[1] Siyabi Isos sa kansiyo mga agadar keyen, Idbatay maidapo in mga dailan kaya in mga mangyan agpangwat daet, kamay makalimo in batay mibaloy sa mangyan agpamaakay sa daet.
[2] Osai in siyo agpaakay sa daet sa osai ka bodangte, osai in siyo yeeketan bato lakoy sa leey liyeggeb sa dagat, na in maal kay agbangen sa kansiyo in siyo leggeben.
[3] Na kamo agingat. No in kaimo belag agpangwat daet sa kaimo na sabiyanen. Kalbas no siyo agdaing, na kaimo libangawen in daet.
[4] No sa osai ka ibeng makapito siyo agpangwat daet sa kaimo, makapito din siyo moli sa kaimo agdaing, na libangawen kao in kansiyo daet.
[5] Siyabi kay Isos in kansiyo mga katiwala keyen, Kaimo kay paistobowen in kanyam paniwala.
[6] Siyabi wakay in Kapwan keyen, No in kanyo paniwala kalakoy waget in osaite ka beter moktasa, na kamo batay kabaloy agsogo asin pag poon lakoy yangaw keyen, Kao pagabot wa, patogda wakay sa dagat, na batay wa daan maniwala.
[7] Keyen Isos sa mga mangyan, Alimbawa, apo osai sa kanyo apo sogowan agarado, no yewed agalapet kanyo topa. No siyo rateng batang sa pagpanawenan, na idbatay kanyo siyabi keyen, Aywawa, mamangan wa.
[8] No yewed kamo keyen, Tongtongen wa in kangay pamangnen. Kao agsandata wa, ako pakomanen wa. No ako kalbas wakay mamangan, na kao wakay in agkoman.
[9] In sogowan idbatay kiyaanggayan maloba angkataw kansiyo waget piyangwat in piyagsogo sa kansiyo.
[10] Na kataw daan din ina kamo. No kanyo wa piyangwat in boo piyagsogo sa kanyo na in maal kanyo sabiyen keyen, Kami mga sogowan waget, kanyam waget piyangwat in kanyam panawen.
[11] In Isos agipanaw agtaboy sa Irosalim, siyo domalan sa paltabaan Samariya osai Galiliya.
[12] Paka siyo agrateng sa osai ka bayanan siyo tiyagbo sampo ka mangyan piyagsogatan kagwali panyakit. Siro tomaydek sa adayonaw kayte,
[13] mango keyen, Isos, Agpamatoldo, kami ayawte.
[14] Paka siro ngiitan Isos, siyo keyen, Kamo panaw, papangkit sa mga sasirdoti. In siro sa dalan maoraw wa in kansiro panyakit.
[15] Paka atawanan in osai maoraw wa in kansiyo panyakit, siyo moli wakay, agpango agmaal sa Diyos.
[16] Siyo maloba wano agkaanggay kay Isos. Ina pag mangyan taga Samariya.
[17] Keyen Isos, Yewed mana sampo in piyaoraw? Saano wa in siyam?
[18] Idapo mana moli agmaal sa Diyos no yewed anda waget pag yewed Odyo?
[19] Kalbas siyabi Isos sa batang panyakiten keyen, Maal kao panaw wa. Kaya kao piyaoraw panawen kao agpasandig sa kangay.
[20] In mga Parisiyo miplaong kay Isos keyen, Nangkadogay batay agparakay in Diyos agsakop? Kalbas keyen Isos, Idbatay ngiitan in agparakay in Diyos agsakop.
[21] Idapo din batay katawan keyen, Maanda wa in agparakay, no yewed keyen, Baati wa, angkataw in Diyos agparakay wa agpapoon sa galem in kalaati sa kanyo.
[22] Kalbas kansiyo siyabi sa mga agadar keyen, Dogayan kamo batay beet wano kangitan sa kangay sa Bodang Mangyan kamayba sa osai waget ka ibeng, kamay idbatay kanyo ngiitan.
[23] Apo batay agsabi sa kanyo keyen, Baati siyo, no yewed keyen, Baanda wa siyo. Na ayaw kamo maniwala sa kansiro, ayaw ista pataboy.
[24] Angkataw paka rateng in kabetek, in agrateng in Bodang Mangyan batay piyagngitan in boo mangyan kagwali kilat piyagngitan sa boo kobat.
[25] Kamay kailangan tokaw siyo piyagpaidapan maloba osai piyagbenglay in mga mangyan ngona.
[26] In kabetek batay wa agrateng ako in Bodang Mangyan kataw daan tangona in kabetek Nowi.
[27] Ina pag betek in mga mangyan agpalpamangan, agpalpamarik, agpamangkit babai, mga lalaki, anggan rateng in ibeng Nowi somakay wa sa kansiyo bangka lakoy. Kalbas rateng in bongkalos, mangatay wa siro boo.
[28] Kataw daan ina in kabetek Lot, in mga mangyan agpalpamangan, agpalpamarik, agpamaalis, agpangkowa, agtogda, agtadyok balay.
[29] Kamay in ibeng panaw wa Lot sa bayan Sodoma piyalabo Diyos in baya osai mga bato bolalakaw.
[30] Na kataw daan ina in ibeng in batay papangkit in Bodang Mangyan.
[31] Asin pag ibeng no in mangyan sa awakan kansiyo balay, na ayaw misoroy sa galem balay matang komwa in kansiyo mga kamayba nakayte, osai in sa agay ayaw agoli.
[32] Remremen in mipangwat sa kay Lot babai.
[33] No in mangyan agpilit agaman kansiyo boway na siyo batay aidapowan. Kamay no in mangyan aidapowan kansiyo boway na batay apo.
[34] Kangay piyagsabi sa kanyo, asin pag yabi batay apo dokalaki agesek sa osai ka damig. In osai batay piyagpaanggat, in osai biyaliwan.
[35] Batay apo dokabai agbayo, in osai batay piyagpaanggat in osai biyaliwan.
[37] Keyen in mga agadar, Laki Kapwan, sa nakay lames ina? Siyo keyen, No sa nakay in bilog matay, na asina wakay batay agkatipon in mga owak.