[1] Da Hah hott no ksawt zumm Hiob:
[2] “Zayld sellah es eiyaht mitt em Awlmechticha, een recht setza? Loss sellah es Gott pshuldicht eem andvat gevva!”
[3] No hott da Hiob andvat gevva zumm Hah un hott ksawt:
[4] “Ich binn's nett veaht, vi kann ich diah andvat gevva? Ich du mei hand ivvah mei maul.
[5] Ich habb aymol kshvetzt, avvah ich kann dich nett andvadda; zvay moll, avvah ich sawk nimmi may.”
[6] No hott da Hah kshvetzt zumm Hiob aus em shtoahm:
[7] “Shtay uf un risht dich vi en mann; ich zayl dich sacha frohwa, un du gebsht miah andvat.
[8] Zaylsht du veiklich mei gericht zu nix macha? Daytsht du mich fadamma yusht so es du gerecht bisht?
[9] Hosht du en oahm vi Gott, un hosht du en shtimm es dimmeld vi seini?
[10] Du dich oh mitt grohsi eah un glitz, glayt dich mitt hallichkeit un kaynich-eah.
[11] Leah dei haysah zann aus; gukk an di hohchmeedicha un mach si daymeedich.
[12] Yau, gukk an di shtolsa un faniddah si, drett di gottlohsa nunnah vo si shtayn.
[13] Fagrawb si awl zammah im shtawb, bind si im blatz vo di dohda sinn.
[14] No binn ich da eahsht fa bekenna es dei rechtsi hand diah helfa kann.
[15] Gukk moll's diah da behemoth, deah es ich gmacht habb vo ich dich gmacht habb. Eah frest graws vi en ox.
[16] Gukk moll di grefta in seim leib, un di macht un graft in seim bauch.
[17] Sei shvans shtekt nuff vi en cedar-bohm, di flexa in sei hifta sinn zammah kflochta.
[18] Sei gnocha sinn vi shteiki shtikkah bronze, un sei bay vi eisichi rooda.
[19] Eah is da eahsht funn Gott sei verka, avvah deah es een gmacht hott kann een zrikk hayva mitt sei shvatt.
[20] Di hivla gevva eem sei ess-sach, un awl di vilda diahra shpeela datt.
[21] Eah laykt sich anna unnich di lotus blansa, un fashtekkeld sich unnich di hohcha shtengel am vassah nohch.
[22] Lotus blansa dekka een zu mitt shadda, un di bablah-baym an di grikk noch sinn um een rumm.
[23] Eah feicht sich nett vann da revvah ivvah-lawft, un is unbekimmaht vann da Jordan nuff an sei maul kumd.
[24] Kann ennich ebbah een fanga bei sei awwa blind macha, adda mitt en fall es sei naws deich shtecht?”