[1] No hott da Hiob ohkalda shvetza un hott ksawt,
[2] “So shuah es Gott laybt, deah es mei recht vekk gnumma hott, un da Awlmechtich, deah es mei sayl bedreebt gmacht hott,
[3] so lang es ich layva habb in miah, un da ohften funn Gott in mei naws is,
[4] dann zayla mei leftz nix unrechtes sawwa un mei zung kenn falshheit sawwa.
[5] Ich zayl selayva nett uf aykna es diah recht sind; biss ich shteahb, zayl ich sawwa es ich unshuldich binn.
[6] Funn mei gerechtichkeit binn ich shuah un gebb's nett uf, mei hatz is nett gedruvveld so lang es ich layb.
[7] Mach mei feinda sei es vi di gottlohsa, un selli es geyyich mich shaffa vi di ungerechta.
[8] Vass fa hofning hott da gottlohs vann eah abkshnidda is, vann Gott sei layva nemd?
[9] Dutt Gott sei roofes heahra, vann angsht ivvah een kumd?
[10] Zayld eah frayt havva im Awlmechticha? Zayld eah Gott ohroofa di gans zeit?
[11] Ich vill eich lanna veyyich Gott sei macht, da vayk fumm Awlmechticha hald ich nett funn eich.
[12] Diah hend dess awl selvaht ksenna, so favass shvetzet diah so dumm?
[13] Dess is da lohn es da gottlohs mensh grikt funn Gott, un di eahbshaft es da unfashtendich mensh grikt fumm Awlmechticha.
[14] Even vann eah feel kinnah hott, doch zayla si umkumma bei em shvatt, sei nohch-kummashaft zayld nett satt vadda mitt broht.
[15] Selli es ivvahrich sinn vadda in's grawb gebrocht deich peshtelens, un iahra vitt-veivah zayla nett heila.
[16] Even vann eah geld zammah sammeld vi da shtawb, un glaydah sammeld vi grund heifa,
[17] vass eah zammah sammeld, zayld gvoahra sei bei anri, un di unshuldicha fadayla sei silvah.
[18] Eah baut sei haus vi en shpinna-nesht, adda vi en heisli es ebbah drinn bleibt fa's feld vatsha.
[19] 'S letsht mohl gayt eah in's bett en reichah mann, vann eah sei awwa uf macht is alles fatt.
[20] Angsht kumd ivvah een vi hohch vassah, en grohsah vind nemd een vekk deich di nacht.
[21] Da east vind haybt een uf un drawkt een vekk, eah nemd een vekk funn seim haus.
[22] 'S blohst geyyich een unni een davvahra; eah shpringd vekk fumm vind sei macht.
[23] Mennah fashpodda een bei iahra hend zammah shlauwa, un peifa ivvah een vo-evvah es eah anna gayt.”