[1] Apo pasabangen kay Isos aronaw mga agpaningil bowis, osai roma kay pag mga agpamangwat daet. Siro agkaparengey in kay Isos piyagsabi.
[2] Kalbas in mga Parisiyo osai in mga agpatoldo in mga Batas, siro agpaypanremrem keyen, Ina pag kaliyakiyan agyanggatyanggat sa mga agpamangwat daet, anggan siyo agpabelag agkoman.
[3] Matang siyabi Isos sa kansiro anda pag alimbawa keyen,
[4] Alimbawa, no osai sa kanyo apo osai ka daan ka topa, no in osai malibangaw, siyo batay agnakay? Kansiyo batay biyaliwan sa moyod in siyamnapo siyam ka topa, kansiyo piyagpamangkit in malibangaw anggan kansiyo wakay ngiitan.
[5] Paka ngiitan wakay siyo agkaanggay wa gayed. Kansiyo wakay piyasan.
[6] No rateng wa sa balay, piyagberya in boo sa bangen, in mga kabelagan, keyen, Kitam wa malkaanggayan kataw kangay wakay ngiitan in malibangaw topa.
[7] Keyen Isos, Kangay piyagsabi sa kanyo, Na kataw daan din ina no osai ka mangyan agbenglay sa kansiyo daet, na in kaanggayanan sa langit labi kay lakonaw sa apo siyamnapo siyam ka mangyan betek, idapo batay biyenglay daer
[8] Isos apo siyabi keyen, Alimbawa kay, no osai ka kagbaiyan apo sampo ka kowarta bakal, no malibangaw in osai, na siyo agnakay? Kansiyo batay piyaraet in tinglaw, agwalis sa balay agpamangkitagpamangkit anggan ngiitan.
[9] Kalbas ngiitan, piyagberya wa in boo sa bangen, in mga kabelagan keyen, Kitam wa malkaanggayan kataw ngiitan wakay in kangay malibangaw kowarta bakal.
[10] Keyen Isos, Na kataw daan din ina in kaanggayanan in mga angil Diyos panawen osai ka agpamangwat daet agbenglay wa in kansiyo daet.
[11] Isos apo kay siyabi keyen, Alimbawa kay, osai ka mangyan apo dowai ka bodang kaliyakiyan.
[12] Miplaong in ariyan keyen, Amang, taboyen wa sa kangay in kangay bagiyan kaimo mga sangkap. Kalbas biyagi wa in amang in kansiyo mga sangkap, tiyaboy wa sa mga bodang.
[13] Yewed dogay piyaalis wa in ariyan in kansiyo bagiyan. Kadogayte kansiyo wa biyaba in kowarta sa adayonaw pag kobat. Paka rateng ista siyo agaleleng, kansiyo waget siida in kansiyo kowarta.
[14] Paka lobos wa boo, ista pag kobat maloba wa in yawes. Agparakay wa in kansiyo kaidapan.
[15] Kalbas siyo pataboy sa osai ka taga ista. Siyo piyagpataboy sa kansiyo kobat agalapet in mga beyek.
[16] Siyo agkakoman nges kamayba in mga waget dadak piyagpakoman sa mga beyek. Kamay idapo batay mangyan agtaboy.
[17] Kadogay siyo apo wakay bait manremrem, keyen, Sa kangay amang aronaw in mga sogowan piyagbayadan in pamangnen bonton daan. Kamay ako atai agkatay sa agkayawes.
[18] Na ako agoli wakay sa kangay amang. Ako batay keyen, Amang, ako apo piyangwat daet sa Diyos osai sa kaimo.
[19] Ako idwa maal yaawit kaimo bodang. Ako pangwaten wa sogowan.
[20] Siyo panaw wa, pataboy sa kansiyo amang. Adayonaw kay siyo ngiitan wa kansiyo amang. Kadogayte in amang maloba wa anggayan domalagan, tiyagbo in bodang, yaatang, kiyapet.
[21] Siyabi in bodang, Amang, ako apo piyangwat daet sa Diyos osai sa kaimo. Ako idwa maal yaawit kaimo bodang.
[22] Kamay siyabi in amang sa kansiyo mga sogowan, Ayaw agpabeya. Atai babaen in maal pag lambong, siyo soroyanen. Soroyanen kay singsing, soroyanen kay tapatos.
[23] Kowaen wa in piyataba pag baka, bonowen wa. Kitam wa malpamangan, malkaanggayan,
[24] angkataw anda in kangay bodang batang wa kagwali matay kalbas boway wakay, maidapo, kalbas ngiitan wakay. Kalbas siro malkaanggayanan wa.
[25] Ina pag betek in kakaan agbangen sa agay. In siyo agoli wa, paka bangen wa sa balay kansiyo arengeyan in agtogtog, in agpalkaanggayanan.
[26] Kansiyo biyerya in osai ka sogowan keyen, Nakay batang apo kataw ina?
[27] Keyen wakay in sogowan, Rateng wakay in kaimo ariyan, matang piyabono kaimo amang in piyataba pag baka, kataw siyo moli wakay agkaboway daan, idapo din maskit.
[28] Kamay agalitan in kakaan, dayo wa misoroy sa balay. Kalbas lompot in kansiyo amang, siyo yaayat.
[29] Kamay kansiyo siyabi sa amang keyen, Kaimo remremen, anda pag kadogayen ako agtolong sa kaimo, kamayba nangkadogay ako yewed mandaeg sa kaimo, kamay kamayba makaosai waget ako idbatang kaimo piyakan kamayba osaite ka bodang kambing matang agpalkaanggayan kami osai in kangay mga pagbelag.
[30] Kamay paka rateng ina pag kaimo bodang in lomobos kaimo mga sangkap sa aleleng pag mga kagbaiyan, na kaimo kayno piyabono in piyataba pag baka.
[31] Keyen wakay in amang, Lale, kita palagi daan agpaysarig. In boo kangay sangkap, boo daan kaimo.
[32] Kamay kailangan kitam agkaanggay malpamangan, angkataw in kaimo ariyan batang wa kagwali matay kalbas boway wakay, maidapo, kalbas ngiitan wakay.