[1] Osai ka Ibeng Pamainga kora Isos mipadalan sa osai ka agay. In kansiyo mga agadar manlotok takway, kansiro liyokka, kalbas kiyoman wa in begas.
[2] Apo mga Parisiyo agsabi keyen, Nakay batang kanyo piyagpangwat in piyagayaw sa Ibeng Pamainga?
[3] Keyen Isos, Yewed mana kanyo biyasa in piyangwat Dabid in siyo agkayawes osai in kansiyo mga sarig?
[4] Siyo misoroy sa balay Diyos, kansiyo kiyoman in tinapay piyaandog wa sa Diyos. Piyakan kay din in kansiyo mga sarig, kamaybawa ina piyagayaw in mga Batas, no yewed in mga sasirdoti waget in maal mamangan ina.
[5] Siyabi kay din Isos keyen, Ako in Bodang Mangyan Kapwan din in Ibeng Pamainga.
[6] Sa osai wakay ka Ibeng Pamainga Isos misoroy sa balay pagpaniponan agpatoldo. Apo ista osai ka kaliyakiyan, makenet wa in pamalang pag bakwaw.
[7] In mga agpatoldo in mga Batas, osai in mga Parisiyo agpamangkit dailan matang Isos masombong, kalbas siro agpanaya no siyo batay agpaoraw sa Ibeng Pamainga.
[8] Kamay Isos katawan in kansiro piyagremrem, siyabi sa kaliyakiyan makenet wa in bakwaw keyen, Kao tomaydek atai sa kagwaraan. Kalbas siyo panaw tomaydek sa kagwaraan.
[9] rsos keyen sa mga mangyan, Amba mana, sa Ibeng Pamainga nakay in betek sa mga Batas, osai in agpangwat maal, osai in agpangwat daet? Nakay ngani in maal, osai in agpaboway osai in agbono?
[10] Isos tomerek sa kansiro boo, kalbas siyabi sa kaliyakiyan keyen, Paodoyen in kaimo bakwaw. Kansiyo ngani piyaodoy, toloy wa maoraw.
[11] Kalbas agkagalit wa gayedte in mga agpatoldo in mga Batas osai in mga Parisiyo. Siro agpaypolongan wa no nakay in maal piyangwat kay Isos.
[12] Osai ka ibeng ina pag kabetek Isos monaker sa bolod batay agpandalangin. Boo yabi ngani siyo agpandalangin sa Diyos.
[13] Paka omaga wa kansiyo biyerya in kansiyo mga aga dar, kalbas labing dowai kansiyo iidang, kansiyo piyangwat katiwala.
[14] In osai Simon kansiyo piyagawit Pidro, in kadowai Anris kay Simon belag, in katolo Santiyago, in kaopat Owan, in kalima Pilipi, in kaenem Bartolomi,
[15] in kapito Matiyo, in kawalo Tomas, in kasiyam Santiyago bodang Alpiyo, in kasampo Simon in piyagawit Ribildi,
[16] in kalabing osai Odas bodang Santiyago, in kalabing dowai Odas Iskaryoti in agpadakep kay Isos.
[17] Isos mongali wakay, osai in kansiyo mga katiwala anggan sa patag. Ista in aronaw sa kansiyo mga piyagpatoldo osai aronaw wano mangyan batang sa boo kobat Odiya osai sa bayan Irosalim, osai sa mga bayan Tiro osai Sidon sa balabaan dagat. Siro asin pataboy matang agparengey kay Isos, osai matang mapaoraw in kansiro mga maskit.
[18] Kansiyo din piyaoraw in mga maloba piyagpaidapan mga mamaw.
[19] In boo mangyan agpilit komapkap sa kansiyo, angkataw lakonaw in kansiyo kabaloyan agpaoraw sa kansiro boo.
[20] Isos agpangkit sa kansiyo mga agadar, keyen, Boway wa kamo in mga maidap, angkataw in Diyos in kanyo poon lakoy.
[21] Boway wa kamo in mga agkayawes ngona, angkataw kamo batay piyabosog. Boway wa kamo in mga agrongkot ngona, angkataw kamo batay piyagpakaanggay.
[22] Boway wa kamo no kamo piyagkabaisan mga mangyan panawen sa kangay sa Bodang Mangyan, no kamo piyagboyaw, no kamo piyagpamalowasan, osai kanyo ngaran piyagidapo kabolowan.
[23] No kataw ina na kamo agkaanggay wa anggan agloksowanan, angkataw kamo batay piyakan lakonaw sa langit. Kataw din ina in piyangwat kansiro mga kakoyayan sa mga poropita.
[24] Kamay maidap in batay rateng sa kanyo, kamo in mga aronaw sangkap, angkataw kamo kadalan wa sa apyaan.
[25] Maidap in batay rateng sa kanyo in mga bosog ngona, angkataw kamo batay agkayawes. Maidap in batay rateng sa kanyo in mga agkaanggay ngona, angkataw kamo batay agrongkot osai agpalpanggoong.
[26] Maidap in batay rateng sa kanyo no kamo piyagkaanggayan in boo mangyan, angkataw kataw daan din ina in piyangwat kansiro mga kakoyayan sa mga bosliyen pag poropita.
