[1] Osai ka ibeng in Isos agbarita sa mga mangyan sa balay lakoy Diyos, agpatoldo in Maal pag Barita, pasabangen sa kansiyo in mga poon sasirdoti, osai in mga agpatoldo in mga Batas, osai din in mga koyay sa mga mangyan.
[2] Siro keyen, Sabiyen kao sa kanyam no nakay in kaimo kabaloyan agpangwat ina pag mga kataw ina, no nakay in agsogo sa kaimo?
[3] Keyen Isos, Ako din apo tanong sa kanyo.
[4] In Owan agbaotismo nakay in agsogo sa kansiyo, no in Diyos, no in mga mangyan?
[5] Siro wakayte agpaypolongan keyen, No kantam siyabi keyen in Diyos, na kansiyo wakay piyagsabi keyen, Na nakay batang kamo yewed maniwala kay Owan?
[6] Kamay no kantam wakay siyabi keyen in mga mangyan, na kitam batay biyono in mga mangyan, angkataw sa kansiro atawanan Owan osai ka poropita.
[7] Matang siro keyen, Kami yewed katawan no nakay in agsogo kay Owan.
[8] Siyabi Isos sa kansiro keyen, Na ako din idbatay agsabi sa kanyo no nakay in agsogo sa kangay agpangwat ina pag mga kataw ina.
[9] Kay Isos giisod sa mga mangyan anda pag alimbawa keyen, Apo osai ka mangyan manogda balagen piyagawit obas sa kansiyo alamanan. Kalbas kansiyo piyaalapet sa mga mangyan. Kalbas siyo pataboy sa adayonaw. Dogay siyo ista.
[10] Paka kaobasen wa kansiyo siyogo osai ka sogowan sa mga agalapet matang kiyowa in kansiyo bagiyan. Kamay in sogowan biyogbog in mga agalapet, piyaoli idapo piyagbaba.
[11] Kalbas siyo agsogo wakay osai ka sogowan. Ina din kansiro biyogbog, piyamalowasan, piyaoli din idapo piyagbaba.
[12] Kalbas kansiyo kay piyataboy ista in katolo, ina kansiro kay din siyogatan, biyoyaw.
[13] Kalbas in kapwan obasan agremrem keyen, Nakay lames in kangay maal piyangwat? In kangay wa bodang in pataboyen wa, in kangay piyagpakayawte. Siro idbatay mangaas aglaban sa kansiyo.
[14] Kamay paka in bodang ngiitan in mga agalapet siro maypolongan keyen, Anda wa in batay kapwan dogayan, kantam wa bonowen, matang kantam wa dogayan in kansiyo nges batay mga sangkap.
[15] Kalbas siyo kansiro giyoyod sa balabaan in obasan, kalbas biyono. Na nangkataw wa lames in batay piyanawen in kapwan obasan sa mga agalapet?
[16] Siyo batay ista, batay kansiyo piyagbono in mga daeten pag mga agalapet, kalbas in obasan piyaalapet sa mga roma. Paka ina arengeyan in mga mangyan, siro keyen, Adey, ayaw nges kataw ina.
[17] Kalbas siro piyagterekan Isos, siyabi keyen, Na nakay in beet siyabi anda pag talata sa mga Agisolat keyen, In bato piyangidangan in mga agtadyok balay, na siyo wa in mibaloy in lakonaw sa boo.
[18] In malabo asin pag bato batay madodog, kamay in alabowan ina batay malesa.
[19] In mga agpatoldo in mga Batas osai in mga poon sasirdoti beet nges kabelen Isos ina daan pag betek, angkataw kansiro wa atawanan siro wa daan in piyagsabiyan ina pag alimbawa. Kamay siro yewed mangaas angkataw siro agkalimo sa mga mangyan.
[20] Kalbas siyo kansiro piyagriwa, agpamangkit kabetek. Siro agsogo mga mangyan agpakagwali waget agkaanggay kay Isos. In kansiro beet Isos masalaod sa kansiyo mga agiplaong, anggan apo dailan matang Isos biyaba wa sa gobirnador.
[21] Siyabi kay Isos ina pag mga sogowan keyen, Laki Agpamatoldo, kanyam atawanan betek in kaimo mga piyagsabi, in kao agpatoldo. Kao yewed agpangidang mangyan, no yewed totoo in kaimo piyagpatoldo in mga ogali piyagpamangkit Diyos sa mga mangyan.
