[1] “Mei ohften is shvach; mei dawwa zayla nett lang sei, 's grawb is am voahra fa mich.
[2] Shpoddah sinn um mich rumm, un ich muss vatsha diveil es si mich fafolka.
[3] Oh Hah, shtay goot fa mich mitt diah selvaht; veah shunsht shtayt goot fa mich?
[4] Du hosht iahra hatz kalda funn fashtay, fasell zaylsht du si halda funn mich nunnah du.
[5] Vann ebbah sei freind faroht so es eah en dayl funn seim sach grikt, dann zayla sei kinnah leida difoah.
[6] Gott hott mich en kshvetz gmacht zu di leit, en mann es leit in's ksicht shpautza.
[7] Mei awk is dunkel vadda funn dreebsawl, mei eahm un bay sinn vi en shadda.
[8] Ufrichtichi leit sinn fashtaund ivvah dess, un di unshuldicha shtadda sich uf geyyich di ungettlicha.
[9] Avvah di gerechta halda oh iahra vayk gay, un selli mitt reini hend vadda shteikah.
[10] Kummet nau, un sawwet viddah vass diah am sawwa voahret; ich finn nett ay mann unnich eich mitt veisheit.
[11] Mei dawwa sinn faddich; vass ich du habb vella is zu nix kumma, un awl sell es in meim hatz voah.
[12] Dee mennah vella di nacht zu dawk drayya; diveil es es dunkel is, sawwa si's licht is nayksht.
[13] Vann's grawb di hofning funn mei haymet is, dann mach ich mei bett im dunkla.
[14] Vann ich's grawb mei faddah hays, un di veahm mei muddah adda mei shveshtah hays,
[15] vo dann is mei hofning? Veah kann hofning sayna fa mich?
[16] Gayt di hofning mitt miah nunnah in's grawb? Gayn miah mitt-nannah nunnah in da shtawb?”