[1] Paka kalbas wa Isos agsabi ina pag boo sa mga mangyan, siyo pataboy wa sa bayan Kapirnaom.
[2] Ista apo osai ka kapitan mga sondalo taga Roma. Siyo apo sogowan kansiyo wano piyagmaal, kamay apo maskit in sogowan, agkatay wa.
[3] Paka in kapitan abaritaan panawen kay Isos, siyo agsogo mga koyay mga Odyo komaon kay Isos matang paorawen kansiyo sogowan.
[4] Paka rateng kay Isos in mga koyay, siro maloba wa agayay sa kansiyo keyen, In kapitan maal pag mangyan, maal kaimo tolongen,
[5] angkataw kitam in mga Odyo kansiyo piyagmaal. Siyo in agpatadyok in atai balay pagpaniponan.
[6] Kalbas Isos miyanggat. Paka Isos bangen wa sa balay, siyogo in kapitan in kansiyo mga pagbelag patagbo kay Isos keyen, Laki, kao ayaw wa agpakaabara, angkataw ako kalakoyte, yewed sibay matang kao misoroy sa kangay balay.
[7] Ina din in dailan kaya yewed ako in pataboy sa kaimo, angkataw ako yewed sibay. Kao miplaong waget, na batay maoraw in kangay sogowan.
[8] Angkataw ako sakop sa mga mabwat pag poon, osai ako apo din mga sondalo sakop sa kangay. No kangay siyabi sa osai keyen, Kao ista wa, na toloy wa siyo ista, no sa osai wakay keyen, Aywawa, na toloy wa siyo agpasabangen. No ako keyen sa kangay sogowan, Ina pangwaten, na toloy wa kansiyo piyagpangwat.
[9] Paka Isos karengey ina siyo agsoyo. Siyo patobang sa karowan pag mangyan agyanggat sa kansiyo keyen, Kangay piyagsabi sa kanyo ako idbatang kangitan in agpasandig sa Diyos karigen ina kamayba sa mga kasokponan Israil.
[10] Paka rateng wakay sa balay in mga siyogo, kansiro ngiitan maoraw wa gayed in maskit in sogowan.
[11] Paka kalbas, Isos pataboy sa osai ka bayan piyagawit Nain. Miyanggat kansiyo mga agadar osai karowan wano pag mangyan.
[12] Paka bangen wa agbosngaw sa bayan, atagbo siyo in batay aglebeng. In matay in boktong bodang kaliyakiyan osai ka kagbaiyan balo. Aronaw in miyanggat sa aglebeng.
[13] Paka in Kapwan kangitan sa inang in matay siyo apakayawtean, siyabi sa kansiyo keyen, Ayaw agpanangis.
[14] Isos pasabangen sa pagosongan in matay, omatang. Tomaydek wa in mga agosong. Keyen Isos, Pag begle, amba kao miyorog wa.
[15] In begle tomokkaw, miplaong. Kalbas siyo tiyaboy Isos sa kansiyo inang.
[16] Siro boo agkalimo wano, kalbas agmaal sa Diyos keyen lomwas wa sa kantam osai ka poropita lakoy, piyangkit in Diyos in kansiyo mga mangyan.
[17] Ina pag barita panawen kay Isos maripatak sa boo kobat Odiya, sa mga balabaan ina pag kobat.
[18] In mga agadar kay Owan in Agpamaotismo agbarita sa kansiyo ina pag boo piyangwat Isos.
[19] Kalbas biyerya Owan in dowai ka kansiyo agadar, siyogo, piyataboy sa Kapwan, matang tiyanong no siyo in piyagpanaya, no agpanaya kay roma?
[20] Paka rateng kay Isos siro keyen, Kami siyogo Owan in Agpamaotismo matang agtanong no kao in piyagpanaya no agpanaya kay roma.
[21] Ina pag betek Isos agpaoraw sa aronaw maskit, mga piyagoliyan wa maskit, mga piyaglowasan mamaw. Aronaw din beleg kansiyo piyaoraw.
[22] Kalbas siyabi Isos sa mga sogowan Owan keyen, Moli wakay kamo kay Owan, sabiyen sa kansiyo in kanyo mga ngiitan, in kanyo din arengeyan. Kamo keyen, In mga beleg kangitan wa, in mga pilay agipanawan wa, piyaoraw wa in mga apo kagwali panyakit, in mga bingi karengey wa, in mga matay piyaboway wakay, osai in Maal pag Barita piyagpatoldo sa mga maidap pag mangyan.
[23] Agkaanggay in mangyan no yewed piyagbaslag in remrem panawen sa kangay.
[24] Paka panaw wa in kay Owan mga sogowan, Isos miplaong sa karowan pag mangyan panawen kay Owan, keyen, Nakay batang kamo pataboy kay Owan sa moyod? Nakay lames in beet kanyo ngiitan? Yewed ngani garasen piyagkowaya.
[25] Nakay ngani in beet kanyo ngiitan? Yewed mangyan maal wano in damit. In mga agdamit maal wano, in mga aronaw sangkap, siro agbalay sa mga balay lakoy mga poon lakoy.
