[1] “Da mensh es geboahra is funn en veibsmensh laybt en katzi zeit un is foll unroo.
[2] Eah kumd uf vi en blumm, favelkt un fald ab; vi en shadda es fagayt, so bleibt eah nett.
[3] Dusht du even uf so aynah gukka mitt dei awwa, un een fannich dich bringa fa een richta?
[4] Veah kann ebbes rein macha es unrein is? Goah nimmand!
[5] Du hosht ausgmacht vi lang em mann sei dawwa sei zayla, di moonada funn seim layva sinn uf zu diah, un du hosht en zeit ksetzt es eah nett ivvah-shridda kann.
[6] So gukk vekk funn eem so es eah roo hott, biss eah sei zeit nei gedu hott vi en gedunganah gnecht.
[7] Es hott hofning fa en bohm, vann eah nunnah kakt vatt, kann eah viddah ausshlauwa, un di neiya shprauts gayn nett doht.
[8] Even vann sei vatzla ald vadda im grund, un da shtumba gayt doht im drukkana bodda,
[9] doch am kshmakk funn vassah vatt eah gree, un shikt shprauts naus vi en yungah blansa.
[10] Avvah da mensh shteahbt un is anna glaykt; eah heaht uf shnaufa, un vo is eah?
[11] Vi vassah fagayt fumm say, un en revvah shtobt lawfa un vatt drukka,
[12] so laykt da mensh sich anna un shtayt nimmi uf. Biss di himla nimmi sinn, vatt eah nett vakkah un vatt aw nett uf gvekt.
[13] Auch vann du mich yusht fashtekla daytsht im grawb, un mich datt halda daytsht biss dei zann fabei is, un en zeit setza fa mich, un no an mich denka!
[14] Vann en mensh shteahbt, zayld eah viddah layva? Awl di dawwa funn mei shtreides voaht ich biss mei fa'ennahres kumd.
[15] Du zaylsht roofa un ich gebb diah andvat, un en falanga havva fa sell es dei hend gmacht henn.
[16] Nau avvah dusht du mei foos-dabba zayla, avvah mei sinda dusht du nett zayla.
[17] Mei ivvah-dreddes vatt uf gebunna in en sakk, un du deksht mei sinda zu.
[18] En berg kann zammah falla un fagay; en shtay kann funn seim blatz gnumma sei.
[19] Vassah veaht di shtay vekk, un shveahrah reyya vesht da grund vekk, so dusht du di hofning fumm mensh zu nix macha.
[20] Du dusht een immah ivvah-kumma, un eah is faddich; du fa'ennahsht sei ksicht, un shiksht een vekk.
[21] Sei boova greeya grohsi eah, avvah eah vayst's nett; vann si niddah gebrocht vadda, dann dutt eah's nett sayna.
[22] Sei ayya flaysh gebt eem shmatza, un sei leides is yusht fa sich selvaht.”