[22] Na nakay in maal sa mga Batas, no agbayad bowis sa poon lakoy Sisar, no ayaw wa?
[23] Kamay atawanan Isos in kansiro daeten pag remrem, matang kansiyo siyabi,
[24] keyen, ako paatangen osai ka kowarta bakal. In rarawan atai nakay pag mangyante, osai kay nakay ngaran in agisolat atai? Siro keyen, Kay Sisar.
[25] Siyabi Isos keyen, Na taboyen kay Sisar in sa kansiyo, osai sa Diyos in sa Diyos.
[26] Siro diyaeg wa. Isos idbatay kansiro masalaod sa kansiyo mga agiplaong asin sa pangkit in mga mangyan. Siro agsoyo sa kansiyo siyabi, kalbas siro idwa aglalae.
[27] Apo mga Sadosiyo pasabangen kay Isos. In mga Sadosiyo in mga agsabi in mga matay wa idbatay boway wakay. Kansiro siyabi kay Isos keyen,
[28] Laki Agpamatoldo, Mowisis apo siyolat sa kantam keyen, No apo taybalang idapo kay bodang matay wa in lalaki, na in babai kowaen wakay in kansiyo belag. No mamodang na paapowen ista pag matay.
[29] Apo tayariyan pito ka kaliyakiyan. In panganay mamabaiyen wa, toloy matay idapo kay bodang.
[30] Miskapet wakay sa balo in waraan, matay din.
[31] In katolo kataw daan ina, anggan sa pito. Boo miskapet asin pag kagbaiyan ina pag pito, boo daan matay idapo bodang.
[32] Sa kalobosan matay wakay in kagbaiyan.
[33] Na no apo boway wakay, na asin pag pito nakay in kansiyo wa gayed lalaki? Angkataw kansiyo boo liyalaki ina pag pito.
[34] Siyabi wakay Isos keyen, In ngona pag boway in mga mangyan agbabai, aglalaki,
[35] kamay in mga mangyan piyamaal wa piyaboway wakay, in mga agkaboway dogayan, na idapo wa agbabai aglalaki.
[36] Siro idwa agkatay angkataw siro kataw wa mga angil. Siro mga bodang Diyos angkataw siro piyaboway wakay.
[37] Sa kay Mowisis daan siyolat, kantam atawanan in mga matay piyagpaboway wakay. Baina, sa kabetek apo in yangawte agigang, in Kapwan kansiyo piyagawit keyen in Diyos piyagmaal Abraam, piyagmaal Isaak, piyagmaal Akob.
[38] Na no kora Abraam agmaal sa Diyos na in beet siyabi kamayba siro matay siro boway wakay.
[39] Siyabi in kalaati in mga agpatoldo in mga Batas keyen, Laki Agpamatoldo, maal in kaimo sagot.
[40] Idapo wa agpangaas agtanong kay sa kansiyo kamayba nakay.
[41] Siyabi Isos sa kansiro keyen, Nakay batang piyagsabi keyen in Kiristo kay Dabid kasokponan?
[42] Dabid wa daan in agsolat sa aklat mga Awit keyen, Siyabi in Kapwan sa kangay Kapwan keyen, Kao tomokkaw atai sa kangay pamalang agbangen, kao kangay bisi
[43] anggan in mga aglaban sa kaimo, boo wa kangay piyasakop sa kaimo.
[44] Na no in Kiristo piyagawit din Dabid keyen Kapwan, na nakay batang piyagsabi keyen in Kiristo kay Dabid kasokponan?
[45] Agparengey daan in mga mangyan, siyabi Isos sa kansiyo mga agadar keyen,
[46] Kamo agingat sa mga agpatoldo in mga Batas. Siro agkasadapan aglambong maaba in siro agipanawan. Kansiro din beet siro piyagpakabwat in mga mangyan sa mga bayan, beet din in mga maal pag panokkawan sa mga balay pagpaniponan, osai in pagpanokkawan in mga poon sa mga piyasta.
[47] Kamay siro agpanggolpi sa mga kagbaiyan balo, siro agpapangkit waget sa mga mangyan siro agpandalangin dogay. Maloba in batay parosa sa kansiro.