[26] Kamay nakay lames in beet kanyo ngiitan? Osai lames ka poropita? Aon ngani. Kangay piyagsabi Owan labi kay kalakoy sa amat mga poropita.
[27] Angkataw siyo in piyagsabi in mga Agisolat in siyabi Diyos keyen, Kangay piyagsogo in kangay sogowan tokaw sa kaimo. Kansiyo batay piyagpakapya in kaimo batay dalan.
[28] Isos keyen kay, Kangay piyagsabi sa kanyo, sa boo mangyan Owan in mabwat. Kamay sogod ngona in kabwattete sa boo mga bodang Diyos, ina labi kay kabwat siyo.
[29] In boo mga mangyan kadayo in mga agpaningil bowis, paka siro karengey in mga siyabi Isos, siro agmaal sa Diyos, angkataw siro batang pabaotismo kay Owan.
[30] Dayem in mga Parisiyo osai in mga agpatoldo in mga Batas, siro yewed pabaotismo kay Owan angkataw kansiro piyagidapo kabolowan in remrem Diyos sa kansiro.
[31] Isos keyen kay, Sa nakay kangay piyagpatolad in mga mangyan agkaboway ngona? Siro kataw nakay?
[32] Siro kataw mga bodang agtokkaw sa tongkodan dayo agmesa. In kansiro mga pagbelag agberya, keyen, Kami agbangsi agkamesa kasalan, kamay kamo dayo agpalkaanggayan. Manggoong wakay agkamesa lebeng, dayo din kamo manangis.
[33] Kaya kamo kangay piyagpatolad asin angkataw atai pataboy Owan in Agpamaotismo yewed agpamangan masadap, yewed agbarik, kalbas kamo keyen, Siyo piyaglowasan mamaw.
[34] Ako wakay in Bodang Mangyan atai agkasadapan agpamangan, agpanginem, kalbas kamo keyen, Baina, ina pag mangyan matakaw, agpanlasing, agpabelag sa mga agpaningil bowis, sa mga agpamangwat daet.
[35] Kamay in katawanan Diyos piyagngitan betek sa piyagpangwat in mga agkaanggay asin.
[36] Isos piyaanggat osai ka Parisiyo in ngaran Simon, mamangan sa kansiyo balay. Isos misoroy wa sa balay, tomokkaw wa batay mamangan.
[37] Asin pag bayan apo kagbaiyan daeten in ogali. In abaritaan siyo Isos agkoman sa balay in Parisiyo, siyo asin pataboy apo piyagbaba pagsoroyan piyangwat batang bato lakonaw in bayad, ina makno pamada.
[38] Siyo pasabangen sa awak Isos sa bangen bitis. Siyo agpanangis, kay Isos darapa matemek wa in lowa. Kalbas ina piyonas wa kansiyo abok, yaatang, yoodyodan pamada.
[39] Paka ina ngiitan in Parisiyo in agpaanggat kay Isos, kansiyo riyemrem keyen, No poropita ngani Isos, na siyo katawan ina pag kagbaiyan in omatang sa kansiyo, katawan siyo daeten.
[40] Panawen sa piyagremrem in Parisiyo Isos keyen, Laki Simon, ako apo piyagsabi sa kaimo. Keyen Simon, Nakay in piyagsabi, laki Agpamatoldo?
[41] Isos keyen, Dowai ka kaliyakiyan apo otang sa osai ka mangyan. In osai alaga lima ka daan ka ibeng agpanawen, in osai alaga limampo waget ka ibeng.
[42] Kamay siro yewed kabaloy agbayad, matang kansiyo wa piyaidapo in otang, tanan. Na asin pag dowai nakay agbangen in maloba agkaanggay sa agpaotang?
[43] Keyen Simon, Sa kangay remrem ina in lakonaw agbangen in otang. Keyen Isos, Betek in kaimo remrem.
[44] Isos patobang sa kagbaiyan kamay miplaong kay Simon keyen, Kao kangitan ina pag kagbaiyan? Ako misoroy sa kaimo balay ako yewed kaimo piyakan sapa pangogas kangay darapa, kamay kansiyo tiyemek lowa kangay darapa, piyonas kansiyo abok.
[45] Ako yewed kaimo yaatang piyagpabelag, kamay siyo, sigod misoroy, agatang daan sa kangay darapa.
[46] Kangay olo yewed kaimo yoodyodan kamayba langis, kamay kangay darapa kansiyo piyagyodyodan pamada.
[47] Na kangay piyagsabi sa kaimo, piyagngitan anda pag kagbaiyan agkaanggay wano gayed sa kangay, na asin atawanan kamayba aronaw in kansiyo daet boo wa liibangaw. Kamay in mangyan no kalakoyte in kansiyo daet liibangaw, na kalakoyte din in kansiyo kaanggayan.
[48] Kalbas siyabi Isos sa kagbaiyan keyen, In kaimo mga daet liibangaw wa.
[49] Kalbas in amat mangyan asin agkoman manremrem keyen, Nakay lames pag mangyan ina in kabaloy kamayba aglibangaw sa mga daet?
[50] Kamay keyen Isos sa kagbaiyan, Kao piyaboway wa panawen kao agpasandig sa Diyos. Maal wa kao panaw, apyaan in remrem.