[1] Paka ina kalbas, in Kapwan omidang kay pitompo dowai ka agadar. Siro siyogo baatte dowai tokaw sa kansiyo sa baatte bayan baatte kobat sa batay kansiyo pagtaboyan.
[2] Kansiyo siyabi sa kansiro keyen, Bonton in batay piyagani, kamay korangte in agpanawen. Kitam mandalangin sa Kapwan keyen sogowen in mga agani sa kansiyo agay.
[3] Kamo kangay piyagsogo agipanawan. Kamo kagwali mga bodangte topa kangay piyagsogo sa kagwaraan mga bangaw.
[4] Kamo ayaw agbaba kamayba sokloban, kamayba begyas, kamayba tapatos. Kamo ayaw aglimbang sa dalan agpanggisodan sa mga mangyan.
[5] Paka kamo misoroy kamayba kay nakay balay na kamo toloy mandalangin keyen, Kamo pakaanggayen in Diyos.
[6] No apo asin agbalay mabait pag mangyan na siro batay ngani piyakaanggay. Kamay no idapo, na kamo wa daan in batay piyakaanggay Diyos.
[7] Kamo asin daan pag balay mamataw, kamo mamangan osai minem kamayba nakay in piyagtaboy sa kanyo, angkataw in agpanawen maal piyagpakan in kansiyo pamangnen. Kamo ayaw agpalkoyogpalkoyog.
[8] Paka kamo rateng sa osai ka bayan, no kamo piyabelag in mga taga ista na kamo mamangan kamayba nakay in piyagtaboy sa kanyo,
[9] kanyo paorawen in mga apo maskit ista, osai kanyo sabiyen sa mga mangyan keyen, Agkabangen wa agpapoon sa kanyo in Diyos.
[10] Kamay no apo bayan in mga mangyan yewed agpabelag sa kanyo, na kamo agipanaw sa kansiro mga dalan. Kanyo sabiyen
[11] keyen, Kadayo in mga bogabo atai sa kanyo bayan in miskapet sa kanyam darapa kanyam wa piyagragrag, in beet siyabi kami dayo sa kanyo. Kamay ayaw alibangawan bangen wa sa kanyo in Diyos agsakop.
[12] Kangay piyagsabi sa kanyo keyen, Dogayan sa Ibeng Agparosa osai in mga taga ista pag bayan, osai in mga taga Sodoma, in batay maloba pag parosa in sa mga taga ista agbangen.
[13] Isos keyen kay, Lakonaw in batay parosa sa kanyo, mga taga Korasin. Lakonaw in batay parosa sa kanyo, mga taga Bitsayda. Angkataw no nges piyangwat sa Tiro osai sa Sidon in mga makasoyo piyangwat atai sa kanyo, na siro dogay wa agdamit sako, agtokkaw sa borisen, matang agpapangkit siro agbenglay kansiro daet.
[14] Dogayan sa Ibeng Agparosa, osai sa kanyo, osai sa Tiro osai Sidon, na sa kanyo agbangen in maloba pag parosa.
[15] Osai kamo mga taga Kapirnaom, kamo mana agpakabwat anggan sa langit. Kamo batay piyalabo sa toyongan.
[16] Siyabi Isos sa kansiyo mga agadar keyen, In agparengey sa kanyo na siyo agparengey sa kangay. In agpamangyan sa kanyo na siyo agpamangyan sa kangay. Osai in dayo sa kangay, na siyo dayo sa agsogo sa kangay.
[17] Moli wakay kay Isos in pitompo dowai ka agadar. Siro agkaanggay wano, keyen, Laki Kapwan, kamaybawa in mga mamaw agpaniwala sa kanyam paka kanyam biyoyaw sa kabaloyan kaimo ngaran.
[18] Siyabi Isos keyen, Kangay ngiitan Katanas malabo batang sa langit kagwali mangkilat.
[19] Baina, kamo kangay piyakan kabaloyan lomaed sa mga olay, sa mga alipan, kabaloyan agsakop kay Katanas. Idapo batay kabaloy agpaidap sa kanyo.
[20] Kamay kamo agkaanggay yewed panawen sa sakop sa kanyo in mga mamaw, no yewed panawen sa kanyo mga ngaran siyolat wa sa langit.