[27] Kamay mga laki, anda in kangay piyagsabi sa kanyo. Kantam pakayawteen in mga aglaban sa kantam, kantam pangwatanen maal in mga agkabais sa kantam.
[28] Kantam dalanginen keyen pakayawteen in mga agpamanes sa kantam, in mga agpamangwat daet sa kantam.
[29] No apo somontok sa kantam pisngi, na kadayo in osai agbangen ka pisngi. No apo agagaw sa kantam islen, na taboyen wa din in lambong.
[30] Kantam pakanen in baatte agayay sa kantam. No apo komwa kantam mga sangkap na ayaw wa tagoli agayayen.
[31] No nakay in kantam beet piyangwat sa kantam, na ina in kantam pangwaten sa mga amat.
[32] No kantam piyagpakayawte in mga waget agpakayawte sa kantam na idapo wa bayad batay piyagtaboy Diyos sa kantam. Kamaybawa in mga agpamangwat daet, siro agpakayawte din sa mga agpakayawte sa kansiro.
[33] Osai in mga agpangwat maal sa kantam, no ina waget in kantam piyagpangwatan maal, na idapo wa bayad batay piyagtaboy Diyos sa kantam. Kamaybawa in mga agpamangwat daet, siro din agpangwat kataw ina.
[34] Osai in mga mangyan batay kabayad sa kantam, no ina waget in kantam piyagpabeles, na idapo wa bayad batay piyagtaboy Diyos sa kantam. Kamaybawa in mga apo daet agpabeles din sa mga apo daet, matang kaabel wakay bayad.
[35] Ayaw kitam kataw ina. Dayem pakayawteen in mga aglaban sa kantam. Siro kantam pangwatanen maal. Kitam agpakan sa mga idbatay kabayad. No kataw ina na lakonaw in batay bayad tiyaboy Diyos sa kantam, osai kitam batay ngani bodang Diyos in Mabwat sa boo, angkataw siyo mabait sa mga daet pag mangyan, osai sa mga madamot.
[36] Kitam agpakayawte kataw in kantam Amang agpakayawte.
[37] Isos keyen, Kamayba nakay pag mangyan ayaw kantam agremremen kalakoyte, matang kitam idbatay din piyagremrem Diyos kalakoyte. Ayaw kitam agsogo agparosa sa amat na kitam idbatay din piyarosaan Diyos. Kantam libangawen in daet sa roma mga mangyan, na batay din liibangaw Diyos in kantam mga daet.
[38] Kitam agpakan, na kitam batay piyagpakan Diyos, lakonaw anggan makno in batay piyagtaboy sa kantam. Angkataw no nangkalakoy in kantam piyagremrem sa mga roma, na kalakoy din ina in batay piyagremrem Diyos sa kantam.
[39] Siyabi Isos osai ka alimbawa keyen, In beleg lames batay kabaloy agakay sa osai ka beleg? Yewed. Siro tanan batay maligan sa balao.
[40] In agadar idbatay lakonaw sa kansiyo agpaadar. Kamay paka siyo katawan wa gayed, na siyo kataw daan kansiyo agpaadar.
[41] Nakay batang kaimo piyagngitan in sepet sa kaimo belag, bago kao din apo lakoy yangaw agiskapet sa kaimo mata?
[42] Nangkataw kao batay kasabi sa kaimo belag keyen, Amba laki, kangay wa kowaen in kaimo sepet, bago kao apo din lakoy yangaw agiskapet sa kaimo mata? Ina agpakagwali waget agpaniwala. Tokaw kowaen in yangaw agiskapet sa kaimo mata, na kao batay kangitan maal in agkowa in sepet sa kaimo belag.
[43] Keyen Isos, In maalen pag poon yangaw idbatay manggalem daeten. In daeten pag poon yangaw idbatay manggalem maalno.
[44] In poon yangaw atawanan panawen sa kansiyo raweg, angkataw idbatay manggalem kapi in tagotong, idbatay manggalem bayabas in talonyong.
[45] In maalno pag mangyan agpamangwat maalno angkataw maalno in kansiyo remrem. In daeten pag mangyan agpamangwat daeten angkataw daeten in kansiyo remrem. In piyagsabi in mangyan in piyaglakonaw sa kansiyo remrem.
[46] Isos keyen, Nakay batang ako kanyo piyagawit Kapwan, laki Kapwan, kamay yewed kanyo piyagpangwat in kangay piyagsabi?
[47] In mangyan agpasabangen sa kangay, agparengey sa kangay piyagsabi, kalbas kansiyo piyagpangwat na siyo kataw tai.
[48] Siyo kataw osai ka mangyan agtadyok balay, agkali sa malayem, sa maalno pag diya, piyakarigen in mga arigi. Paka bomongkalos, diyalan wa sapa in balay, kamay yewed maligan angkataw marigen in agtadyok.
[49] Kamay in agparengey sa kangay agiplaong kamay yewed kansiyo piyagpangwat, na siyo kataw osai ka mangyan agtadyok balay sa masasa pag diya, yewed marigen. Bomongkalos, diyalan sapa in balay, toloy wa maligan, maorak wa gayed ina pag balay.