[1] “Avvah nau, Hiob, heich mei vadda ab, un gebb acht zu vass ich sawk.
[2] Ich mach mei maul uf, un di zung shvetzt aus meim maul.
[3] Mei vadda kumma aus en ufrichtich hatz, un mei leftz shvetza eahnshtlich vass ich vays.
[4] Da Geisht Gottes hott mich gmacht, un da ohften fumm Awlmechticha gebt miah layva.
[5] Gebb miah andvat vann du kansht, risht dich fa geyyich mich shtay.
[6] Ich binn grawt vi du fannich Gott, un ich binn aw aus eaht gmacht.
[7] Du brauchsht dich nett feicha veyyich miah, un mei hand is nett shveah uf dich.
[8] Du hosht ksawt fannich mei oahra, ich habb dich keaht dee vadda sawwa:
[9] ‘Ich binn rein un habb nix letzes gedu; ich binn unshuldich un habb kenn sinda.
[10] Avvah doch hott Gott faylah kfunna mitt miah, eah nemd mich fa sei feind.
[11] Eah bind mei fees mitt kedda, un vatsht awl mei pawda.’
[12] Avvah loss mich diah sawwa, du bisht nett recht in demm, veil Gott graysah is es da mensh.
[13] Favass faglawksht du dich zu eem, un sawksht, ‘Eah gebt kenn andvat zu mei vadda’?
[14] Gott dutt shvetza, aymol ay vayk, un's neksht mohl da annah, avvah da mensh heaht's nett.
[15] In en drohm, nachts in en vision, vann leit eishlohfa in en deefah shlohf, diveil es si in iahra bett leiya,
[16] dann shvetzt eah in iahra oahra, un fagelshtaht si mitt vanninga.
[17] Eah dutt dess so es eah da mensh drayya kann funn letz du, un een halda funn shtols sei,
[18] un so es eah sei sayl aus em grawb halda kann, un sei layva halda funn doht gmacht sei mitt em shvatt.
[19] Da mensh is aw kshtrohft mitt shmatza uf seim bett, un feevah macht sei gnocha di gans zeit shidla,
[20] so es eah vatt es ess-sach eem ayklich is un sei sayl's besht ess-sach nunnah drayt.
[21] Sei flaysh fazeaht vekk zu nix, un sei gnocha es ma nett sayna hott kenna, shtekka nau raus.
[22] Sei sayl kumd nayksht an's grawb un sei layva nayksht zu selli es da doht bringa.
[23] Doch, es mecht en engel uf sei seit sei, en middel-mann, aynah funn Gott sei dausends, fa em mensh sawwa vass recht is fa een.
[24] Loss da engel no gnaydich sei zu eem un sawwa, ‘Hald een funn nunnah in's grawb gay, fa ich habb en vayk kfunna fa een frei setza.’
[25] No vatt sei flaysh viddah frish vi ma kind sein, un eah vatt viddah yung.
[26] Eah zayld zu Gott bayda, un Gott is gnaydich zu eem; eah saynd Gott sei ksicht un is fraylich, un Gott gebt eem sei gerechtichkeit zrikk.
[27] Eah singd fannich leit un sawkt, ‘Ich habb ksindicht, un habb gedu vass nett recht is, avvah ich habb nett grikt vass ich fadeend habb.
[28] Eah hott mei sayl frei-kshteld funn nunnah in's grawb gay, mei layva zayld's licht sayna.’
[29] Gott dutt awl dee sacha zvay adda drei mohl zumm mensh,
[30] so es eah sei sayl zrikk drayya kann fumm grawb, un so es eah's licht funn layva sayna kann.
[31] Gebb acht zu vass ich sawk, Hiob, sei shtill, un loss mich shvetza.
[32] Vann du ebbes zu sawwa hosht, dann gebb miah andvat, shvetz, ich vill diah geahn dei recht gevva.
[33] Avvah vann nett, dann heich mich ab, sei shtill, un ich lann diah veisheit.”