[1] యెహోవా మోషేతో ఇంకా అన్నాడు:
[2] “నీవు సాగగొట్టిన వెండితో రెండు బూరలు చేయించు. సమాజాన్ని సమకూర్చడానికి సేనలు బయలుదేరేలా చేయడానికీ వాటిని వినియోగించాలి.
[3] రెండు బూరల ధ్వని వినిపించే టప్పుడు సమాజమంతా సన్నిధిగుడారం ద్వారం ఎదుట నీ దగ్గర సమకూడాలి.
[4] ఒకే బూర ఊదితే నాయకులు – ఇస్రాయేల్ గోత్రాల అధిపతులు – మాత్రమే నీ దగ్గర సమకూడాలి.
[5] ఆపద సూచకంగా బూర పదే పదే గట్టిగా ఊదితే తూర్పు దిక్కున దిగిన శిబిరాలవారు బయలుదేరాలి.
[6] రెండోసారి కూడా అలా ఊదితే దక్షిణ దిక్కున దిగిన శిబిరాలవారు బయలు దేరాలి. వారి ప్రయాణాల కోసం అలా ఊదాలి.
[7] సమాజాన్ని సమకూర్చడానికి బూర ఊదాలి గాని అలా పదే పదే ఊదకూడదు.
[8] ఆ బూరలు ఊదవలసినది అహరోను కొడుకులైన యాజులు. మీ తరతరాలకు ఇది ఎప్పటికీ నిలిచి ఉండే చట్టం.
[9] మీ దేశంలో మీ పై బడే శత్రువులతో యుద్ధానికి బయలుదేరేటప్పుడు ఆ బూరలు పదేపదే గట్టిగా ఊదాలి. అప్పుడు మీ దేవుడైన యెహోవా మీ విషయం ఆలోచన చేస్తాడు, మీ శత్రువుల బారినుంచి మిమ్ములను రక్షిస్తాడు.
[10] మహోత్సవకాలాలలో, నియామక కాలాలలో, నెలల ఆరంభంలో మీరు హోమాలూ శాంతిబలులూ సమర్పించేటప్పుడు ఆ బూరలు ఊదాలి. అప్పుడవి మీ దేవుని సన్నిధానంలో మీ కోసం స్మృతిచిహ్నంగా ఉంటాయి. నేను యెహోవాను, మీ దేవుణ్ణి”.
[11] రెండో సంవత్సరం రెండో నెల ఇరవైయో రోజున మేఘాన్ని శాసనాల దైవనివాసం మీదనుంచి పైకెత్తడం జరిగింది.
[12] అప్పుడు ఇస్రాయేల్ ప్రజలు సీనాయి ఎడారి నుండి ప్రయాణాలు చేయసాగారు. తరువాత మేఘం పారాన్ ఎడారిలో నిలిచింది.
[13] మోషే ద్వారా యెహోవా ఇచ్చిన మాట ప్రకారం వారు ఆ మొదటి ప్రయాణం చేశారు.
[14] ముందు తరలివెళ్ళిన వారు యూదా శిబిర ధ్వజమున్నవారు. వారి సేనల ప్రకారం వారు బయలుదేరారు. ఆ సేనానాయకుడు అమ్మీనాదాబు కొడుకైన నయస్సోను.
[15] ఇశ్శాకారు గోత్ర సేనకు నాయకుడు సూయార్ కొడుకైన నెతనేల్.
[16] జెబూలూను గోత్ర సేనకు నాయకుడు హేలోను కొడుకైన ఏలీయాబ్.
[17] దైవనివాసాన్ని తీసివేసిన తరువాత గెర్షోను వంశస్థులూ మెరారి వంశస్థులూ దానిని మోస్తూ ప్రయాణంలో సాగిపోయారు.
[18] రూబేను శిబిర ధ్వజమున్న వారు వారి సేనల ప్రకారం తరలివెళ్ళారు. వాటికి నాయకుడు షెదేయూర్ కొడుకు ఏలీసూర్.
