[1] ኢየሱስ ካብኡ ተልዒሉ ናብ ሃገር ይሁዳን ናብ ማዕዶ ዮርዳኖስን ከደ። መሊሱ ብዙኅ ሕዝቢ ናብኡ ተኣከበ፤ ከም ልማዱውን መሃሮም።
[2] ፈሪሳውያን ድማ ምእንቲ ኽፍትንዎ መጺኦም ሰብኣይ ንሰበይቱ ኽፈትሓ ይግባእ ድዩ? ኢሎም ጠየቕዎ።
[3] ኢየሱስ ድማ ሙሴ እንታይ ኢሉ ኣዘዘኩም? በሎም።
[4] ንሳቶም ከዓ ሙሴስ መፍትሒኣ ጽሑፍ ጽሒፍና ክንፈትሓ ፈቒዱልና እዩ፤ በልዎ።
[5] ኢየሱስ ከዓ፦ ሙሴስ ብሰንኪ ትረት ልብኹም እዩ እዝ ትእዛዝ እዙይ ዝጸሓፈልኩም።
[6] ካብ መጀመርታ ፍጥረት ግና እግዚኣብሔር ሰብኣይን ሰበይትን ገይሩ እዩ ዝፈጠሮም።
[7] ስለዙይ ሰብኣይ ኣቦኡን እኖኡን ኃዲጉ ምስ ሰበይቱ ይወሃድ።
[8] ክልቲኦም ድማ ሓደ ኣካል ይኾኑ፤ እምበኣር ሓደ ኣካል እዮም እምበር ክልተ ኣይኮኑን።
[9] እምበኣርከስ ነቲ እግዚኣብሔር ሓደ ዝገበሮ ሰብ ኣይፍለዮ፤ በሎም።
[10] ኣብ ገዛ ኸዓ ደቀ መዛሙርቱ ብዛዕባ እዝ ነገር እዙይ ደጊሞም ጠየቕዎ።
[11] ንሱ ድማ እቲ ሰበይቱ ፈቲሑ ኻልእ ዘእቱ ኣብ ልዕሊኣ ይዝሙ።
[12] እታ ሰብኣያ ፈቲሓ ኻልእ እተእቱ ድማ ትዝሙ፤ በሎም።
[13] ኢዱ ኸንብረሎም ድማ ንሕፃናት ናብኡ ኣምጽእዎም፤ ደቀ መዛሙርቱ ግና ነቶም ዘምጽእዎም ገሠጽዎም።
[14] ኢየሱስ ነዙይ ምስ ረአየ ተቖጢዑ ኸምዙይ በሎም፦ ሕፃናት ናባይ ይምጽኡ ኅደግዎም፤ መንግሥቲ እግዚኣብሔር ነዞም ከምዚኣቶም ዝበሉ እያ እሞ ኣይትኸልክልዎም።
[15] እቲ ንመንግሥቲ እግዚኣብሔር ከም ሕፃን ኮይኑ ዘይተቐበላ ኸቶ ኸም ዘይኣትዋ እማን እብለኩም ኣለኹ፤ በሎም።
[16] ሓቝፉ ድማ ኢዱ ኣብ ልዕሊኦም ኣንቢሩ ባረኾም።
[17] ኢየሱስ ብመንገዲ ክኸይድ እንተሎ ሓደ ሰብኣይ እናጐየየ ናብኡ መጺኡ ሰገደሉ። ኣታ ሕያዋይ መምህር! ናይ ዘለዓለም ሕይወት ክወርስስ እንታይ ክገብር? ኢሉ ድማ ጠየቖ።
[18] ኢየሱስ ከዓ ኸምዙይ በሎ፦ ንምንታይ ሕያዋይ ትብለኒ? እንትርፊ ሓደ እግዚኣብሔር ሕያዋይ የለን።
[19] ትእዛዛት ትፈልጥ ኢኻ፤ ኣይትቕተል፤ ኣይትዘሙ፤ ኣይትስረቕ፤ ብሓሰት ኣይትመስክር፤ ኣይትዓምፅ፤ ኣቦኻን እኖኻን ኣኽብር! በሎ።
[20] ንሱ ኸዓ መምህር! እዙይ ኲሉስ ካብ ንእስነተይ ጀሚረ ሓሊየዮ ኣለኹ፤ ኢሉ መለሰሉ።
[21] ኢየሱስ ከዓ ጠሚቱ ፈተዎ እሞ ሓንቲ ተሪፋትካ ኣላ፤ ኪድሞ ዘለካ ዂሉ ሼጥካ ንድኻታት ሃብ፤ ኣብ ሰማይ ሃብቲ ኽትረክብ ኢኻ መስቀልካ ኣልዒልካ ድማ ነዓ ተኸተለኒ፤ በሎ።
[22] ንሱ ግና ብዙኅ ጥሪት ስለ ዝነበሮ በዝ ቓል እዙይ ኃዘነ እናጐሃየውን ከደ።
[23] ኢየሱስ ድማ ናብ ደቀ መዛሙርቱ እናጠመተ ገንዘብ ንዘለዎም ናብ መንግሥተ ሰማያት ክኣትዉ ኽንደይ ከቢድ እዩ! በሎም።
[24] እቶም ደቀ መዛሙርቱ ኸዓ በዝ ቓል እዙይ ተገረሙ፤ ኢየሱስ ድማ መሊሱ፦ ደቀይ! ብሃብቲ ንዝተኣማመኑ ናብ መንግሥቲ እግዚኣብሔር ምእታው ከመይ ከቢድ እዩ!
