[1] No hott da Bildad funn Suah ksawt,
[2] “Vee lang zaylsht du so sacha sawwa? Dei vadda sinn vi en grohsah vind.
[3] Dutt Gott sei richtes fadrayya? Dutt da Awlmechtich letz macha vass recht is?
[4] Dei kinnah henn an demm ksindicht geyyich Gott, so hott eah si ivvah-gedrayt zu di shtrohf funn iahra sinda.
[5] Vann du Gott suchsht fa hilf, un ohhaldsht da Awlmechtich frohwa,
[6] vann du rein un gerecht bisht, dann dutt eah geviss sich rishta fa diah helfa, un diah zrikk gevva vass dei is.
[7] Vass du katt hosht eahshtah, zayld vennich sei, geyyich vass du havva zaylsht shpaydah.
[8] Yusht frohk selli es eahshtah glaybt henn, un finn aus vass iahra feddah gland henn,
[9] fa miah voahra yusht geshtah geboahra un vissa nix, unsah dawwa uf di eaht sinn yusht en shadda.
[10] Si kenna dich lanna un diah sawwa; iahra vadda sinn sacha es si gland henn.
[11] Kenna vassah-shtengel vaxa vo's nett nass is? Kenna di bull-rosha vaxa unni vassah?
[12] Doch, diveil es si noch gree un nett abkshnidda sinn, dann doon si alsnoch kshvindah fadadda es anri blansa.
[13] So gayt's mitt alli-ebbah es Gott fagest, un di hofning funn di ungettlicha vatt faloahra.
[14] Vass eah sich druff falost, zayld fagay, sei hofning is vi en shpinna-nesht.
[15] Sei hofning is in sei haus, avvah's zayld nett shtay, eah henkt ditzu, avvah's lost een nunnah.
[16] Eah is vi en gvessaht blansa in di sunn, sei vatzla kumma uf ivvahrawlich im goahra.
[17] Eah vikkeld sei vatzla um di shtay rumm, un gukt fa ufvaxa zvishich di shtay.
[18] Avvah vann eah raus grobt vatt funn seim blatz, no sawkt sellah blatz, ‘Ich habb dich nee nett ksenna.’
[19] Gukket, dess is awl di frayt es es layva gebt, un anri blansa vaxa aus em shtawb.
[20] Gott dutt geviss nett en gerechtah mann nunnah drayya, un gebt aw nett graft zu selli es evil doon.
[21] Eah zayld alsnoch dei maul filla mitt laches, un dei leftz mitt fraylichi yacht.
[22] Selli es dich hassa zayla geglayt sei mitt shohm, un di tents funn di gottlohsa zayla nimmi shtay.”