[19] షిమ్యోను గోత్ర సేనకు నాయకుడు సూరీషదాయి కొడుకైన షెలుమీయేల్.
[20] గాదు గోత్ర సేనకు నాయకుడు దెయువేల్ కొడుకైన ఎలీయాసాఫ్.
[21] తరువాత కహాతు వంశస్థులు పవిత్ర వస్తువులను మోస్తూ తరలివెళ్ళారు. దిగేచోటికి వారు చేరేలోగా దైవనివాసాన్ని నిలబెట్టడం జరిగింది.
[22] ఎఫ్రాయిం శిబిర ధ్వజమున్న వారు వారి సేనల ప్రకారం తరలివెళ్లారు. వాటికి నాయకుడు అమీహూదు కొడుకైన ఎలీషామా.
[23] మనష్షే గోత్ర సేన నాయకుడు పెదాసూర్ కొడుకైన గమాలీయేల్.
[24] బెన్యామీను గోత్ర సేనకు నాయకుడు గిద్యోనీ కొడుకైన అబీదాను.
[25] దాను శిబిర ధ్వజమున్నవారు తరలివెళ్ళారు. శిబిరాలన్నిటిలో ఆ శిబిరమే చివరిగా తరలివెళ్ళింది. ఆ సేనలకు నాయకుడు అమీషదాయి కొడుకైన అహీయెజెరు.
[26] ఆషేరుగోత్ర సేనకు నాయకుడు ఒక్రాను కొడుకైన పగీయేల్.
[27] నఫ్తాలిగోత్ర సేనకు నాయకుడు ఏనాను కొడుకైన అహీరా.
[28] ఇస్రాయేల్ ప్రజలు ప్రయాణాలలో సాగిపోయినప్పుడు ఈ వరుస ప్రకారం వారి వారి సేనల ప్రకారం తరలివెళ్ళేవారు.
[29] మోషే తన మామ కొడుకుతో (అతడి పేరు హోబాబ్; అతడు మిద్యాను దేశస్తుడైన రగూయేల్ కొడుకు), “యెహోవా మాకిస్తానని చెప్పిన స్థలానికి మేము పయనిస్తున్నాం. మాతోకూడా రండి. మేము మీకు మేలు చేస్తాం. ఇస్రాయేల్ ప్రజలకు తాను చేయబోయే మేలు విషయం యెహోవా వాగ్దానం చేశాడు” అన్నాడు.
[30] అందుకు హోబాబ్ “నేను రాను. నా దేశానికి నా చుట్టాల దగ్గరికి వెళ్తాను” అన్నాడు.
[31] మోషే అన్నాడు: “మమ్ములను విడవకండి. ఈ ఎడారిలో మేము దిగవలసిన స్థలాలు మీకు బాగా తెలుసు. మీరు మాకు కళ్ళలాగా ఉంటారు.
[32] మీరు మాతోకూడా వస్తే, యెహోవా మాకు చేసే ఉపకారాలలో మేము మిమ్ములను భాగస్వాములను చేస్తాం.”
[33] యెహోవా పర్వతంనుంచి వారు మూడు రోజుల ప్రయాణం చేశారు. వారికి విశ్రాంతి స్థలం చూడడానికి ఆ మూడు రోజుల ప్రయాణంలో యెహోవా ఒడంబడికపెట్టె వారికి ముందుగా సాగిపోయింది.
[34] వారు దిగిన స్థలంనుంచి సాగినప్పుడు పగటివేళ యెహోవా మేఘం వారికి పైగా ఉంది.
[35] ఆ పెట్టె బయలుదేరినప్పుడెల్లా మోషే ఇలా అనేవాడు: “యెహోవా! లే! నీ శత్రువులు చెదరిపోతారు గాక! నిన్ను ద్వేషించేవాళ్ళు నీ ముందునుంచి పారిపోతారు గాక!”
[36] పెట్టె నిలిస్తే అతడు ఇలా అనేవాడు: “యెహోవా! వేలాదివేల ఇస్రాయేల్ ప్రజల మధ్యకు మళ్ళీ రా!”