[25] ሃብታም ናብ መንግሥቲ እግዚኣብሔር ካብ ዝኣቱስ ግመል ብዓይኒ መርፍእ ክሓልፍ ይቐልል፤ በሎም።
[26] ንሳቶም ከዓ ብዙኅ ተገረሙ፤ ንስንሳቶም ድማ መን ደኣ ኾን ክድኅን ይኽእል? ተበሃሃሉ።
[27] ኢየሱስ ከዓ ናብኣቶም እናጠመተ እዙይ ብእግዚኣብሔር እምበር ብሰብ ኣይከኣልን፤ ብእግዚኣብሔር ኲሉ ይከኣል እዩሞ በሎም።
[28] ጴጥሮስ ከዓ እንሆ እምበኣር ንሕና ዂሉ ኃዲግና ተኸቲልናካ ክብሎ ጀመረ።
[29] ኢየሱስ ድማ መሊሱ ኸምዙይ በሎም፦ እማን እብለኩም ኣለኹ፤ ምእንታይን ምእንቲ ወንጌልን ኢሉ ገዛ ወይ ኣኅዋት ወይ ኣኃት ወይ እኖ ወይ ኣቦ ወይ ሰበይቲ ወይ ውሉድ ወይ ገራሁ ዝኃደገ
[30] ሕዚ ኣብዝ ዓለም እዙይ ምስ ስደት ገዛ ኣሕዋት ኣሓት እኖ ውሉድ ገራሁ ሚእቲ ኻዕበት ዘይኽፈል ኣብ ዝመጽእ ዓለም ከዓ ሕይወት ዘለዓለም ዘይቕበል ሓደኳ የለን።
[31] ብዙኃት ቀዳሞት ዳኅረዎት ክኾኑ እዮም፤ ዳኅረዎት ድማ ቐዳሞት ክኾኑ እዮም።
[32] ናብ ኢየሩሳሌም ክድይቡ ኣብ መንገዲ እንተለዉ ኢየሱስ ቀቅድሚኦም ይኸይድ ነበረ፤ ንሳቶም ከዓ ተገረሙ። እቶም ዝስዕቡ ዝነበሩውን ፈርኁ። ኢየሱስ ድማ ነቶም ዓሠርተ ኽልተ ደቀ መዛሙርቱ ወሲዱ እቲ ኽበጽሖ ዘለዎ ኽነግሮም ጀመረ።
[33] እንሆ ናብ ኢየሩሳሌም ንድይብ ኣለና፤ ንወዲ ሰብ ኣብ ኢድ ሊቃነ ካህናትን መምህራን ሕግን ከትኅዝዎ እዮም፤ ንሳቶም ድማ ንሞት ክፈርድዎ ነሕዛብውን ኣኅሊፎም ክህብዎ እዮም፤
[34] ንሳቶምውን ከላግጹሉ እንትፍ ክብሉሉ ክገርፍዎ ክቐትልዎውን እዮም፤ ብሣልሰይቲ መዓልቲውን ክትሥእ እዩ፤ በሎም።
[35] ያዕቆብን ዮሓንስን ክልቲኦም ደቂ ዘብዴዎስ ናብኡ ቐሪቦም መምህር! ዝለመንናካ ኽትገብረልና ንደሊ ኣለና፤ በልዎ።
[36] ንሱ ኸዓ እንታይ ክገብረልኩም ትደልዩ? በሎም።
[37] ንሳቶም ድማ ኣብ ክብርኻ ሓዴና ብየማንካ ሓዴና ድማ ብጸጋምካ ኽንቅመጥ ፍቐደልና፤ በልዎ።