[21] Ina din pag betek Isos agkaanggay wano batang sa Betek pag Abyan. Kansiyo siyabi keyen, Laki Amang, kao kapwan langit osai kobat, ako agkaanggay sa kaimo angkataw ina pag kabaloyan kaimo piyagbetang sa mga apo katawanan, sa mga dogay wa agpasok, ina kaimo wa piyapangkit sa mga mangyan kabwatte in remrem kagwali in mga bodangte kay. Aon, Amang, ako agkaanggay angkataw ina in kaimo iidang.
[22] Kalbas kansiyo siyabi sa mga mangyan keyen, In boote piyaalapet sa kangay in kangay Amang. Idapo katawan no nakay ako, no yewed in Amang waget. Osai idapo din katawan no nakay in Amang no yewed ako in Bodang, osai in kangay iidang paalamanen.
[23] Isos patobang sa kansiyo mga agadar, komimkimot keyen, Kamo boway wa angkataw kamo kangitan in kanyo mga piyagngitan.
[24] Kangay piyagsabi aronaw mga poropita osai mga poon lakoy in agkabeet kangitan in kanyo mga piyagngitan, agkabeet karengey in kanyo mga piyagparengey, kamay yewed kansiro ngiitan, yewed kansiro piyarengey.
[25] Apo osai ka agpatoldo in mga Batas pasabangen kay Isos agkabel nges sa kansiyo keyen, Laki Agpamatoldo, nakay in maal kangay pangwaten matang ako piyakan in boway idapo kalobosan?
[26] Keyen Isos, Nakay in agisolat sa mga Batas? Nakay in kaimo piyagbasa asina?
[27] Siyo keyen, In mga Batas keyen, Kailangan kantam pagmaalen in Diyos kantam Kapwan, in boo kantam galem, abyan, eyat osai remrem. Osai pakayawteen in roma mangyan, kataw daan in agpakayawte sa kantam sadiri.
[28] Keyen Isos, Betek in kaimo siyabi. Na no kaimo piyagpangwat ina na kao batay agkaboway.
[29] Kamay in mangyan agkalimo siyo batay arikoyan, matang siyo agtanong wakay kay Isos keyen, Kamay nakay ngani pag mga mangyan?
[30] Siyabi Isos keyen, Alimbawa, apo mangyan mongali batang sa Irosalim, pataboy sa Iriko. Siyo kiyabel mga tolisan, kiyowa in lambong, piyamogbog, biyaliwan kagwali wa matay.
[31] Kadogay apo mipadalan osai ka sasirdoti. Paka ngiitan in mangyan siyo manlili, siyo toloy wa daan agipanaw.
[32] Domalan wakay sa kabetek in mangyan osai ka katolong sasirdoti. Paka ngiitan in mangyan siyo din manlili, siyo toloy wa daan agipanaw.
[33] Asin wakay domalan osai ka taga Samariya. Paka ngiitan in mangyan siyo apakayawtean.
[34] Pasabangen siyo, in mga sogat giyamot langis osai alak, kalbas piyamekkes. In mangyan piyasakay sa kansiyo daan asno, biyaba sa balay pagpangesekan, yaalapet.
[35] Paka omaga kansiyo kiyowa kowarta alaga dowai ka ibeng agpanawen, tiyaboy sa kapwan balay keyen, Siyo kaimo alapeten. No korang kay ina, na kangay kay piyagbayadan no ako agoli wa.
[36] Kalbas keyen Isos sa agpatoldo in Batas, Na asin pag tolo, kaimo nakay, nakay agbangen in agpabelag sa kiyabel tolisan?
[37] Keyen in agpatoldo in Batas, In agpakayawte sa kansiyo. Kalbas siyabi Isos sa kansiyo, Kao panaw wa, kataw daan ina in kaimo pangwaten.
[38] In kora Isos agipanaw wakay siro rateng sa osai ka bayanan. Asin siro piyabelag osai ka kagbaiyan in ngaran Marta, piyaisoroy sa balay.
[39] Ina pag kagbaiyan apo kay din belag in ngaran Mariya. Siyo agtokkaw agpatobang kay Isos agparengey sa kansiyo agiplaong.
[40] Kamay Marta yewed katokor sa kansiyo mga panawen. Siyo pasabangen kay Isos keyen, Laki Kapwan, kao yewed agkalawagen ako piyabayaan kangay belag agpanawen ako waget? Kaimo sabiyen sa kansiyo ako tolongen wa.
[41] Kamay keyen in Kapwan, Laki Marta, Marta, kao maloba agpanremrem sa karowen panawen.
[42] Kamay osai waget in kailangan gayed. Iidang Mariya in maalen, na ina idbatay piyagkowa sa kansiyo.