[1] No hott da Hiob ksawt,
[2] “Vee oahrich shtaysht du demm bei es kenn grefta hott! Vee oahrich hosht du demm kolfa es kenn shteikah oahm hott!
[3] Vee oahrich gebsht du demm roht es kenn veisheit hott! Vass fa vundahboahri eisicht hosht du gvissa!
[4] Veah hott diah kolfa mitt di vadda es du ksawt hosht? Vass fa geisht hott kshvetzt aus dei maul?
[5] Di geishta funn di dohda ziddahra, unnich di vassahra un selli es datt voona.
[6] Es grawb is abgedekt fannich Gott, un's is uf gmacht zu sei awwa.
[7] Eah shtrekt da himmel in di natt naus ivvah's leahra, un henkt di eaht uf nix.
[8] Eah vikkeld di vassahra uf in sei volka, un di volka fareisa nett unnich iahra gvicht.
[9] Eah dekt sei kaynich-shtool zu, bei di volka drivvah du.
[10] Eah hott da ring fumm himmel auskshtrekt ivvah da deef say, fa di helling un's dunkla funn-nannah halda.
[11] Di poshta fumm himmel ziddahra, un fashtauna sich vann eah si zankt.
[12] Deich sei graft hott eah da say shtill gmacht, un bei sei veisheit hott eah's say-diah, Rahab, kshlauwa.
[13] Bei seim vind sinn di himla abgeblohsa un shay vadda, un sei hand hott di shlang doht gmacht es am difunn gay voah.
[14] Avvah dess is yusht da ohfang funn sei vayya, miah heahra yusht en pishbah funn eem. Veah kann's gviddah funn sei macht fashtay?”