[1] Isos mangkit, kansiyo ngiitan in mga aronaw sangkap agso roy kowarta sa pagpanyanganan andog sa balay lakoy Diyos.
[2] Kansiyo din ngiitan osai ka maidap, kagbaiyan balo agsoroy dowaite ka sintimos.
[3] Isos keyen, Kangay piyagsabi sa kanyo, ina pag balo kamayba maidap, in kansiyo siyoroy labi kay kalakoy karai in sa aronaw sangkap.
[4] Angkataw kansiro tiyaboy in idwa kansiro kailangan. Kamay ina pag balo, kamayba maidap wano, kansiyo tiyaboy in boo kansiyo pamili pamangnen.
[5] Piyagbarogi in kalaati sa kansiyo mga agadar keyen, In kaalenen in balay lakoy Diyos, in kalakoyen in mga bato piyabengbeng, osai in boo makaanggay asin tiyaboy mga mangyan sa Diyos. Kamay siyabi Isos
[6] keyen, Ina pag kanyo piyagngitan bato, agrateng in kabetek idapo batay mitera bato agisapaw sa osai wakay ka bato.
[7] Kansiro siyabi kay Isos keyen, Laki Agpamatoldo, nangkadogay kay batay mibaloy ina? Nakay in tandaan kami keyen batay wa masida in balay lakoy Diyos?
[8] Keyen wakay Isos, Kamo agingat, karam kamo batay piyadaya mangyan. Angkataw aronaw in batay agrateng agalapet kangay ngaran keyen siro in Kiristo, osai keyen rateng wa in kabetek. Kamo ayaw miyanggat sa kansiro.
[9] No kamo karengey barita mga gira, mga kagolowan, na kamo ayaw agkalimo. Kailangan tokaw apo mga kataw ina, kamay yewed kay toloy rateng in kalobosan.
[10] Kansiyo kay siyabi keyen, Osai ka bansa batay aggira sa osai ka bansa, osai ka sakopan aglaban sa osai ka sakopan.
[11] Batay apo loni lakoy lakonaw, apo batay agkayawes, apo batay pandalan mangaskit sa baatte kobat. Apo din batay lomwas mga makalimo osai mga makasoyo pag mga tanda batang sa langit.
[12] Kamay bayo mibaloy ina pag boo kamo batay piyagdakep, batay piyagpangwatan daet. Kamo batay piyagbaba sa mga balay pagpaniponan matang osapen, kalbas piyagbilanggo. Panawen din sa kangay kamo batay piyagpaadap sa mga poon lakoy osai sa mga gobirnador.
[13] Na ina pag betek kamo batay kapatoldo in Maal pag Barita.
[14] Pakaeyaten in kanyo remrem, kamo ayaw toloy agkalimo agremrem no nakay in kanyo batay matiwid,
[15] angkataw kamo kangay batay piyagpakan kabaloyan osai mga matiwid idbatay alabanan idbatay adaeg in kanyo mga kalaban.
[16] In kanyo mga koyay in batay agpadakep sa kanyo, osai in kanyo mga belag, in kanyo mga kamalay, mga pagbelag. Kalbas in kalaati sa kanyo batay piyagbono.
[17] In boo batay agkabais sa kanyo panawen sa kangay.
[18] Kamay idbatay maidapo kamayba osai wagette ka kanyo abok.
[19] Kamo agpakarigen wa gayed, na kamo batay apo in boway idapo kalobosan.
[20] No kanyo ngiitan in Irosalim piyagribok wa mga sondalo, na kanyo wa atawanan bangen wa ina masida.
[21] Na pataboy wa sa agbaw in mga sa kobat Odiya. In mga sa bayan panaw wa, ayaw din pataboy asin in mga sa kobat.
[22] Angkataw ina wa in kabetek in Diyos batay agparosa sa mga kasokponan Israil, matang mibaloy in boo mga Agisolat.
[23] Asin pag kabetek ayawte wa in mga bonting, osai in mga agpasoso, angkataw batay rateng atai pag kobat in maloba pag kaidapan, in mga mangyan atai batay piyagparosa Diyos.
[24] Siro batay biyono sa gira, no yewed batay piyagbaba sa roma pag mga kobat matang piyangwat sogowan. In bayan Irosalim batay piyagsida wa gayed in mga yewed Odyo anggan kalbas wa in kabetek in mga yewed Odyo piyagpakan Diyos kabaloyan.
[25] Batay apo mga tanda sa ibeng, osai sa bolan, kadayo sa mga magirem. Sa kobat in dagat batay agaleng agistobo anggan in mga mangyan batay magolo in remrem, maloba alimowan.
[26] In mga mangyan batay maidapo in remrem agkalimo panawen agkariyaban sa mga batay mibaloy sa kobat, angkataw batay piyagpagolo in mga apo kabaloyan sa kiwang.
[27] Asin pag betek ako in Bodang Mangyan batay ngiitan mga mangyan sa osai ka libo agrateng wa ngani apo lakoy kangay kabaloyan, piyagngitan wa in kangay kalakoyen.
[28] No agparakay wa mibaloy ina pag boo, na kamo ayaw wa agrongkot, agkaanggay wa, angkataw agkabangen wa kamo piyaboway.
[29] Siyabi Isos sa kansiro osai ka alimbawa keyen, Kanyo pangkiten in yangaw igos osai in roma kay pag mga yangaw.
[30] No ina agpandaon wakay na kanyo atawanan agkaboka wakay in pangibeng.
[31] Na kataw daan ina no kanyo ngiitan agpangibaloy wa ina in kangay mga siyabi, na kanyo wa atawanan bangen wa in Diyos agsakop.
[32] Remremen kamo, bayo matay in boo mga mangyan agkaboway ngona ina pag boo batay wa mibaloy.
[33] Batay maidapo in langit osai in kobat, kamay in kangay mga siyabi idbatay maidapo.
[34] Alapeten in kanyo remrem, ayaw malibangaw, ayaw agpamiyasta, agpanlasing, agpanremrem waget sa mga makariyaban atai sa kobat, karam kamo yewed kay sandata toloy wa abel ina pag Ibeng.
[35] Angkataw in boo mga mangyan sa boo kobat batay aratengan ina pag Ibeng.
[36] Na kailangan kamo palagi agdamay ayaw aglimbang agpandalangin, matang kamo apo kabaloyan agdalan asin pag boo mga batay mibaloy idapo kamay nakay, kalbas kamo kapasabangen sa kangay sa Bodang Mangyan.
[37] Agpamatoldo Isos ibengibeng sa balay lakoy Diyos. Bayaponbayapon siyo agonaker sa boksor Olibowan, ista siyo agpamataw yabi.
[38] Agpasodip in mga mangyan pataboy sa balay lakoy Diyos matang agparengey sa kansiyo.