[1] No hott da Hiob ksawt,
[2] “Vann yusht mei angsht gvohwa sei kend, un awl mei dreebsawl uf en vohk gedu sei kend.
[3] Es veah geviss shveahrah es da sand am say nohch; fasell sinn mei vadda so grobb.
[4] Em Awlmechticha sei arrows shtekka in miah; mei geisht drinkt iahra gift. Ich binn fagelshtaht bei di sacha es Gott ufgleind hott geyyich mich.
[5] Dutt en vildah aysel greisha vann eah graws hott, adda dutt en ox bladda vann eah foodah hott?
[6] Vatt lebbich ess-sach gessa unni sals, adda hott's veis fumm oi ennichah flayvah?
[7] Ich du's nett fa's ohrayya; so ess-sach macht mich grank.
[8] Oh, vann ich yusht havva kend vass ich frohk difoah, un vass ich hoff difoah gevva veah zu miah bei Gott.
[9] Ich vott Gott veah villing fa mich doht drikka, es eah sei hand lohs lossa dayt un mich abshneida!
[10] No hett ich alsnoch deah drohsht: Ich kend mich froiya even in dee shmatza, veil ich di vadda fumm Heilicha nett falaykeld habb.
[11] Vass fa grefta habb ich, es ich voahra sett? Vass zayld mei end sei, es ich geduld havva sett?
[12] Habb ich di grefta funn en shtay, adda is mei flaysh vi bronze?
[13] Habb ich di grefta fa miah selvaht helfa, nau siddah es mei hilf gnumma is funn miah?
[14] En mann sei freind sedda goot-maynich sei zu eem vann eah in druvvel is, even vann eah ufheaht da Awlmechtich firchta.
[15] Avvah diah, mei breedah, sind so zvay-ksichtich es en vassah-grikk, es drukka gayt vann's nett reyyaht.
[16] Ayni es dreeb vatt vann's ice shmelst, un es foll vatt vann da shnay shmelst.
[17] Vann's hays vatt heaht si uf lawfa, un in di hitz drayt si zu nix.
[18] Di leit mitt kamayla gayn ab funn iahra vayk; si gayn nuff an deah drukka blatz un fadashta.
[19] Di leit mitt kamayla funn Thema gukka fa vassah, di kamayla leit funn Saba gayn mitt hofning.
[20] Si voahra nunnah glost fa si henn hofning katt, avvah si sinn datt anna kumma un voahra falossa.
[21] Diah aw hend ausgedrayt fa kenn hilf sei, diah saynet mei dreebsawl, un feichet eich.
[22] Habb ich selayva kfrohkt fa en kshenk, adda eich kfrohkt fa en betzawles funn eiyah geld,
[23] fa aus di kfoah gnumma sei funn mei feinda, adda aus di kfoah funn di mechticha?
[24] Lannet mich, no binn ich shtill, veiset miah vo ich letz gedu habb.
[25] Eahlichi vadda doon vay, avvah vass batt eiyah viddah-shtreit?
[26] Maynet diah, diah zaylet recht setza vass ich sawk, un nemmet di vadda funn en bedreebdah mann vi yusht vind?
[27] Diah daydet even shteklen zeeya im lohs fa kinnah greeya unni en daett, un daydet eiyah freind vekk fahandla.
[28] Nau seind goot genunk un gukket an mich. Dayt ich leeya fannich eiyah ksicht?
[29] Gevvet ei, seind nett unrecht, denket viddah, dess hott zu du mitt mei gerechtichkeit.
[30] Denket diah ich binn am leeya mitt mei zung? Denket diah ich vays nett recht funn letz?”