[1] Ina daan betek apo rateng mga mangyan agbarita kay Isos keyen, Apo mga mangyan taga Galiliya biyono Pilato sa betek siro agandog sa Diyos.
[2] Keyen Isos, Na kay, panawen ina pag mga mangyan taga Galiliya biyono, kanyo lames remrem siro apo daet labi kay sa roma mga mangyan taga Galiliya? Yewed.
[3] Kamay kangay piyagsabi sa kanyo, no yewed kanyo biyenglay in mga daet, na kamo boo kataw daan din ina batay maripor.
[4] Osai in labing walo ka mangyan matay in siro aregnasan in mabwat pag balay bato sa Silowi, kanyo lames remrem siro apo daet labi kay sa boo mga mangyan agbalay sa Irosalim? Yewed.
[5] Kamay kangay piyagsabi sa kanyo no yewed kanyo biyenglay in mga daet, na kamo boo kataw daan din ina batay maripor.
[6] Siyabi Isos anda pag alimbawa. Apo osai ka mangyan apo poon igos sa kansiyo kobat. Kalbas piyanibaw no apo raweg, kamay idapo siyo ngiitan kamayba osai.
[7] Matang kansiyo siyabi sa agalapet kansiyo kobat keyen, Tolo wa ka dagon ako baatte atai agpanibaw atai pag poon, kamay siyo idapo aggalem. Pokanen wa ina, agpaliget waget sa kobat.
[8] Kamay keyen in agalapet, Laki, ngona pag dagon ayaw kay kanta agpokanen. Kangay kay piyagkali in balabaan, kangay piyagpabolalangan in pampagalem.
[9] No manraweg isag pag dagon na maal wa. Kamay no yewed na kanta wa pokanen.
[10] Osai ka Ibeng Pamainga Isos agpatoldo sa osai ka balay pagpanipon.
[11] Apo osai ka kagbaiyan asin labing walo wa ka dagon piyagmamaw. Siyo agkabokkongan wa, yewed wano kapaodoy.
[12] Paka ngiitan Isos in kagbaiyan, kansiyo biyerya, kalbas keyen, Laki, piyaoraw wa in kaimo kaidapan.
[13] Yaatang Isos in kagbaiyan. Siyo toloy wa miyodoy, agkaanggay wa sa Diyos.
[14] Kamay agalitan in agpapoon sa pagpamponan, angkataw agpaoraw Isos sa lbeng Pamainga. Matang kansiyo siyabi sa mga mangyan keyen, Apo enem ka ibeng maal agpanawen. Na asin pag mga ibeng kamo atai pataboy matang agpagamot. Ayaw sa Ibeng Pamainga.
[15] Siyabi in Kapwan keyen, Kamo mga agpakagwali waget. Yewed mana sa Ibeng Pamainga kanyo piyagpanlowat in kanyo baka osai kabayo sa mga pageketan, kanyo piyagali sa pagpangineman?
[16] Na nakay, anda pag kagbaiyan sa kasokponan Abraam labing walo wa ka dagon biyakos Katanas, yewed mana maal siyo piyaglowat sa Ibeng Pamainga?
[17] Sa siyabi Isos arikoyan in boo mga aglaban sa kansiyo. Kamay aanggayan in karowan mga mangyan sa boo kansiyo mga piyangwat makasoyo.
[18] Keyen Isos, Nangkataw lames in Diyos agpapoon? In kangay alimbawa keyen,
[19] Ina kataw osai ka bisloy tiyogda osai ka mangyan sa kansiyo kobat. Mitalo, mistobo wa, mibaloy wa poon yangaw, pagpamogadan mga bantog in mga sanga.
[20] Isos apo kay siyabi keyen, Nakay kay lames in maal pag alimbawa in Diyos agpapoon?
[21] Ina kataw pamaistobo tinapay, kalakoyte in piyaagem osai ka kagbaiyan sa osai ka galang arina, kadogay in boo mistobo.
[22] Isos agipanaw kay. Siyo agpatoldo sa mga bayan, kamayba bayanan kansiyo piyagdalan in siyo agpataboy kay sa Irosalim.
[23] Apo osai ka mangyan miplaong sa kansiyo keyen, Laki, korangte lames in batay piyaboway? Siyabi Isos keyen,
[24] Kanyo piliten misoroy sa maliget pag sakbawan. Kangay piyagsabi sa kanyo aronaw mangyan in agkabeet misoroy kamay idbatay kaisoroy.
[25] Paka biyengbeng wa in kapwan balay in sakbawan, na kamo batay agtaydek sa tongkodan agberya agberya keyen, Laki Kapwan, kami pasoroyen. Siyo batay somagot keyen, Ako yewed katawan no taga nakay kamo.
[26] Kalbas kamo batay keyen, Kitam batang malpamangan, batang malpanginem. Kao batang agpatoldo sa kanyam mga bayan.
[27] Kamay siyo batay agsabi sa kanyo keyen, Kamo yewed kangay atawanan, no kamo taga nakay. Kamo bali wa, ayaw atai sa kangay, kamo in boo agpamangwat daet.
[28] Paka kanyo ngiitan sa sakopan Diyos Abraam, osai Isaak, osai Akob osai in boo mga poropita, kamay kamo piyagayaw misoroy, na kamo batay agpalpanangis, agpalpanogait in kanyo mga ngipen.
[29] Batay rateng mga mangyan batang sa boo wano kobat, batay agtokkaw agpalpamangan sa sakopan Diyos.
[30] Apo mga paori batay manokaw. Apo mga tokaw batay apaoriyan.
[31] Ina pag betek apo rateng mga Parisiyo, siyabi kay Isos keyen, Kao panaw wa, ayaw wa atai, angkataw kao beet biyono Irodis.
[32] Siyabi Isos keyen, Kanyo sabiyen asin pag Irodis keyen, Ako batay kay ngona agboyaw mga mamaw, osai agpaoraw din sa mga maskit, kamay idwa dogay mibaloy wa in kangay panawen.
[33] Kamay ngona ako agaway kay agipanaw agtaboy sa Irosalim anggan mibaloy wa in boo, angkataw in osai ka poropita yewed maal biyono no yewed sa Irosalim.
[34] Keyen Isos, Irosalim, laki mga taga Irosalim, kanyo piyagbono in mga poropita. In mga siyogo Diyos kanyo biyenglayan bato anggan matay. Makakarowan wano nges kangay beet kamo yaalapet kataw in manok aglemlem sa kansiyo mga sipsipan, kamay kamo dayo.
[35] Na in kanyo balay lakoy Diyos batay piyagbaliwan wa gayed. Kangay piyagsabi sa kanyo, ako idbatay wa kanyo ngiitan anggan sa rateng wa in kabetek kamo keyen, Agkaanggay in agrateng in agbaba in kabaloyan in Kapwan.