[1] “Roof nau, dutt ennich ebbah diah andvat gevva? Zu vels funn di heilicha zaylsht du drayya?
[2] Shpeit bringd da unksheit um, un fagunsht shlakt da dumm doht.
[3] Ich habb en unksheidah ksenna eivatzla vi en bohm, avvah ich habb en bletzlichah fluch uf sei haus gedu.
[4] Sei kinnah sinn veit funn aus di kfoah kalda, si faliahra iahra recht am doah funn di court, un nimmand macht si frei.
[5] Di hungahricha essa sei eahn, even's frucht es vaxt unnich di danna, un di dashticha shlukka sei geld uf.
[6] Dreebsawl kumd nett aus em shtawb, un druvvel kumd nett aus em grund.
[7] Doch en mann is geboahra fa druvvel, so shuah es di funka nuff-zuss fleeya.
[8] Vann's mich veah, dayt ich Gott ohroofa, un dayt mei sacha fannich een bringa.
[9] Eah dutt grohsi un unbegreiflichi sacha, vundahra es nett gezayld sei kenna.
[10] Eah gebt da reyyah uf di eaht, un shikt's vassah uf di feldah.
[11] Eah haybt di niddahra hohch uf, un selli es heila hald eah aus di kfoah.
[12] Eah drayt zu nix selli es shlichtichi sacha du vella, un macht's so es iahra hend's nett ausdrawwa kenna.
[13] Eah fangd selli es mayna si sinn shmeaht mitt iahra aykni shkeems, un da roht funn di fafiahrah vatt kshvind nunnah gedrayt.
[14] Di dunkelheit kumd uf si deich da dawk; si feela iahra vayk in di mitt fumm dawk vi im dunkla.
[15] Eah hald di oahma vekk fumm shvatt in iahra maul, un aw funn di hand funn di mechticha.
[16] So henn di oahma hofning, un ungerechtichkeit muss sei maul zu macha.
[17] Da mann es gezankt is bei Gott is ksaykend, so fa'acht nett da shtrohf fumm Awlmechticha.
[18] Eah macht's vay, avvah eah bind's viddah uf, eah shlakt, avvah eah dutt's viddah hayla.
[19] Aus em druvvel nemd eah dich sex mohl; even sivva mohl dutt evil diah kenn shawda.
[20] In hungahs-noht hald eah dich fumm doht, un im greek hald eah dich fumm shvatt.
[21] Du vasht fashtekkeld funn veeshti kshvetzah bei di zung, un brauchsht dich nett feicha vann fadeahvung kumd.
[22] Du zaylsht lacha ivvah hungahs-noht un fadeahvung, un brauchsht dich nett feicha veyyich di vilda diahra.
[23] Du zaylsht fridda havva mitt di shtay im feld, un bisht in fridda mitt di vilda diahra.
[24] Du vaysht es dei tent nett nunnah falla zayld; du guksht ivvah dei sach, un alles is datt.
[25] Du zaylsht vissa es dei kinnah feel sei zayla, un dei nohch-kummashaft so vi's graws uf di eaht.
[26] Du kumsht an's grawb an en goodi eld, vi zeidichi vaytza-shayb an di eahn.
[27] Miah henn dess ivvah-gegukt, un's is voah; so heich dess ab, un sayn vass es maynd zu diah.”