[1] ኢየሱስ መሊሱ ናብ ቤተ ጸሎት ኣይሁድ ኣተወ፤ ኣብኡ ኸዓ ኢዱ ዝሰለለት ሰብ ነበረ።
[2] ምእንቲ ክኸስዎ ድማ ብሰንበት ዘሕውዮ እንተ ኾይኑ ይጸናተውዎ ነበሩ።
[3] ኢየሱስ ከዓ ነቲ ኢዱ ዝሰለለት ሰብ ተሥእሞ ኣብ ማእኸል ደው በል! በሎ።
[4] ንኣኣቶም ድማ ብሰንበትስ ጽቡቕ ምግባርዶ ወይ ክፉእ ምግባር? ነፍሲ ምድኃንዶ ወይ ምቕታል ይግባእ? በሎም። ንሳቶም ግና ስቕ በሉ።
[5] በቲ ትረት ልቦም ጕህዩ ነቶም ኣብ ዙርያኡ ዝነበሩ ዂሎም ብቝጥዓ ጠመቶም፤ ነቲ ሰብኣይ ከዓ ኢድካ ዘርግሕ! በሎ፤ ንሱ ድማ ዘርግሓ፤ እታ ኢዱውን ሓወየት።
[6] ፈሪሳውያን ድማ ወፂኦም ብቕልጡፍ ከመይ ገይሮም ከም ዝቐትልዎ ምስ ናይ ሄሮድስ ሰባት ተማኸሩ።
[7] ኢየሱስ ምስ ደቀ መዛሙርቱ ናብ ባሕሪ ኣግለሰ፤ ካብ ይሁዳን ካብ ገሊላን ከዓ ብዙኃት ሰባት ሰዓብዎ።
[8] ከምኡውን ብዙኅ ሕዝቢ ነቲ ዂሉ ዝገበሮ ሰሚዑ ኻብ ኢየሩሳሌም ካብ ኤዶምያስ ካብ ማዕዶ ዮርዳኖስ ካብ ዙርያ ጢሮስን ሲዶናን ናብኡ መጸ።
[9] ብምኽንያት ብዝኂ ሕዝቢ ሰብ ምእንቲ ኸይዳፍኦ ጃልባ ኣዳልዮም ክጸንሑሉ ንደቀ መዛሙርቱ ነገሮም።
[10] ንብዙኃት ኣሕውይዎም ነበረ እሞ ሕማም ዘለዎም ኲሎም ምእንቲ ኽነኽእዎ ኣብ ልዕሊኡ ኽሳዕ ዝወድቁ ይደፋፍኡ ነበሩ።
[11] እቶም ርኹሳት መናፍስቲ ምስ ረአይዎ ንስኻ ወዲ እግዚኣብሔር ኢኻ! ኢሎም እናጸርሑ ኣብ ቅድሚኡ ይወድቁ ነበሩ።
[12] ንሱ ግና ከየግህድዎ ኣበርቲዑ ኣዘዞም።
[13] ኢየሱስ ናብ እምባ ደይቡ ነቶም ዝደለዮም ጸውዖም፤ ንሳቶም ከዓ ናብኡ መጹ።
[14] ምስኡ ክኾኑን ክሰብኩ ምእንቲ ኽልእኾምን ዓሠርተ ኽልተ መሪጹ ሓዋርያት ኢሉ ሰመዮም።
[15] ሕሙማት ከሕውዩን ኣጋንንቲ ኸውፅኡን ድማ ሥልጣን ሃቦም።
[16] እቶም ዓሠርተ ኽልተ ድማ፦ ጴጥሮስ ኢሉ ዝሰመዮ ስምዖን
[17] እቶም ቦኣኔርጌስ ማለት ደቂ ነጐድጓድ ኢሉ ዝሰመዮም ደቂ ዘብዴዎስ ያዕቆብን ኃዉ ዮሓንስን
[18] እንድርያስን ፊልጶስን በርተሎሜዎስን ማቴዎስን ቶማስን ወዲ እልፍዮስ ያዕቆብን ታዴዎስን ስምዖን ቀነናዊን
[19] እቲ ኣኅሊፉ ዝሃቦ ይሁዳ ኣስቆሮታዊን እዮም።
[20] ኢየሱስ ናብ ገዛ ምስ ኣተወ ኸዓ ንሱን ደቀ መዛሙርቱን ምብላዕ ምግቢ ኽሳዕ ዝስእኑ መሊሱ ብዙኅ ሕዝቢ ተኣከበ።
[21] እቶም ኣዝማዱ ኸዓ ዓቢዱ እዩ እንትበሃል ሰሚዖም ክኅዝዎ መጹ።
[22] ካብ ኢየሩሳሌም ዝወረዱ መምህራን ሕጊ ድማ ብኤል ዜቡል ኂዝዎ ኣሎ፤ ንአጋንንቲውን ብሓለቓ ኣጋንንቲ እዩ ዘውጽኦም ዘሎ በሉ።
[23] ኢየሱስ ድማ ጸውዖም፤ ብምስላታት ከዓ ኸምዙይ በሎም፦ ሰይጣን ንሰይጣን ከመይ ገይሩ ኸውፅኦ ይኽእል?
[24] ሓንቲ መንግሥቲ ንስንሳታ እንተ ተፈላልያ እታ መንግሥቲ እቲኣ ኽትቀውም ኣይትኽእልን።
[25] ሓንቲ ስድራውን ንስንሳታ እንተ ተፈላልያ እታ ስድራ እቲኣ ኽትቀውም ኣይትኽእልን።
[26] ሰይጣን ከዓ ንስንሳቱ ተጻሊኡ እንተ ተፈላልዩ ይጠፍእ ደኣ እምበር ኣይቐውምን።
[27] ነቲ ኃያል ቅድም እንተይኣሰረ ኣብ ገዛ ኃያል ኣትዩ ንብረቱ ኽጕርጕር ዝኽእል ሓደኳ የለን። ምስ ኣሰሮ ግና ነቲ ገዝኡ ኽጕርጕር ይኽእል።
[28] እማን እብለኩም ኣለኹ፤ ንደቂ ሰብ ኲሉ ኃጢኣትን ጸርፍን ክኅደገሎም እዩ።
[29] እቲ ንመንፈስ ቅዱስ ዝጸረፈ ግና ንዘለዓለም ኲነኔ ደኣ ይኾኖ እምበር ፈጺሙ ኣይኅደገሉን እዩ።
[30] ከምዙይ ዝበሎም ድማ ርኹስ መንፈስ ኃዲርዎ ስለ ዝበልዎ እዩ።
[31] እኖኡን ኣኅዋቱን ናብኡ መጹ፤ ኣብ ደገ ቖይሞም ከዓ ኽጽውዕዎ ለኣኹሉ።
[32] ብዙኅ ሕዝቢ ኣብ ዙርያኡ ተቐሚጡ ነበረሞ እንሆ እኖኻን ኣኅዋትካን ኣብ ወፃኢ ደው ኢሎም ይደልዩኻ ኣለዉ በልዎ።
[33] ንሱ ድማ እኖይ መን እያ? ኣኅዋተይከ እንመን እዮም? ኢሉ መለሰሎም።
[34] ነቶም ኣብ ዙርያኡ ተቐሚጦም ዝነበሩ እናጠመተ እኖይን ኣኅዋተይንስ እኒሀዉ በለ።
[35] ናይ እግዚኣብሔር ፍቓድ ዝገብር ኲሉ ኃወይን ሓፍተይን እኖይን ኢዩ በሎም።