[1] Da Eliphas funn Theman hott no ksawt,
[2] “Kann ennichah mensh Gott raus helfa? Kann even en mensh mitt veisheit eem helfa?
[3] Vass fa blesiah veah's zumm Awlmechticha vann du gerecht veahsht? Vass goot dayt's eem du vann du unshuldich veahsht?
[4] Is es fa dei Gottes-furcht es eah dich shtrohft, un dich richta dutt?
[5] Is es nett fa dei grohsi ungerechtichkeit? Sinn nett dei sinda unni end?
[6] Du hosht dei breedah geld glaynd un funn iahra sacha zrikk kalda unni uahsach, du hosht iahra glaydah gnumma un si nakkich glost.
[7] Du hosht di dashticha kenn vassah gevva, un hosht's ess-sach funn di hungahricha kalda.
[8] Du voahsht en mechtichah mensh mitt land, un hosht dei freind glost druff voona.
[9] Du hosht di vitt-veivah leah vekk kshikt; du hosht di kinnah unni eldra nunnah gedredda.
[10] Sell is favass es falla gans um dich rumm sinn, un furcht dich bletzlich ivvah-gnumma hott.
[11] Sell is favass es es dunkla dich hald funn sayna, un's vassah dich zu dekt.
[12] Is nett Gott hohch drovva im himmel? un gukk moll vi hohch drovva es di haychshta shtanna sinn!
[13] Doch sawksht du, ‘Vass vayst Gott? Kann eah richta vann eah hinnich dunkli volka is?
[14] Di volka shneida een ab, so es eah uns nett sayna kann, un eah lawft datt drovva rumm im himmel.’
[15] Zaylsht du ohhalda da ald vayk gay, es gottlohsi mennah ganga sinn?
[16] Si voahra vekk gedrawwa eb's iahra zeit voah, es vassah hott iahra grund vekk gvesha.
[17] Si henn ksawt zu Gott, ‘Loss uns gay! Vass kann da Awlmechtich du zu uns?’
[18] Doch hott eah iahra heisah kfild mitt goodi sacha, avvah ich fashtay da roht funn di gottlohsa nett.
[19] Di gerechta sayna di ungettlicha iahra shtrohf, un sinn froh, un di unshuldicha fashpodda si.
[20] Si sawwa, ‘Unsah feinda sinn abkshnidda, un vass ivvahrich is hott's feiyah ufgebrend.’
[21] Nau gebb dich ivvah zu Gott un mach fridda mitt eem, no kumd feel goodes datt raus.
[22] Nemm lanning funn sei maul, un layk sei vadda uf in dei hatz.
[23] Vann du zrikk draysht zumm Awlmechticha, no vasht du ufgebaut; vann du ungerechtichkeit vekk dusht funn deim haus,
[24] un shmeisht dei gold in da shtawb, un shtroisht dei gold funn Ophir rumm unnich di grikka shtay,
[25] no zayld da Awlmechtich dei gold sei, un aw dei keshtlich silvah.
[26] No zaylsht du dich froiya im Awlmechticha, un zaylsht dei ksicht nuff hayva zu Gott.
[27] Du zaylsht bayda zu eem, un eah heaht dich, un du dusht vass du fashprocha hosht zu eem.
[28] Vass du diah foah-nemsht zayld goot ausdrayya, un's licht zayld uf dei vayya sheina.
[29] Selli es sich daymeedicha, haybt eah uf, un selli es iahra awwa nunnah drayya, helft eah.
[30] Even sellah es nett unshuldich is, kann frei gmacht sei, eah vatt frei gmacht deich di reinichkeit funn dei hend.”