[1] Da Elihu hott ohkalda un ksawt,
[2] “Heichet mei vadda ab, diah mennah mitt veisheit, heichet mich ab, diah mennah es alles visset.
[3] Fa's oah broviaht vadda aus, so vi di zung ess-sach broviaht.
[4] Losset uns selvaht ausmacha vass recht is, losset uns mitt-nannah lanna vass goot is.
[5] Da Hiob sawkt, ‘Ich binn gerecht, avvah Gott hott mei recht vekk gnumma.
[6] Even vann ich recht binn, doch binn ich fanumma fa am leeya sei; even vann ich unshuldich binn, doch binn ich zumm doht vay gedu.’
[7] Vass fa mann is vi da Hiob, deah es fashpott vatt un eah drinkt's vi vassah?
[8] Eah hald sich uf mitt evil-shaffah, un lawft mitt gottlohsi leit.
[9] Fa eah sawkt, ‘Es helft em mensh nix vann eah broviaht kfellich sei zu Gott.’
[10] So heichet mich ab, diah mennah es alles fashtaynd, Gott dayt selayva nett droh denka fa evil du, adda da Awlmechtich fa letz du.
[11] Eah betzawld da mensh fa sell es eah fadeend hott, un bringd uf een vass zu eem heaht.
[12] Unni zveifla, Gott dayt selayva nett letz du, da Awlmechtich beekt nee nett vass recht is.
[13] Veah hott eem graft gevva ivvah di eaht? Veah hott een ivvah di gans veld gedu?
[14] Vann eah so du vett, un dayt sei Geisht un ohften vekk nemma,
[15] dann dayt awl flaysh mitt-nannah fagay, un da mensh dayt zrikk zu shtawb drayya.
[16] Vann du fashtand hosht, dann heah dess, heich ab vass ich zu sawwa habb.
[17] Kann sellah es hast vass recht is, roola? Fadamsht du sellah es gerecht un mechtich is?
[18] Is dess nett sellah es zumm kaynich sawkt, ‘Du bisht nix veaht,’ un zu di feddahshta, ‘Diah gottlohsi,’
[19] deah es nett ayseidich is zu evvahshti, un es nett unnahshidlich is zu di reicha ivvah di oahma? Sinn si nett awl di eahvet funn sei hend?
[20] Leit shteahva bletzlich; in di mitt funn di nacht vadda si kshiddeld un shteahva, di mechtichi vadda vekk gnumma unni deich mensha hend.
[21] Sei awwa sinn uf di vayya funn mensha; eah saynd alli shritt es si macha.
[22] Es is kenn dunklah blatz adda shadda, vo evil-shaffah sich fashtekla kenna.
[23] Gott brauch di mensha nett veidah ausbroviahra, fa si richta fannich sich selvaht.
[24] Gott bringd di mechticha um unni si unnah-sucha, un setzt anri uf in iahra blatz.
[25] Veil eah iahra verka alles vayst, dann shtatzt eah si deich di nacht, so es si gans nunnah gedredda vadda.
[26] Eah shtrohft si fa iahra gottlohs layva, vo alli-ebbah's sayna kann,
[27] veil si vekk gedrayt sinn funn eem nohch gay, un henn awl sei vayya fa'acht.
[28] Deich si henn di oahma missa zu eem roofa fa hilf, un eah hott selli keaht es in noht voahra.
[29] Avvah vann eah shtill bleibt, veah kann een fadamma? Vann eah sei ksicht fashtekkeld, veah kann een sayna? Doch is eah ivvah da mensh un ivvah di heida,
[30] so es gottlohsi mennah nett ivvah-nemma, un en fall shtella fa di leit.
[31] Hott ebbah zu Gott ksawt, ‘Ich binn shuldich, ich zayl nimmi letz du?
[32] Lann mich vass ich nett sayna kann; vann ich letz gedu habb, dann zayl ich's nimmi du.’
[33] Siddah es du nunnah draysht vass Gott dutt, denksht du Gott sett nett so ebbah shtrohfa? 'Sis uf zu diah, nett zu miah, so sawk miah vass du vaysht.
[34] Fashtendichi leit sawwa zu miah, un en mann mitt veisheit es mich heaht, sawkt,
[35] ‘Da Hiob shvetzt unni sacha fashtay, sei vadda sinn unni veisheit.’
[36] Ich vott da Hiob veah ausbroviaht biss an's end, veil eah andvat gebt vi gottlohsi mennah.
[37] Zu sei sinda dutt eah sich noch shteibahra; eah macht shpott unnich uns, un sawkt feel vadda geyyich Gott.”