyo agitokkaw, sarig in mga agpatoldo. Siyo agparengey sa kansiro osai agtanong.
[47] In boo karengey kay Isos agsoyo sa kansiyo atawanan osai sa kansiyo mga sagot.
[48] Agsoyo din in kansiyo mga koyay paka siyo ngiitan. Siyabi in kansiyo inang keyen, Laki, nakay batang agkataw ina in kaimo piyangwat? Baanda, agkariyaban wano kami in kaimo amang agpamangkit sa kaimo.
[49] Siyabi Isos sa kansiro keyen, Nakay batang ako kanyo piyagpamangkit? Yewed mana kanyo atawanan ako kailangan atai sa balay kangay Amang?
[50] Yewed kansiro atawanan in kansiyo beet siyabi.
[51] Siyo miyanggat sa kansiro, moli wakay sa Nasarit. Siyo agpaniwala sa kansiyo mga koyay. Ina pag boo palagi piyagremrem in kansiyo inang.
[52] Agistobo Isos kadayo in kansiyo atawanan. In Diyos agkaanggay sa kansiyo kadayo in mga mangyan.