[38] ኢየሱስ ግና እትልምንዎ ኣይትፈልጡን ኢኹም፤ እቲ ኣነ ዝሰትዮ ናይ መከራ ጽዋዕ ኽትሰትዩ እቲ ኣነ ዝጥመቖ ጥምቀትውን ክትጥመቑኸ ትኽእሉዶ? በሎም።
[39] ንሳቶም ከዓ እወ ንኽእል፤ በልዎ። ኢየሱስ ድማ ነቲ ኣነ ዝሰትዮ ናይ መከራ ጽዋዕ ኽትሰትይዎ ነቲ ኣነ ዝጥመቖ ጥምቀትውን ክትጥመቅዎ ኢኹም።
[40] ኣብ የማነይን ኣብ ጸጋመይን ምቕማጥ ግና ኣቦይ ንዘዳለወሎም እዩ እምበር ኣነ ኣይኮንኩን ዝህቦ በሎም።
[41] እቶም ዓሠርተ ደቀ መዛሙርት ሰሚዖም ብያዕቆብን ዮሓንስን ተቖጥዑ ።
[42] ኢየሱስ ግና ጸዊዑ ፦ ነሕዛብ እቶም ሹመኛታቶም ከም ዝገዝእዎም እቶም ዓበይቶም ድማ ኣብ ልዕሊኦም ከም ዝሥልጥኑ ትፈልጡ ኢኹም።
[43] ኣባኻትኩም ግና ኸምኡ ኣይኮነን። እቲ ዓብዪ ክኸውን ዝደሊ ኣገልጋሊኹም ይኹን።
[44] እቲ ኻባኻትኩም ልዕሊ ዂሉ ክኸውን ዝደሊ ኸዓ ንሱ ተኣዛዚኹም ይኹን።
[45] ወዲ ሰብ ከገልግልን ሕይወቱ ቤዛ ብዙኃት ክህብን እምበር ከገልግልዎ ኣይመጸንሞ በሎም።
[46] ናብ ኢያሪኮ ድማ ኣተዉ፤ ኢየሱስ ካብ ኢያሪኮ ምስ ደቀ መዛሙርቱን ምስ ብዙኅ ሕዝብን ክወፅእ እንተሎ ባርጤሜዎስ ንሱውን ወዲ ጤሜዎስ እቲ ዕዉር ኣብ ወሰን መንገዲ ተቐሚጡ ይልምን ነበረ።
[47] ናይ ናዝሬት ኢየሱስ ምዃኑ ምስ ሰምዐ ዓው ኢሉ ኢየሱስ ወዲ ዳዊት! መሓረኒ! ኽብል ጀመረ።
[48] ብዙኃት ድማ ስቕ ክብል ገሠጽዎ፤ ንሱ ግና ኦ ወዲ ዳዊት! መሓረኒ! እናበለ ዓው ኢሉ ጸርሐ።
[49] ኢየሱስ ድማ ደው ኢሉ ነቲ ዕውር ጸውዕዎ! ኢሉ ኣዘዘ፤ ጸዊዖም ከዓ ኣይዞኻ! ተሥእ! ኢየሱስ ይጽውዐካ ኣሎ! በልዎ።
[50] ንሱ ኸዓ ኽዳኑ ደርብዩ፤ ተሢኡ ናብ ኢየሱስ መጸ።
[51] ኢየሱስ ድማ እንታይ ክገብረልካ ትደሊ? ኢሉ ጠየቖ፤ እቲ ዕዉር ከዓ መምህር ክርኢ፤ በሎ።
[52] ኢየሱስ ከዓ ኪድ፤ እምነትካ ኣሕውያትክ፤ በሎ። ሽዑ ንሽዑ ረአየ፤ ኣብ መንገዲውን ተኸተሎ።